هه‌وڵ داعش وه‌ره‌و چين له‌وه‌ر چه‌س؟

هه‌وڵ داعش وه‌ره‌و چين له‌وه‌ر چه‌س؟
2017-03-06T13:35:00+00:00

شه‌فه‌ق نيوز/ وه‌رجه‌ رووژه‌يليگ ريكخرياگ ترۆريستى داعش ئه‌را يه‌كه‌مجاره‌ وه‌ شيوه‌يگ راسه‌خۆ هه‌ڕه‌شه‌ى ئه‌وه‌ له‌ ده‌سڵاته‌يل چينى دا ك چه‌كداره‌يلى له‌و وڵاته‌ بڵاوه‌و بكا ئه‌را توڵه‌سه‌ندن له‌و كرده‌وه‌يله‌ ك ئه‌ياده‌ تويش موسڵمانه‌يل جوور ئه‌وه‌گ خوه‌ى تاريفى كرد.

 

ئه‌و ريكخرياگه‌ وه‌ داواكارييگ ك له‌ كووتايى ساڵ 2015 خسته‌ى روێ، داوا له‌ موسڵمانه‌يل چينى كرد بانه‌ ناو ڕزه‌يلى.

 

له‌ى مانگه‌يل دوياخريشه‌ گرينگيده‌ره‌يل وه‌ ترۆر باوه‌ريان ئه‌وه‌ بوى ك مكوڕه‌ له‌بان كرده‌وه‌يلى وه‌تايبه‌ت هه‌وڵ په‌لكوتانى وه‌ره‌و چين و هند و  وڵاته‌يل تر ك زوورميان ئه‌كه‌فنه‌ باشوور خوه‌رهه‌ڵات ئاسيا.

 

وه‌لێ هووكاره‌يل هه‌وڵ ريكخرياگ ترۆريستى داعش ئه‌را چگن وه‌ناو ئى ده‌وڵه‌ته‌يله‌ جوراوجووره‌و له‌وانه‌يش ئه‌وه‌سه‌ ك وه‌ ته‌مامى حاڵى هاته‌سه‌ ته‌نگ و ئه‌خوازێد جاريگتر خوه‌ى بچه‌سپنێد له‌بان جه‌هان له‌ڕى ئى ره‌فتار و هه‌ڵسووكه‌فته‌يل و دعايه‌يل وه‌هيزه‌ ك ديرێده‌ى.

 

وه‌ل ئه‌وه‌يشا هووكاره‌يل تر هه‌ن په‌يوه‌سن وه‌ مه‌سه‌له‌يليگ ك ريكخرياگ ترۆريستى داعش ڕى وه‌خوه‌ى ئه‌ياد خوه‌ى له‌تيان له‌ناو رويداگه‌يل تازه‌ بوينێده‌و.

 

يه‌يش بيجگه‌ ئه‌وه‌گ شيه‌وكه‌ره‌يل سياسى فريه‌يگيش له‌ ماوه‌ى دو ساڵ گوزه‌يشت گومان له‌ تواناى هاوپه‌يمان ناوده‌وڵه‌تى كرديان له‌ روى وه‌ڕوى بوينه‌وه‌ى ريكخرياگ داعش له‌ هه‌ر يه‌ك له‌ عراق و سوريا و ليبيا و ناوچه‌ى ساحل ئه‌فريقى.

 

وه‌لێ وه‌ل ئه‌وه‌يشا كزه‌وبوين چالاكيه‌يل ريكخرياگ ترۆريستى داعش له‌ى وڵاته‌يليشه‌ بويه‌سه‌ چشتيگ واقع.

 

له‌و هووكاره‌يليشه‌ ك مكوڕبوين ريكخرياگ داعش ده‌رئه‌خا له‌بان جيوازكردن چالاكيه‌يلى ئه‌را چين و هند و فلپين ئه‌را نموونه‌، ئه‌وه‌سه‌ ك خاك پڕ پيت ديرێد ئه‌را ئايدۆلۆجيه‌ت ئه‌و ريكخرياگه‌و ئامانجه‌يلى.

 

ئه‌را نموونه‌: له‌ هند ئاسانكارى ئه‌را ده‌رخستم وتاره‌يل ئه‌و ريكخرياگه‌ په‌يا ئه‌دێ له‌لاى نزيكه‌ى 170 مليۆن كه‌س و پيشبينى يه‌يش ئه‌كريه‌ێد ئه‌و شماره‌يشه‌ به‌رزه‌و بدێ ئه‌را 300 مليۆن كه‌س له‌ ناوڕاس ئى سه‌ده‌.

 

له‌ چينيش ريكخرياگ داعش پشت وه‌و كرده‌وه‌يله‌ ئه‌وه‌سێد ك ئه‌ياده‌ تويش كه‌مينه‌ى ئيغۆر موسلمان ك له‌ باكوور خوه‌رهه‌ڵات وڵاته‌گه‌ ژيه‌ێد.

 

به‌ڵكوو راپۆرته‌يل فريه‌گيش باس له‌وه‌يش ئه‌كه‌ن ك ئى كه‌مينه‌ى موسڵمانه‌ بڕێگ چه‌كدار ديرێد له‌ناو داعش و به‌شدارن له‌ جه‌نگ له‌ سوريا و عراق، له‌ فلپينيش مه‌جموعه‌ى ئه‌بو سه‌ياف ئسلامى له‌و مه‌ردمانه‌ بوين ك لايه‌نگرى خوه‌يان ئه‌را ئه‌بو به‌كر ئه‌لبه‌غدادى سه‌ركرده‌ى ريكخرياگ داعش ئاشكرا كردن.

 

له‌ ماليزيا و ئه‌نده‌نوسيا ك گرينگترين وڵاته‌يل ئسلاميين له‌ڕوێ شماره‌ى موسڵمان، ريكخرياگ داعش مه‌يل ئه‌وه‌ ديرێد رۆڵ له‌تيان داشتوود و جوور ئه‌ركيگ بنه‌ڕه‌تى زانێده‌ى ك قه‌ناعه‌ت وه‌ موسڵمانه‌يل ئه‌و وڵاته‌يليشه‌ بارێد.

 

ئمجا دياره‌ گرينگترين وه‌ره‌قه‌يگ ك ريكخرياگ ترۆريستى داعش گره‌و له‌بانى ئه‌كا له‌ى وڵاته‌يله‌ ك ناويانن هاوريا، ئه‌وه‌سه‌ ك ئه‌و ريكخرياگه‌ توانايه‌يل خوه‌ى له‌تيان بوينێده‌و، هه‌ر وه‌و خاتريشه‌ دعايه‌ ئه‌كا له‌ڕى ئه‌نته‌رنێت و له‌ڕى شانه‌يل ترۆريستى خه‌فتگ ئه‌را ره‌سين وه‌و وڵاته‌يليشه‌.

 

Shafaq Live
Shafaq Live