له كه‌سايه‌تيه‌يل كورد فه‌يلی له به‌غدا..خيته كوور
خيته كوور يه‌كيگ بوی له كورده‌يل فه‌يلی به‌غداو له ناودارترين شه‌قاوه‌يل به‌غدا بوی وه‌گشتی ك ناسريا وه زرنگی و ئازايه‌تی و نيشته‌جی جاده‌ی كفاح بوی له نزيك مه‌يدان نه‌هزه، ك هه‌رچه‌نی شه‌قاوه بوی، وه‌لی هويچ وه‌ختيگيش ده‌سدريژی و زوڵم له فه‌قير نه‌كردياد و هويچ وه‌ختيگيش تاوانيگ ئه‌نجام نه‌ياو كه‌سيش نه‌كوشتگه، به‌ڵكوو وه‌چه‌واشه‌وه هه‌ميشه مقه‌يه‌تی له فه‌قير و نه‌داره‌يل كردو كاريان جيوه‌جی كرديادو هه‌ركه‌سيگيش داوای ده‌سميه‌ت له‌لی بكردياد ره‌سياده هانای.
خيته ده‌سكرده كيشمه‌كيش وه‌ل بڕيگ له شه‌قاوه‌يل تر نيشته‌جی كويچه‌ی ئه‌لفه‌زڵ و له‌وانه‌يش شه‌قاوه‌ی ناسرياگ"خه‌ليل ئه‌بولهۆب"ك يه‌كيگ بوی له پياوه‌يل ئه‌وسای رژيم و قه‌وم نزيك "خه‌ليل كه‌نه"ی وه‌زير مه‌عارف، ئمجا له‌وه‌ختيگ ك كيشمه‌كيش تونه‌و بوی له‌ناونی هه‌ردوگيان، خه‌ليل ئه‌بولهۆب و جه‌ماعه‌ته‌گه‌ی بڕيار دان پلانيگ بته‌و ئه‌را كوشتن خيته كوور دابنه‌ن له‌ناوچه‌ی وه‌رانوه‌ر ده‌رمانخانه‌ی ئه‌لشه‌ماع، خيته كووريش عه‌ره‌بانه‌يگ داشت و رووژانه خوارده‌مه‌نی له‌بانی فرووشتياد و شه‌وانه‌يش له‌ناوی خه‌فتياد.
شه‌و ديره وه‌ختيگ ك دوينا فريه تيه‌ريك بوی، خه‌ليل ئه‌بولهۆب و جه‌ماعه‌ته‌گه‌ی وه‌گووره‌ی ئه‌و پلانه ك دايناوين هاتن ئه‌را كوشتن دوشمنه‌گه‌يان و نيازيان ئه‌وه بوی وه يه‌كجاری قورتار بوون له‌لی، له‌و وه‌خته‌يلشه هه‌ميشه خيته له‌ناو عه‌ره‌بانه‌گه‌ی خه‌فتياد، ئمجا وه‌ختيگ ك خه‌ليل و جماعه‌ته‌گه‌ی له‌لی نزيكه‌و بوين لويله‌ی تفه‌نگ و ده‌مانجه نانه قه‌ی عه‌ره‌بانه‌گه‌ی و گوله وارانی كردن و هه‌يواين.
شه‌وه‌كی ده‌مه‌و سوو هه‌نای مه‌ردم له‌ماڵ ده‌رچين و چين وه‌ره‌و كار چه‌ويان كه‌فته عه‌ره‌بانه‌گه‌ی خيته و ته‌ماشا كه‌ن گشتی وه گوله كونا كرياگه‌و باوه‌ڕيان ئه‌وه بوی خيته كوور له‌ناوی كوشياگه، ئمجا له‌وه‌ختيگ ك تواسن ته‌رم خيته له‌ناو بارنه ده‌يشت، خيته له‌و خه‌و قورسه هاته خه‌وه‌راو چه‌وه‌يلی واز كرد، چونيگه شه‌راو فريه‌يگ خواردويد و له‌وه‌ر بيهووشی هه‌ر نه‌زانست مه‌سه‌له چه بويه و مه‌ردميش له‌بان سه‌ری جه‌مه‌و بوين و ئه‌ويش وه پای خوه‌ی هه‌ڵسياو هه‌نای چه‌وی كه‌فته مه‌ردمه‌گه سه‌ری سوڕ مه‌ند ئی هه‌مگه مه‌ردمه له ده‌وری جه‌مه‌و بوينه‌و له‌ليان پرسی چه بويه؟ ئه‌وانيش باس مه‌سه‌له‌گه ئه‌رای كردن و خيته‌يش قه‌سه‌م خوارد توڵه‌ی ئه‌و كاره له حكومه‌ت و داروده‌سه‌گه‌ی بكا.
دويای چه‌ن رووژيگ كه‌م ئه‌و رويداگه بوی باس له‌لای مه‌ردم به‌غدا و دورگردی، خيته‌يش رويكرده ديم كه‌رخ له ناوچه‌ی ساڵحيه‌و سوار په‌يكه‌ر ئه‌سپه برۆنزيه‌گه بوی ك په‌يكه‌ريگ بوی ئه‌را مه‌لك فه‌يسه‌ڵ يه‌كه‌م دروس كرياويد ك تواسياد باريده‌ی وه‌ره‌و ديم رسافه، ك ئه‌ويش وه مانای سووكايه‌تيكردن بوی وه حكومه‌ت ئه‌وساو دار وده‌سه‌گه‌ی، ئمجا وه بونه‌ی ئه‌و كاره‌و پۆليس ده‌سگيری كردن و خستنه‌ی زيندان ئه‌را ماوه‌ی چه‌ن ساڵيگ له‌وه‌ر ئه‌وه‌گ سووكايه‌تی وه شانيه‌ت ده‌وڵه‌ت كرد كردگه، دی وه‌رجه ته‌مامبوين ماوه‌گه‌ی له زيندان شووڕش ١٤ی ته‌ممووز ساڵ ١٩٥٨ ده‌س وه‌پيكرد و ئه‌وه بوی رژيم پاشايه‌تی له عراق ئاڵشت بوی ئه‌را رژيم كۆماری و خيته كووريش وه‌ل زيندانيه‌يل تر له‌لايه‌ن شووڕشه‌و ئازاد كريان وه ئه‌وه‌گ هاووڵاتييگ بويه دژ حوكم پاشايه‌تی له عراق.
نه‌وزه‌ت دهۆكی
ج . أ
