سودانی لەلای بایدن ئافەرین لە نێچیروان بارزانی کەێد
ئەوەیش لە دیداریگ سودانی و جۆ بایدن سەرۆک ئەمریکا لە ماڵ چەرمگ.
سەرچەوەیگ تایبەت لەناو دیدارەگە بوی ئەرا ئاژانس شەفەق نیوز وت: سودانی ئافەرین لە تەقەلایل سەرۆک هەرێم کرد ئەرا چارەسەرکردن گیچەڵەیل گیرهاتگ، وەتایبەتی سەردان دویایینی ئەرا بەغدا، و دووپات لەبان رۆڵ گرنگی لەی باوەتە کرد.
دویەکە دووشەممە، نێچیروان بارزانی سەرۆک هەرێم کوردستان باس گەشبینی خوەی کرد وە سەردان محمد شیاع سودانی سەرۆک وەزیرەیل عراق ئەرا ئەمریکا، و پشتگیریکردن تەواو خوەی ئەرای راگەیان.
نێچیروان بارزانی لەبان ماڵپەڕ فەرمیی لە سایت X نویسان: هەرێم کوردستان وە گەشبینی نووڕێدە سەردان محمد شیاع سودانی سەرۆک وەزیرەیل ئەرا ئەمریکا.
وتیش؛ ئیمە پشتگیری تەواویگ ئەرا ئی سەردانە کەیمن، و دڵنیایمن کە بەرژەوەنیەیل گشت عراقییەیل لەورا وەخاوەن کریەن.
وتیش: ئومید خوازیمن دیدارەیل ئەرێنی و سەرکەفنی بوون و بڕەسنە ئاست پەیوەندییەیل وەرەو خاستر ناوەین دوو وڵات.
سودانی ئی سەردانە ئەرا ئەمریکا وەگەرد رەسینی دویەکە یەکشەممە وەیاوەری شاندیگ حکومەتی و پەرلەمانی باڵا چەوی کەفتە جۆ بایدن سەرۆک ئەمریکا و لوید ئۆستن وەزیر وەرگری ئەمریکا.
