ركابه‌رى شاژن جوانى عراق تويڕه‌ى تونڕه‌وه‌يل ئه‌كا

ركابه‌رى شاژن جوانى عراق تويڕه‌ى تونڕه‌وه‌يل ئه‌كا
2015-09-29T12:42:31+00:00

له‌ قه‌ره‌بوو ئه‌و كاره‌يله‌ ريكخه‌ره‌يل ركابه‌ريه‌گه‌ تويش تويڕه‌يى فريه‌يگ سه‌ركرده‌يل تونڕه‌و ئايينى و سه‌ركرده‌يل هووزه‌يل ئه‌يه‌ن و ئويشن له‌يوا ركابه‌ريه‌يليگ چه‌واشه‌ى ريڕه‌و ئسلامه‌و هه‌ڕه‌شه‌ له‌ ئه‌خلاق گشتى ئه‌كا.

وه‌لاى كه‌مه‌و دو دويه‌ت خوه‌يان له‌ى ركابه‌رى شاژن جوانيه‌ كيشانه‌و دوياى هه‌ڕه‌شه‌كردن له‌ليان وه‌كوشتن، ك ريكخه‌ره‌يل ركابه‌ريه‌گه‌يش بڕگه‌ى نمايشكردن جنگ مه‌له‌كردن لاوردن و زوى كووتايى وه‌ وتار ته‌له‌فزيۆنى هاوردن له‌ هه‌وڵيگ ئه‌را كه‌مه‌وكردن ره‌خنه‌يل.

وه‌ل له‌ هه‌مان وه‌خت ريكخه‌ره‌يل و زوورم دويه‌ته‌ ركابه‌ره‌يل مكوڕن له‌بان هاوردنه‌وه‌ى ژيان ئه‌را سروشت خوه‌ى له‌ كومه‌ڵگايگ ك هيمان دابه‌ش بويه‌ له‌ناونى چين جياجيا، وه‌تايبه‌ت ك ناڵنێد وه‌ده‌س هه‌ڕه‌شه‌و تون وتيژى له‌شوون 12 ساڵ له‌ رميان رژيم وه‌رين.

له‌ى باوه‌ته‌و، سينان كامل قسه‌كه‌ر وه‌ناو ركابه‌ريه‌گه‌ و يه‌كيگ له‌ داوه‌ره‌يلى، وت: ئاماژه‌يل فريه‌يگ جوود ديرێد ئه‌را كووتاييهاتن عراق، وه‌لى له‌يوا ركابه‌ريه‌يليگ ئومێد ئه‌وه‌ ئه‌ياد ك ژيان وه‌رده‌وامه‌ له‌ عراق.

ريكخه‌ره‌يل باس له‌وه‌يش كردن ك هه‌وڵ ئه‌وه‌ دانه‌ ئه‌و بڕگه‌و به‌نده‌يل شيواز ركابه‌رييشه‌ دويره‌و بخه‌ن ك ناگونجيه‌يد وه‌ل نه‌ريته‌يل وڵاتيگ ئسلامى مقه‌يه‌تكار جوور نمايشكردن جه‌سه‌ى دويه‌ته‌يل وه‌ ئاشكرا، ئه‌را نموونه‌: جنگه‌يل بان ده‌ريا وه‌ جنگه‌يل تر پووشته‌تر ئالشت كردنه‌.

كامل وت: ئه‌و ريكخه‌ره‌يله‌ ئه‌گه‌ر مقه‌يه‌تى له‌ په‌يمانه‌سازيه‌يل نه‌كه‌ن ناتويه‌نن ره‌زامه‌نى به‌شداريكردن له‌ ركابه‌ريه‌يل ناوده‌وڵه‌تى بارنه‌ ده‌س، وه‌لى بيگومان ناڕه‌سنه‌ قوناغ له‌وه‌ركردن جنگه‌يل ده‌ريا.

له‌ى باوه‌تيشه‌و په‌خش ته‌له‌فزيۆنى ئاهه‌نگ كووتايى ك كه‌ناڵ ئه‌لمه‌دى گرته‌ى خوه‌ى وسيا، ك بريار بوى وه‌ ته‌مامى نمايش بكريه‌ێد، وه‌لى له‌وه‌ر هه‌ڕه‌شه‌ى سه‌ركرده‌يل هووز ك ناڕازى بوين له‌ به‌شدارى دويه‌ته‌يل له‌ خيزانه‌يليان له‌و ركابه‌ريه‌ وه‌ ته‌مامى بڵاو نه‌كريا.

هه‌ر وه‌و خاتريشه‌ ركابه‌رى شاژن جوانى جريوه‌ى خوه‌ى له‌ده‌سدا له‌ ده‌وڵه‌ته‌يل خوه‌رئاوا، ك مه‌ردمان فريه‌يگ وه‌ ئيهانه‌يگ ئه‌را ژنه‌يل زاننه‌ى، وه‌لى له‌ عراق ئوميديگ هه‌س له‌ ئاڵشتبوين كومه‌ڵگا ئه‌را وازبوين فيشتر.

له‌ سه‌رده‌م رژيم وه‌رين يانه‌يل شه‌وانه‌ و دوكانه‌يل مه‌يفرووشى تا شه‌وه‌كى واز بوى، وه‌لى هويچ پياويگ ئايينى جورئه‌ت ئه‌وه‌ نه‌كرد كاريگه‌رى گه‌ورايگ له‌بان كومه‌ڵگا دابنه‌ێد، وه‌لى له‌ شوون رميان ئه‌و رژيمه‌ له‌ 2003 تون وتيژى له‌ناونى شيعه‌و سونى په‌يا بوى و ريكخرياگ ترۆريستى زاڵ بويه‌ سێكوتى عراق وباوه‌ڕيان ئه‌وه‌سه‌ ك ژن بايه‌سه‌ پووشه‌ بدێ وه‌نا تويش پيسترين سزا ئه‌يه‌ن و ئه‌ڕه‌سيده‌ مردن.

لوبنا حامد ك ته‌مه‌نى 21 ساڵانه‌، وه‌ل گشت ئه‌و تون وتيژى و نواگيرييشه‌ خوازيار به‌شداريكردنه‌ له‌و ركابه‌ريه‌ و ئوميده‌واره‌ بدێده‌ نموونه‌يگ ئه‌را ئافره‌ته‌يل عراقى و باس له‌وه‌ كرد ك هه‌وڵ ئه‌وه‌ ئه‌ياد گشت ره‌خنه‌يليگ بخاده‌ پشتگووش، چوينكه‌ وه‌قسه‌ى خوه‌ى نوێنه‌رايه‌تيكردن وڵاته‌گه‌ى شانازيه‌ ئه‌ڕاى.

هه‌ر له‌ى باوه‌تيشه‌و/ هه‌مسه‌ خالد 18 ساڵان ئه‌وه‌ ده‌رخست ك هويچ هه‌ڵويستيگ دژايه‌تى بيبه‌شى ناكا له‌ به‌شداريكردن و وت: ئه‌و په‌يامه‌ ك خوازياره‌ بڕه‌سێد ئه‌و ناسناوه‌سه‌ ك عراق بارێده‌ ده‌س وه‌ناو ئاشتى.

جى باسه‌، وجدان بورهانه‌دين يه‌كه‌مين و دويا دويه‌تيگ عراقى بوى ك به‌شدارى ركابه‌رى ناوده‌وڵه‌تى گه‌وريگ شاژن كرد ئه‌را وه‌ده‌سهاوردن شاژن جه‌هانى، دى له‌وسا تائيسه‌ يانه‌يل شه‌وانه‌ له‌ وه‌خته‌يل جياجيا ئى ركابه‌ريه‌ ئه‌نجام ديان، وه‌لى وه‌ل فراوانبوين به‌شدارى و ڕيداين له‌ لايه‌ن حكومه‌ته‌و عراقيش ئوميده‌واره‌ له‌ى ركابه‌ريه‌ ناو داشتوود و سه‌ركه‌فتن وه‌ده‌س بارێد ئه‌را ركابه‌رى ناوده‌وڵه‌تى.

Shafaq Live
Shafaq Live