نێچیروان بارزانی و عەبدولڵاهیان باس بتەوکردن پەیوەندییەیل سیاسی و ئابووری کەن
سەرۆکایەتی هەرێم کوردستان لە بەیاننامەیگ رەسیە ئاژانس شەفەق نیوز وت: هەردوگ لایەن دووپات لە گرنگی بتەوکردن پەیوەندییەیل ناوەین دوو وڵات کردن، و باس زەمینە و دەرفەتەیل ئەرا زیایکردن جویلەی بازرگانی و بەرزەوکردن گواستنەوەی بازرگانی و ئابووری و کار و پڕۆژەیل کەرت تایبەت ئیرانی لە عراق و هەرێم کوردستان کردن.
لە دیدارەگە رووشنایی خریا بان رەوشەیل سیاسی گشتی لە عراق و هەرێم کوردستان، و نووترین پیشهاتەیل لە ناوچەگە وەگەرد دووپاتکردن لەبان مقیتیکردن ئارامی.
وەرجەیە، نێچیروان بارزانی سەرۆک هەرێم کوردستان، ئمڕوو دووشەممە، چەوی کەفتە عەلی خامەنەئی ریبەر ئیران، ئەوەیش وە سەردانیگ فەرمی ئەرا تەهران پایتەخت.
حکومەت عراق وە سەرۆکایەتی محمد شیاع سودانی، ئمڕوو دووشەممە، راگەیان کە پشتگیری لە سەردان نێچیروان بارزانی سەرۆک هەرێم کوردستان ئەرا تەهران کەێد و وە گەشبینی چەوەڕی ئەنجامەیلی کەێد.
زیا ناسری سڵاکار کاروبار دەیشت ئەرا سەرۆک حکومەت عراق ئەرا ئاژانس شەفەق نیوز وت: حکومەت عراق پشتگیری لە تەقەلایل وەخاتر کەمکردن ریگریەیل و چارەکردن گیچەڵەیل وەرد دەوڵەتەیل هاوسا کەێد وەتایبەتی وەرد ئیران، و وە خاسی نووڕینمە ئی سەردانە چوینکە دویای ئەوە هات کە چەک ئاسمانی ئیران هەولێر کردە ئامانج وە دەسپیچگ ئەوە کە بارەگای گومانلیکریاگ و خراوەکارەیل هەس.
ناسری وتیش؛ حکومەت چەوەڕی ئەنجامەیل سەردانەگە دویای کۆتایی و بەیاننامەی هەڵوێست ئیران کەێد.
وەرجەیە، نێچیروان بارزانی سەرۆک هەرێم کوردستان، چەوی کەفتە ئیبراهیم رەئیسی سەرۆک کۆمار ئیسلامی ئیران، لە سەردانیگ فەرمی ئەرا تەهران، هەمیش چەوی کەفتە ئەمیر حسێن عەبدوڵڵاهیان وەزیر دەیشت ئیران.
لەی باوەتە، دڵشاد شهاب قسەکەر سەرۆکایەتی هەرێم کوردستان ئەرا ئاژانس شەفەق نیوز وت: سەردان سەرۆک هەرێم کوردستان ها دەورگرد بەرزکردن پەیوەندییەیل دووانی ناوەین عراق و هەرێم کوردستان وەرد ئیران.
وتیش: رینمای یەکی لەلای هەرێم کوردستان وەتایبەت لەلای سەرۆک هەرێم کوردستان ئەوەسە کە قەوارەی کوردستان هەمیشە کاریگەر ئارامی و ئاسایش ناوچەگەی، و ببجگە خاس هاوسایەتی و رێزگردن لەیەکتری چشتیگ ترەک وەرەو هویچ دەوڵەتیگ هاوسا لەلی دەرنیەچوود.
دووپات کرد کە گرنگە ئەرا هەرێم کوردستان ئەرا لایەن ئیرانی دووپات بکەێد کە خوەی جی ئارامیە جویر ئەوەگ هەمیشە وەرد گشت دەوڵەتەیل هاوسا بویە.
وتیش: بەرزکردن پەیوەندییەیل و رێزگردن لەیەکتری و پەیوەندییەیل ئابووری و بازرگانی و ئارامی ناوچەگە باوەتەیل گرنگن لەی سەردانە
