زیندانەیل داعش لە ئەنبار.. دیوارەیل رخبردن رەنگەو دەن
شەفەق نیوز/ هەرچەن یە چەن ساڵیگە شارەیل پارێزگای ئەنبار لە خوەرئەڵات عراق رزگار کریانە، باوجی شۊن و رمیاگەیل جەنگەگە هیمان فرە لە سیمایل زیڕە و رخ و شکەنجە و تەرمەیل خەێدە هۊر مەردمەگە، وەتایبەت ئەو زینداەیلە ک داعش کردیانە شۊنیگ ئەرا شیوەیل جوراوجور شکەنجە لەبان ئەوانەگ وەبان باوەڕ وبڕیارەیلیان نەچگن، هەنای ریخریایەگە داگیر پارێزگاگە کردۊید.
قەسر شەباب، و ئەو مەیدان ئارامە لە قەزای رەمادی، و پەیمانگەی هونەرە جوانەیلە لە قەزای فەلوجە، لە زاقترین زیندانەیل داعش بۊین، ک بڕێ لە خوەیبەخشەیلە وە هاوکاری ریخریاگە ناودەوڵەتی و هەرێمیەیلە، ئەو زیندانەیلە کردنە شۊنەیلیگ ئەرا شیوەکاری و مۆسیقا و هووکارەبۊین.
ئیبراهیم عەوسەج قایمقام قەزای رەمادی ئۊشێد: شار رەمادی وەشیوەی گشتی، زیندانیگ بۊی ئەرا ریخریاگ داعش تیرۆریست، ک فرە لە بینایل حکومەتی کریانە زیندان و شۊن لێکوڵینەوە، و یەکیگ لەی شۊنەیلە وەپی ئۊشن قەسر شەباب، و هەنای ئەرا شارەگە گلەو خواردیمن، نووڕیمن نیمیگی رمیاگە.
لە قسەیلی ئەرا ئاژانس شەفەق نیوز وتیش: دووارە بیناگە خاسەو کریا، وەرێککەفتن وەرد ریخریایە ناودەوڵەتیەیلە، تا بوودە ناوەندیگ ئەرا مۆسقا و هونەری جه‌وانه‌یل، وە پاڵپشتیکردن تایبەتیگ لەلایەن نەتەوە یەکگرتگەیل واز کریا.
عەوسەج وتیش " ئیمە وەگورەی پلان لەناوبردن داعش و هۊرەیلی و جیماگەیلی کار کەیمن ک لە ماوەی گوزەشتە زیان لەلی دیمن، باوجی ئمڕوو دەسکردیمنە خاسەوبۊین لەوە، و رەسیمنە رووژیگ خاستر لە ئاڵشتکردن هۊرەیلە، ک ئمڕوو هیشت رەمادی بنیشێدە بان تەخت ئاوەدانی لە ئاست عراق، و گلەوداین رەمادی ئەرا شاریگ شارستانی ، یەکەم جار وە رەنج خەڵکەگەی ئیجا حکومەت.
لەکۆتایی قسەیلی وتیش: بیناکردن ئنسان گرنگترین بنەمایل ئاوەدانیە، ئەراوە وەشیوەی گەورەیگ زوور لە کار ئاڵشتکردن هۊر کەیمن، و گلەوداین قەسر شەباب ئەرا جارانی یەکیگە لەی ئەنجامەیلە و ئەنجامەیلیگ تر هەس ک وەی نزیکە کەفنە وه‌ر رووشنایی.
لەیس خەتیب وەرپرس رووبەر ئارام لە ئەنبار ئۊشێد " شۊنەگە شۊن گردەوبۊن وەرزشوانەیل و کەسەیلیگ سەروە وەزارەت گەنجه‌یل بۊی ک هاتنەسە ئەنبار، و لە ساڵ ٢٠١٢ واز کریا، و وەشیوەی خاسیگ گورجەو نەکریا لەوەر زاڵبۊن ریخریاگ داعش تیرۆریست لەبان پارێزگاگە لە ساڵ ٢٠١٣، ک کردنەی بارەگایگ ئەرا جیوەجیکردن کارەیل تیرۆریستیان، و دۊیای رزگارکردن شارەگە، کریا کامپیگ سەربازی ئەرا یەکیگ لە فەوجەیل فریاکەفتن سەروە وەڕێەوبەرایەتی پۆلیس ئەنبار، و دۊیای ساڵ ٢٠١٧ کەم کەم چووڵی کردن.
خەتیب لە قسەیلی ئەرا ئاژانس شەفەق نیوز وت: ئەو مەوقە جۊر خوەیبەخشی کار کردیمن، و داوا لە حکومەت خۆجێی کردیمن ری وەپیمان بەێد تا وەبان خەرج خوەمان بیناگە خاسەو بکەیمن، و چشتەیلیگ بخەیمنە ناوی ئەرا خوەنستن وەپەتی، وەخاتر پشتگیریکردن خیزانە نەدارەیل، و وەزارەتەگە رەزامەنی وەپیمان دا، و لە ساڵ ٢٠١٨ یەکیگ لە ریخریایەیل سەروە سەندووق نەتەوە یەکگرتگەیل وە پۊل کەمیگ پاڵپشتیمان کردن تا خاسی بکەیمن.
وتیش: لە سەره‌تا کارەگە تەنیا لەبان خولەیل سەرەکی بۊی، ئیجا رەسیە بیناکردن ئاشتی و گەشەکردن توانایل و بەرنامەیل تواناسازی و فریاکەفتن تەندروسی ئیجا رەسیە شانۆ و بەش تایکواندۆ و بەشەیلیگ تر لە وەرزش.
خەتیب دیاری کرد ک هۊر مەیدانە ئارامەگە چشت دەگمەنیگە ک لە شۊنەیلیگ تر جیوەجی نەکریاگە، و ناوەگە ئەوە نشان دەێد ک شۊنەگە وەدەس ئیدارەیگ لە گەنجەیل وەڕیەو چوود، و یە چوار ساڵە حکومەت لە هۊچ لایگ چ هونەری بوود یا ئیداری دەس نەیاسە وەر، چۊنکە هۊر شۊنەگە ئەوەسە ک تو پۊلیگ نێخوازێ تا چشتیگ بکەێ شارەگە وەپی شاد بوود، و هەمیش خوەیبەخشەگە وەهۊچ وەختیگ دەسپاچە نەۊیە باوجی هەر وەختیگ بخوازێد ئامادە بوود.
لە قەزای فەلوجە، ریخریاگ داعش چەن ماڵیگ و شۊنەیلیگ حکومەتی و گشتی کردە زیندان ئەرا شکەنجەدان ئەوانەگ وەگورەی باوەڕ خوەیان نیین، و شایەت گرنگترین ئەو شۊنەیلە، پەیمانگای هونەرە جوانەیلە بوود، ک وەچەودیەیلیگ باس ئەوە کەن ک ئەو شۊنە پڕ بۆی لە تەرم و شۊن خۊینین بیگوناهەیلیگ لەیرا وەدەس داعش شکەنجەیان دریان.
شیوەکار موستەفا جومەیلی ک یەکیگە لە ماموستایل پەیمانگاگە ئۊشێد: هەنای ئەرا فەلوجە گلەو خواردیمن، دۊیای دەرکردن داعش لە شارەگە، و دەسکردیمنە کارە گرنگەیلە لە نیشتەجیبۊن و کار فەرمانبەری، و لە دەسکردنم وەکارم جۊر ماموستایگ لە پەیمانگای هونەرە جوانەیلە، و هەنای لەناوی گەردیمن، چاڵیگ پەیا کردیمن نزیکەی ١٥٠ سانتیمەتر قۊیل ك نزیکەی ١٦ تەرم لەناوی بۊی.
جومەیلی لە قسەیلی ئەرا ئاژانس شەفەق نیوز وتیش: تیمیگ پزشکی وەگەرد هێزە ئەمنیەیلە ئەو وەختە تەرمەیلە دراوردن، و لە بان ئەوە، ئیمە لە ئیدارە و مامووستایلە پەیکەریگ ئەرا ئەو کوشتارە کردیمن، جۊر کەمترین وەفاداری ئەرا ئەو قوربانیەیلە.
