كارگه‌ره‌يل ئيرانى له بازاڕه‌يل هه‌رێم كوردستان
شه‌فه‌ق نيوز/ له يه‌كيگ له دوڕيانه‌يل جاده‌يل سه‌ره‌كى له شار هه‌ولێر گه‌وراترين شاره‌يل هه‌رێم كوردستان عراق، كارگه‌ره‌يل ئيرانى ركابه‌رى ئه‌را سواربوين سه‌ياره‌يل بويچگ ئه‌كه‌ن، دوياى ئه‌وه‌گ فشاره‌يل له‌ئه‌نجام سزايه‌يل ئه‌مريكى ناچاريان كرد بچنه ئه‌وديم مه‌رز و بگه‌ردنه شوون بژيوى ژيانيان له عراق هاوساى وڵاته‌گه‌يان.
زوورم ئه‌و كورده‌يل كلاو نه‌نه سه‌ر و چانتايگ په‌ڕوين پيچانه‌سه خوه‌يانه‌وه‌و چه‌وه‌ڕێ ده‌سكه‌فتن هه‌ل كار ئه‌كه‌ن له بنايه‌كردن و كاره‌يل تر جياجيا.
روسته‌م(31 ساڵ)ك كارگه‌ريگ ئيرانيه له شار ئورميه‌وه له باكوور خوه‌رئاواى ئيرانه‌و هاتگه‌و ئويشێد: مه‌سه‌له‌گه ده‌سكه‌فتن كار نيه، به‌ڵكوو پويله‌گه هويچ قيمه‌تيگى نه‌مه‌ندگه له ئه‌نجام سزايه‌يل ئه‌مريكى ك بويه هووكار به‌رزه‌وبوين فريه‌يگ ئه‌را 52 له‌سه‌د دوياى ئه‌وه‌گ ريال ئيرانى نيمه‌ى قيمه‌تى له‌ده‌سدا له ماوه‌ى ساڵيگ.
روسته‌م ك باوگ دو مناڵه و ناو خوه‌ى وه ته‌واوى ئلشكرا نه‌كرد له‌وه‌ر ئه‌وه‌گ خيزانه‌گه‌ى تويش پرس وپرسكارى نه‌ون، وت: له كووتايى كاركردن رووژم ئه‌تويه‌نم مامريگ بسينم، وه‌لێ خيزانه‌گه هه‌وه‌جه وه چشته‌يل زياتر ديرن.
لاى خوه‌ييشه‌و، ره‌زا روستمى ئيرانى، ئه‌وه ده‌رخست ك رووژانه له‌ناونى 25 و 30 هه‌زار دينار په‌يا بكا(نزيكه‌ى 25 دۆلار)، ك يه‌يش وه بڕه پويل خاسيگ تاريف ئه‌كاو سێ ئه‌وه‌نه‌ى ئه‌وه‌سه ك له‌ئيران ده‌سى ئه‌كه‌فێد.
وه‌هه‌مان شيوه‌ى روسته‌م، كارگه‌ره‌يل تر ئيرانى روێ له هه‌رێم كوردستان ئه‌كه‌ن و ئه‌گه‌ردنه شوون كار ئه‌را بژيوى ژيان خوه‌يان و خيزانيان و وه ڤيزايگ گه‌شتيارى ئه‌را ماوه‌ى يه‌ك مانگ.
ئه‌و كارگه‌ره‌يل ئيرانيه ئه‌را ماوه‌ى 28 وه وه‌رده‌وام كار ئه‌كه‌ن و دوياى ئه‌و ماوه گله‌و ئه‌خوه‌ن ئه‌را ماڵه‌يليان وه مووڵه‌تيگ و هه‌وه‌جه‌يليگ ئه‌را خيزان و مناڵه‌يليان دابين ئه‌كه‌ن ك ئمڕوو له ئيران ده‌سكه‌فتنى ئاسان نيه.
له‌ى باوه‌ته‌و، عادل به‌كوان زاناى كۆمه‌ڵايه‌تى فره‌نسى عراقى، ئويشێد: ئه‌و كارگه‌ره‌يل وه‌شيوه‌ى وه‌ختييگ كووچ كردنه، ك نه‌ك ته‌نيا له‌وه‌ر دابينكردن هه‌وه‌جه‌يل له‌وه‌ختيگ ك وه‌به‌رهاوردن له هه‌رێم كوردستان عراق وه يه‌واشى ريچگه گرتگه، به‌ڵكوو جوور سه‌رچه‌وه‌يگ ئه‌را سامانه‌يليگ ته‌ماشايان ئه‌كريه‌ێد.
به‌كوان ئه‌را ئاژانس رووژنامه‌ى فره‌نسى وت: بيجگه ئه‌وه‌گ ئه‌و كارگه‌ره‌يله خه‌ريكن وه پيشه‌يليگ ئه‌رزان قيمه‌ت له‌ڕوێ رووشنهويرى و كۆمه‌ڵايه‌تى له كۆمه‌ڵگاى كورده‌وارى له عراق، ك نه‌فه‌قه‌ى ئه‌و كارگه‌ره‌يل ئيرانيه سه‌رچه‌وه‌ى ده‌خڵ دابين ئه‌كا.
ته‌نانه‌ت ئه‌گه‌ر له حاڵه‌تيگ ناچاريش كريان وه‌شيوه‌يگ ده‌ورى عراق بيلنه‌جێ، ئه‌وه له‌ى حاڵه‌ته ره‌زا و روسته‌م و كه‌سه‌يل تر وه گورجى و له كه‌متر له هه‌فته‌يگ گله‌و ئه‌خوه‌ن دوياى وچانيگ له‌لاى خيزانه‌يليان.
له هه‌ولێر، فريه‌يگ له كارگه‌ره‌يل له‌لاى خورشيد شه‌قڵاوه‌يى(ته‌مه‌ن 54 ساڵان) ژيه‌ن، ك 3 بنايه‌ى كويه‌ن كرده‌سه ئوتێل ئه‌را ئيقامه‌ى ئه‌و كارگه‌ره‌يل بيگانه.
شه‌قڵاوه‌يى ئويشێد: له وه‌رز پايز گوزه‌يشت، ته‌نيا 58 ميوان له كارگه‌ره‌يل ئيرانى له‌لام له ئوتێله‌گه وجوود داشتنه، وه‌لێ ئيسه 180 كه‌س و خانگ وه روێوه‌ر 9 مه‌تر چوارچووشه كرايه ئه‌كه‌ن و له‌هه‌ر خانگيگ 4 كه‌س دانيشێد و هه‌ر كه‌سيگ له‌ليان شه‌ويگ 3 دۆلار كرايه ئه‌يه‌ێد.
شه‌قڵاوه‌يى هه‌ميش وت: ئمڕوو گشت خانگه‌يل ئوتێله‌گه گيريانه‌سه كرايه‌و دى شوون نه‌يرێد ئه‌را وه‌رگرتن كارگه‌ره‌يل تر ئيرانى، يه‌يش له‌وه‌ختيگ ده‌سڵاته‌يل كوردستانى جه‌خت له‌وه ئه‌كه‌ن ئاماريگ ته‌واو ئه‌را ئه‌و كارگه‌ره‌يل ئيرانيه نه‌يرن ك هاتنه‌سه ناو مه‌رزه‌يل هه‌رێم كوردستان.
له فبرايه‌ر(شوبات)گوزه‌يشت، سلێمان ته‌ها ئيرانى روێ له عراق كرد و تابلۆيه‌يليگ بويچگ ئاژه‌ڵه‌يل فروشتياد له هه‌رێم كوردستان ك خاوه‌ن باوه‌ڕنامه‌ى زانكۆييه له بيركارى, ته‌ها ك 37 ساڵانه وه‌و كاره تويه‌نست مه‌عيشه‌ت خوه‌ى و خيزانى په‌يا بكا ك نيشته‌جێ پاريزگاى سه‌نه‌ندج خوه‌رئاواى ئيرانه و ئه‌كه‌فێده دويرى 300 كيلۆمه‌تر له‌شار هه‌ولێر و ئيسه‌يش مينه‌ى شوونيگ ئه‌كا ئه‌را پيشوازيكردن له دووس و قه‌ومه‌يلى ك مينه‌ى كار ئه‌كه‌ن وه‌هه‌مان شيوه‌ى ئه‌و.
سلێمان ته‌ها يه‌يش باس له‌وه‌يش كرد و وت: وه‌رجه سزايه‌يل ئى دوياخر ئه‌مريكا له‌بان ئيران، 3 جار له هه‌فته‌يگ گووشت خواردياێم، وه‌لێ ئيسه ته‌نيا يه‌ك جار له هه‌فته‌يگ ئه‌تويه‌نم گووشت بخوه‌يم.
دوياخريش سلێمان وت: ئه‌گه‌ر روێ له هه‌رێم كوردستان نه‌كرديايم ئه‌را مينه‌ى كار، نه‌تويه‌نستيايم وه ئاسانى بژيوى خيزانمان دابين بكه‌يم.
