كورد كۆبانی له داعش پاكه‌و كرد
ريدۆر خه‌ليل قسه‌كه‌ر وه‌ناو يه‌كه‌يل پاسه‌وان ملله‌ت كورد باس له‌وه كرد و وت: نزيكه‌ی هه‌يشت ئه‌ندام له ريكخرياگ داعش واينه وه‌ره‌و باكوور مه‌رزه‌يل توركيا له شوون ئه‌وه‌گ هيزه‌يل كورد پيشڕه‌وی كرديان وه‌ره‌و شار كۆبانی.
وه گووره‌ی هه‌واڵ ئاژانس روێته‌رز ك(شه‌فه‌ق نيوز)ئاگاداری بوی يه‌يش ده‌ركه‌فت ك هيزه‌يل كورد كۆبانی له داعش پاكه‌و كردگه‌و هيمان له بڕيگ له ناوچه‌يل شاره‌گه‌يش ئه‌گه‌ردنه شوون بڕيگ له ترۆريسته‌يل ك خوه‌يان له‌تی شاردنه‌سه‌و، يه‌يش وه‌و خاتره ك وه ته‌مامی بنبڕيان بكه‌ن.
بيجگه ئه‌وه‌يش چه‌ودير سووری ئه‌را مافه‌يل ئاده‌ميزاد وت: شه‌وانه هيزه‌يل كورد و سوپای توركی جه‌نگه‌يل جياجيايگ ئه‌نجام دانه وه‌ل ريكخرياگ داعش له‌باوه‌ت شار حه‌سه‌كه له باكوور خوه‌رهه‌ڵات سوريا له‌وه‌ختيگ ك ريكخرياگ تونڕه‌و ده‌سڵات له‌و ناوچه‌يله داشت.
چه‌دير سووری هه‌ميش وت: هيزه‌يل پاسه‌وان ملله‌ت خوه‌ندنگايگ ته‌قانه‌سه‌و ك زويتر له‌لايه‌ن ريكخرياگ ترۆريستی داعشه‌و هاورياويده كار جوور بنگه‌و دويكه‌ڵی له مه‌رزه‌يل توركياوه دوينريا له ئاسمان، يه‌يش دويای ئه‌وه‌گ داعش نزيكه‌ی ٢٠٠ هاووڵاتی مه‌ده‌نی كوشت له ناوچه‌گه.
ساڵ گوزه‌يشتيش كۆبانی بنگه‌يگ بوی ئه‌را يه‌كيگ له گه‌وراترين جه‌نگه‌يل دژ وه داعش، ك يه‌كه‌يل پاسه‌وان ملله‌ت كورد چه‌كداره‌يل داعش له‌تی راونان وه هاوكاری هاوپه‌يمان ناوده‌وڵه‌تی و هيزه‌يل ئاسمانی ئه‌مريكی دويای چوار مانگ له‌و جه‌نگ و ئابڵوقه.
هه‌ر وه‌و خاتريشه هيزه‌يل پاسه‌وان ملله‌ت ئه‌و په‌لاماره‌يله ئه‌را كۆبانی وه كرده‌وه‌ی خوه‌يكوشی تاريف كرد له‌لايه‌ن چه‌كداره‌يل ترۆريستی داعشه‌و نه‌ك جوور هه‌وڵ زاڵبوين له‌بان شاريگ.
له باكوور خوه‌رهه‌ڵات شاره‌گه‌يش داعش هه‌وڵ ئه‌وه ئه‌ياد ده‌سڵات حكومه‌ت له شار حه‌سه‌كه نه‌يليد، هه‌ر له‌وه‌ر ئه‌وه‌يش ته‌له‌فزيۆن حكومه‌ت سووری وت: شاره‌گه ئه‌مانه و كۆنترۆڵ كرياگه، وه‌لی چه‌ودير سووری ئه‌را مافه‌يل ئاده‌ميزاد وت: جه‌نگ وه‌رده‌وامه له باشوور خوه‌رئاواو باشوور خوه‌رهه‌ڵات.
حه‌سه‌كه جی گرينگيه ئه‌را گشت لايه‌نه‌يل جه‌نگكه‌ر ك ئه‌كه‌فێده ناو ئه‌و خاكه ك ريكخرياگ داعش له سوريا ده‌سڵات گرته‌سه بان فريه‌يگ له‌لی و ئه‌ڕه‌سيده مه‌رزه‌يل عراق و تا نزيك مه‌رزه‌يل توركيا.
ئی په‌لاماره‌يله توانای سوپای سووری تاقيه‌و ئه‌كا له‌و شاره‌يله ك حكومه‌ت زاڵه له بانيان له ديم خوه‌رئاوا، هه‌ر وه‌و خاتريشه قسه‌كه‌ر وه‌ناو يه‌كه‌يل پاسه‌وان ملله‌ت كورد ئاماژه وه ئه‌وه ئه‌كا ك هيزه‌يل حكومه‌ت سووری فريه په‌يوه‌سه بويه وه‌و شاره‌يله تا ئيسه‌و هه‌ر له‌وه‌ر ئه‌وه‌يش ريكخرياگ داعش ئه‌نجام په‌لاماره‌يلی له‌و شوونه‌يله داو نه‌ته‌وه‌يل يه‌كگرتگيش باس له‌وه كرد ك نزيكه‌ی ١٢٠ هه‌زار كه‌س مه‌ده‌نی له‌ترس داعش واينه‌و له‌و ناوچه‌يله وه‌ره‌و مه‌رزه‌يل.
حه‌سه‌كه به‌شبه‌شه‌و بويه ئه‌را ناوچه‌يل،ك هه‌ر يه‌ك له سوپای سووری و هيزه‌يل كورد ده‌سڵات له‌تيان ديرن، ئمجا ئه‌و ناوچه‌يليشه مه‌ردمه‌گه‌يان تيكه‌ڵه له‌ناونی عه‌ره‌ب و كورد و مه‌سيحی.
وه‌ل وه‌ل ئه‌وه‌يشا ريكخرياگ ترۆريستی داعش رووژ جومعه‌ی گوزه‌يشت تويه‌نست كه‌ميگ له حه‌سه‌كه نزيكه‌و بدێ و و تاڕاده‌يگ ده‌سڵات بگريده بان بنگه‌يگ سوپای سووری، وه‌لی په‌لاماره‌يل هيز ئاسمانی سووری سه‌ختی ئه‌را ئه‌و په‌لاماره‌يل دروس كرد جوور چه‌وديری سووری ئه‌را مافه‌يل ئاده‌ميزاد باسی كرد.
له‌ی باوه‌تيشه‌و نويسينگه‌ی ريكخستن كاروبار سه‌ر وه نه‌ته‌وه‌يل يه‌كگرتگ شايه‌تی له‌بان شماره‌يل حكومی دا و وت: هه‌ر له سه‌ره‌تای ده‌سوه‌پيكردن په‌لاماره‌يل ئه‌را بان شار حه‌سه‌كه نزيكه‌ی ١٢٠ هه‌زار كه‌س له‌ناو شاره‌گه و ئاوايه‌يل ده‌ورگردی كووچكردنه وه‌ره‌و ناوچه‌يل باكوور پاريزگاگه.
ج . أ
