سعوديه و عراق له‌ داوڕيان ئه‌را خاسه‌وبوين په‌يوه‌ندێ

سعوديه و عراق له‌ داوڕيان ئه‌را خاسه‌وبوين په‌يوه‌ندێ
2017-10-24T17:48:00+00:00

شه‌فه‌ق نيوز/ دسپيشخه‌ريه‌يل ده‌ركه‌فتن له‌ خاسبوين په‌يوه‌نديه‌يل سعوديه‌و عراق له‌ ماوه‌ى چه‌ن مانگيگ كه‌م گوزه‌يشت، وه‌و خاتريشه‌ حه‌يده‌ر عبادى سه‌رۆك وه‌زيره‌يل عراق دو جار له‌ى دوياخره‌ سه‌ردان سعوديه‌ كرد و گه‌شته‌يل ئاسمانييش له‌ ناونى هه‌ردوگ وڵات له‌ نوو ده‌سوه‌پيكرد و ده‌روازه‌ێ عه‌رعه‌ريش له‌ناونيان كه‌فته‌ كار.

 

په‌يوه‌ندى ناونى هه‌دروگ وڵات ئه‌را ماوى فيشتره‌ له‌ چاره‌كه‌ سه‌ده‌يگ وشكى و گرژى وه‌ خوه‌يه‌و دێ، وه‌لێ له‌ كووتايى يۆليۆ/ ته‌ممووز گوزه‌يشت سعوديه‌ پيشوازى له‌ موقته‌دا سه‌در پياو ئايينى شيعه‌ كرد، ك دياره‌ يه‌يش بويه‌ سه‌ره‌تاێ قوناغ تازه‌يگ له‌ په‌يوه‌ندى ناونى عراق و سعوديه‌.

 

وه‌ل ئه‌وه‌يشا قاسم ئه‌عره‌جى وه‌زير ناوخوه‌يى عراقيش له‌ هه‌مان مانگ سه‌ردان سعوديه‌ كرد و چه‌وێ كه‌فته‌ وه‌زير ناوخوه‌يى سعودى و له‌لايه‌ن مير محه‌مه‌د بن سه‌لمان وه‌لى عه‌هده‌و پيشوازى له‌لى كريا.

 

له‌و وه‌خته‌يليشه‌ ده‌نگدوو ئه‌وه‌ بوێ ك وه‌زير عراقى هه‌وڵ خاسه‌وكردن ناونى رياز و ته‌هران ئه‌ياد له‌بان داواكارى سعوديه‌ ئه‌را خاسه‌وبوين په‌يوه‌نديه‌يل ناونى ئه‌و هه‌ردوگ وڵاته‌ جوور ئه‌وه‌گ ئاماژه‌ وه‌پى كريا.

 

ئاشكرايشه‌ ك سعوديه‌ هه‌ڵويستيگ دژ وه‌ سياسه‌ت و چالاكيه‌يل ئيران له‌ ناوچه‌گه‌ برد ك ئه‌ويش هه‌ڵويستيگ خراو بوێ تاڕاده‌يگ جوور هه‌ڵويست دوناڵد ترامپ سه‌رۆك ئه‌مريكى.

 

په‌يوه‌نديه‌يل دبلۆماسى وه‌ل عراق له‌ساڵ 2015 ده‌سوه‌پيكرد و سامر ئه‌لسه‌بهان وه‌زير ده‌وڵه‌ت ئه‌را كاروبار كه‌نداو دامه‌زريا جوور باڵوێز له‌ عراق دوياى داوڕيان زياتر له‌ چاره‌كه‌ سه‌ده‌يگ ئى په‌يوه‌نديه‌يله‌ له‌شوون داگيركردن كوه‌يت له‌ ساڵ 1990 له‌لايه‌ن عراقه‌و.

 

له‌ يه‌نايه‌ر/ كانوون دويه‌م 2016، سعوديه‌ په‌يوه‌نديه‌يل دبلۆماسى خوه‌ێ وه‌ل عراق بڕێ وه‌ بوونه‌ێ په‌لامار خوه‌ينيشانده‌ره‌يل تويڕه‌ ئه‌را بان باڵوێزخانه‌گه‌ێ له‌ عراق له‌شوون ماوه‌ێ كه‌ميگ له‌ هاتنه‌وه‌ى په‌يوه‌نديه‌يل ناونى هه‌ردوگلا.

 

ئه‌ويش دوياى به‌رزه‌وبوين ده‌نگه‌يليگ بانگه‌وازكه‌ر هات ئه‌را قاوداين سامر ئه‌لسه‌بهان باڵوێز وه‌رين سعودى له‌ عراق وه‌ تومه‌ت ده‌خاڵه‌تكردنى له‌ كاروبار عراق و دوياى ئه‌وه‌گ وت عراق په‌نا وه‌ كه‌سايه‌تيه‌يل ئيرانى بردگه‌ له‌ جه‌نگ هاوردنه‌وه‌ێ فه‌لوجه‌ له‌ژير ده‌سڵات ريكخرياگ ترۆريستى داعش له‌ساڵ 2016.

 

وه‌ل ئه‌وه‌يشا په‌يوه‌نديه‌يل ناونى هه‌ردوگ وڵات زياتر له‌وه‌يش خراوتر بوى له‌ وه‌ختيگ ك سعوديه‌ نمر ئه‌لنمر پياو ئايينى شيعه‌ێ سعودى دا له‌سێداره‌ له‌ كانوون دويه‌م 2016 و به‌رپابوين خوه‌ينيشانداين تويڕه‌يانه‌ له‌ ئيران و عراق و لوبنان ئه‌را شه‌رمه‌زاركردن له‌سێداره‌داين ئه‌لنمر.

 

له‌ فبرايه‌ر/ شوبات 2017 عادل ئه‌لجبه‌ير وه‌زير خارجيه‌ێ سعودى سه‌ردان عراق كرد و ڕى خوه‌شكرد ئه‌را سه‌ردانه‌يل زياتر ناونى وه‌رپرسه‌يل هه‌ردوگ وڵات.

 

له‌ مارس/ ئادار 2017يش له‌ چوارچێوه‌ى سه‌ران عه‌ره‌بى ك له‌وڵات ئوردن ساز كريا، شا سلمان بن عه‌بدولعه‌زيز پاشاێ سعودى چه‌وێ كه‌فته‌ حه‌يده‌ر عبادى سه‌رۆك وه‌زيره‌يل عراقێ.

 

له‌ يۆنيۆ/ حزه‌يرانيش حه‌يده‌ر عبادى سه‌رۆك وه‌زير عراقييش سه‌ردان سعوديه‌ كرد و ريككه‌فتنيگ ئه‌نجام دريا له‌بان دامه‌زرانن ئه‌نجومه‌ن ته‌نسيقى له‌ ناونيان ئه‌را په‌ره‌داين وه‌ په‌يوه‌نديه‌يل ناونى هه‌ردوگ وڵاته‌گه‌.

 

له‌ ناوڕاس مانگ ئاب ئمساڵێش هه‌ردوگ وڵاته‌گه‌ ريككه‌فتن له‌بان وازكردن ده‌روازه‌ێ " عه‌رعه‌ر " له‌ناونى هه‌ردوگلا دوياێ به‌سيان 27 ساڵ.

 

بيجگه‌ ئه‌وه‌يش ريككه‌فتنيش له‌بان ده‌سوه‌پيكردن گه‌شته‌يل ئاسمانييش كريا له‌ناونى هه‌ردوگلا و يه‌كه‌م ته‌ياره‌ێ نه‌فه‌رهه‌ڵگر سعودى له‌ 18ى ئوكتۆبه‌ر/ ته‌شرين يه‌كه‌م 2017 له‌ ته‌ياره‌خانه‌ێ ناوده‌وڵه‌تى به‌غدا نيشته‌و.

 

ئى سه‌ردان عبادييشه‌ ئه‌را سعوديه‌ له‌ ئوكتۆبه‌ر/ ته‌شرين يه‌كه‌م وه‌خاتر بته‌وكردن ريڕه‌و په‌يوه‌نديه‌يل ناونى هه‌ردوگ وڵاته‌ ك خاسه‌وبوين وه‌رچه‌وه‌يگ وه‌پيه‌و دياره‌.

Shafaq Live
Shafaq Live