هيزه‌يل عراقى له به‌رزايى باڵه‌خانه‌يله‌و حاڵ داعش هاوردنه‌سه ته‌نگ
شه‌فه‌ق نيوز/ هيزه‌يل عراقى قه‌ناسه وه‌ده‌سه‌يل فريه‌يگ له‌بان به‌رزايى باڵه‌خانه‌يل بڵاو كرده‌سه‌و ئه‌را گرتن و كوشتن چه‌كداره‌يل ريكخرياگ ترۆريستى داعش له‌وانه‌گ مه‌ردمان مه‌ده‌نى كردنه‌سه قه‌ڵغان به‌شه‌رى له خوه‌رئاواى موسڵ و له هه‌مان وه‌خت عراقيش ده‌سكرده په‌يجورى له مه‌سه‌له‌ى كه‌فتنه‌وه‌ى شماره‌ى فريه‌يگ له قوربانيه‌يل له ئاكام بوردمانه‌يل ئاسمانى.
له‌ى باوه‌ته‌و، عه‌ميد يه‌حيا ره‌سول قسه‌كه‌ر وه‌ناو سه‌ركردياه‌تى فه‌رمانده‌يى هاوبه‌ش ئه‌را فرانس پرێس وت: ريكخرياگ ترۆريستى داعش وه‌رگرى له دويا گه‌وراترين بنگه‌ى خوه‌ى له عراق ئه‌كا و ده‌سكرده‌سه وه‌كارهاوردن هاووڵاتيه‌يل جوور قه‌ڵغان به‌شه‌رى و ئيمه‌يش هه‌وڵ ئه‌وه ئه‌يه‌يم وه په‌لاماره‌يلمان بگريمنه‌يانه ئامانج له‌ڕى پياوه‌يل قه‌ناسه وه‌ده‌سمان.
ره‌سول وت: پيشڕه‌ويمان وه دقه‌ته‌و ئه‌نجام ئه‌گرێد وه‌ل مقه‌يه‌تيكردن له گيان هاووڵاتيه‌يل و پشت وه وه‌كارهاوردن چه‌ك نيمچه قورس و سووك ئه‌وه‌سيم و له‌وانه‌يش قه‌ناس ئه‌را راوكردن چه‌كداره‌يل داعش و قورتاركردن هاووڵاتيه‌يل.
ره‌سول ريكخرياگ ترۆريستى داعش وه كوشتن مه‌ده‌نيه‌يل بيتاوان تومه‌تبار كرد و وت: ئى ريكخرياگ ترۆريستيه سه‌هريج سووككرياێ وه‌كار ئه‌يه‌رێد و هاووڵاتيه‌يل گرده‌و ئه‌كاو ناچاريان ئه‌كاو گرديانه‌و ئه‌كا له‌ناو ماڵه‌يل و ئى سه‌ياره‌يله سه‌هريجه ئه‌ته‌قنێده پيانه‌و له‌ناو ئه‌و ماڵه‌يله.
ره‌سول يه‌يش خسته‌ڕوى ك ئامانج له‌ى باسه ره‌سانن په‌ياميگه ئه‌را راى گشتى ك ريخرياگ داعش له‌ى كرده‌وه‌يله مه‌رامى ئه‌وه‌سه ك گوايا هيزه‌يل عراقى هاووڵاتيه‌يل بيتاوان ئه‌گرێده ئامانج.
وه‌رپرسه‌يل عراقييش و شايه‌تحاڵه‌يليش باس له‌وه كردن ك په‌لاماره‌يل ئاسمانى دژ ترۆريسته‌يل له رووژه‌يل گوزه‌يشت بويه‌سه هووكار كه‌فتنه‌وه‌ى قوربانيه‌يل مه‌ده‌نى ك شماره‌يان له‌ناونى ده‌يان و سه‌دان كه‌سه.
هيزه‌يل ئاسمانى عراقى و هيزه‌يل هاوپه‌يمان ناوده‌وڵه‌تى وه سه‌رۆكايه‌تى واشنتۆن بوردمان بنگه‌يل ريكخرياگ ترۆريستى داعش ئه‌كه‌ن له‌وه‌ر صشتگيرى پيشڕه‌ويكردن هيزه‌يل عراقى.
وه‌ل ئه‌وه‌يشا هيزه‌يل هاوپه‌يمان ناوده‌وڵه‌تى چه‌ن رووژيگ وه‌رجه ئيسه باس له‌وه كردن ك په‌لاماره‌يليان روى له‌و كه‌رته‌يله كردنه ك ئه‌و شماره‌ى مه‌ردمان مه‌ده‌نيه له‌تيان كوشيانه.
هاوپه‌يمان ناوده‌وڵه‌تى له به‌ياننامه‌يگ وت: دوياى نمايشكردن يه‌كه‌م ئه‌را ده‌رخستن په‌لاماره‌يل، هيزه‌يل هاوپه‌يمان په‌لامار چه‌كداره‌يل سه‌ر وه ريكخرياگ داعش و كه‌ره‌سه‌يليان دانه له‌بان داواكارى هيزه‌يل عراقى له 17ى ئادار له خوه‌رئاواى موسڵ.
له‌ى باوه‌تيشه‌و راپۆرته‌يل له سه‌ره‌تاى ئى مانگه باس له‌وه كردن ك نزيكه‌ى 220 هاووڵاتى مه‌ده‌نى وه هه‌ڵه كوشيانه له‌ئاكام بوردمانه‌يليگ له‌لايه‌ن هيزه‌يل ئاسمانى هاوپه‌يمان ناوده‌وڵه‌تيه‌و.
شايه‌تحاڵه‌يليگيش ك له‌خوه‌رئاواى موسڵ واينه، باس له‌وه كردن ك نزيكه‌ى 170 كه‌سيش له مه‌ردمان مه‌ده‌نى له‌ژير ويرانه‌ى بوردمان باڵه‌خانه‌يل گيان له‌ده‌سدانه.
ئه‌فسه‌ريگيش له هيزه‌يل عراقى وه پله‌ى عه‌ميد باس له‌وه كرد ك 27 ماڵ تويش بوردمان هاتگه له ماوه‌ى چه‌ن رووژيگ له خوه‌رئاواى موسڵ و سێ ماڵيان وه ته‌مامى ويران بوينه.
به‌شار كيكى سه‌رۆك ئه‌نجومه‌ن پاريزگاى نه‌ينه‌وايش ئه‌وه ده‌رخست ك هيمان ده‌يان ته‌رم هانه ژير ويرانه‌ى ماڵه‌يل خاپوركرياێ و باسيش له كوشيان سه‌دان كه‌س تريش كرد له ماوه‌ى رووژه‌يل گوزه‌يشته.
هيزه‌يل عراقى له ته‌شرين يه‌كه‌م/ ئوكتۆبه‌ر گوزه‌يشت ده‌سكردنه ئه‌نجامداين كرده‌وه‌يل سه‌ربازى ئه‌را هاوردنه‌وه‌ى شار موسڵ گه‌وراترين دويا بنگه‌ى ئه‌و ريكخرياگ ترۆريستيه له عراق و ديم خوه‌رهه‌ڵات ئه‌و شاره هاورده‌و، ك ئيسه‌يش له 19ى شوبات، فبرايه‌ره‌و خه‌ريك جه‌نگه‌يل سه‌ختيگه له ديم خوه‌رئاواى.
