دەسەی ئاو لە پەرلەمان هووشداری لە کەم ئاوی کەێد

شەفەق نیوز/ دەسەی کشتوکاڵی و ئاو و ئەهوار لە پەرلەمان عراق، ئمڕوو سێشەممە، هووشداری لە کەمەوبوین ئاو فوڕات لەماوەی ئایندە کرد .

سەلام شەمەری وەرپرس دەسەگە لە بەیاننامەیگ رەسیە ئاژانس شەفەق نیوز وت: تورکیا هەر ماوەی جاریگ تەقەلای وەکارهاوردن کارت ئاو دەێد ئەرا جیوەجیکردن پلانەیلی لەو دوو دەوڵەتە ک چەم فوڕات وەپیان رەد بوود.

شەمەری وتیش: راگەیانن وەرپرسیگ لە باکوور سوریا لە داوەزین ئاو فوڕات زیاتر لە ٥ مەتر ئەرا یەکەم جارە لە مێژووی کار رخبەریگە و هووشداری لە خود کارەگە لە عراق دەێد.

شەمەری داوا لە حکومەت کرد وەزوی واژوو رێککەفتن دەربارەی بەش ئاو عراق لە دیجلە و فورات وە گەرد تورکیا بکەێد، و جوور کارتیگ جەختکردن ئەرا جیوەجیکردن ئامانجەیلی وەکار نارێدەی.