دويه‌تيگ ئێزيدی تكای له‌ناوبردن داعش ئه‌كا له ئه‌نجومه‌ن ئاسايش
ناديه موراد، ك ته‌مه‌نی ٢١ ساڵانه، له‌وه‌رده‌م يه‌كه‌مين دانيشتن ئه‌نجومه‌ن ئاسايش ك له‌باوه‌ت كيشه‌ی بازرگانيكردن وه دويه‌ته‌يل ژنه‌يل ساز كريا وت: ئی ده‌سدريژكردنه وه‌خاتر سووكايه‌تيكردن وه دويه‌ت وژنه‌يل وه‌كار هاورياگه تا جاريگتر ژنه‌يل نه‌تويه‌نن مه‌شق ژيان سروشتی خوه‌يان بكه‌ن و له هه‌مان وه‌خت داوايش له ئه‌نجومه‌ن ئاسايش كرد و وت: تكا له‌ليدان ئه‌كه‌م داعش له‌ناو بووه‌ن.
موراد باس له‌وه‌يش كرد و وت: ئه‌و ريكخرياگ ياخيه ك ده‌سڵات گرته‌سه بان رويوه‌ر فراوانيگ له عراق و سوريا له‌يوا كرد ك دويه‌ت و ژنه‌يل ئێزێدی جوور گوشت سه‌ندن و فرووشتن وه‌پيان بكريه‌ێد.
يه‌يش ده‌رخست ك له مانگ ئاب گوزه‌يشت له ناو ئاوايه‌گه‌ی خوه‌ی له عراق رفياگه‌و جيواز كرياگه ئه‌را ناو باڵه‌خانه‌يگ له موسڵ ك بنگه‌ی ريكخرياگه‌گه بويه‌و تونڕه‌وه‌يل له‌تی ئاڵشت وئوڵشت دويه‌ت و ژنه‌يل ئێزيدی كرديان جوور خه‌ڵات ئه‌را يه‌كتری.
موراد ئاماژه وه‌يه‌يش كرد و وت: دويای چه‌ن رووژيگ ك پيشكه‌ش كريامه پياويگ، ناارم كرد جنگ له‌وه‌ر بكه‌م و ماكياژ بيه‌م و له‌و شه‌و رخه‌وبه‌ره ده‌سدريژی كرده بانم و ناچارم كرد بوومه به‌شيگ له گرووپه سه‌ربازيه‌گه‌ی و گشت رووژيگ ده‌سدريژی له‌وه‌رانوه‌رم ئه‌نجام دياد و منيش هه‌وڵ واين دام، وه‌لێ پاسه‌وانه‌يلی دوباره ده‌سگيرم كردن و ئه‌ويش جاريگتر وه‌شكيا پيمه‌وه‌و يزام دا و داوا له‌ليم كرد خوه‌م ڕويته‌و بكه‌م و خسته‌مه ناو غورفه‌يگ وه‌ل پاسه‌وانه‌يل و ئه‌وانيش وه‌رده‌وامی دانه ئه‌و تاوانه‌يله.
موراد يه‌يش نه‌شارده‌و ك بڕيگ له برايه‌يلی له‌لايه‌ن ئه‌و ريكخرياگ ترۆريستيه‌و كوشيانه‌و ئاماژه وه‌يه‌يش كرد ك دوياخر ده‌رفه‌ت ئه‌ڕای هه‌ڵكه‌فتگه‌و وايه له ده‌سيان و ئيسه له ئه‌ڵمانيا ژيه‌ێد.
له‌ی وه‌ختيشه گشت ئه‌وانه‌گ ك له‌ناو دانيشتن ئه‌نجومه‌ن ئاسايش ئاماده بوين وه‌گشت دڵيگه‌و ده‌سكردنه چه‌پڵه‌داين ئه‌را ناديه موراد.
ئمجا نه‌ته‌وه‌يل يه‌كگرتگيش باس له‌وه كرد و وت: له‌وه‌ر ئه‌وه‌گ ئه‌و ريخرياگه ئی تاوانه‌يل وه‌جه‌مه ئه‌نجام داگه‌و هه‌وڵ له‌ناوبردن كه‌مينه‌ی ئێزيدی وه‌ی شيوازه داگه، داوا كرد مه‌سه‌له‌گه هه‌واڵه‌ی دادگای تاوانه‌يل باڵای ناوده‌وڵه‌تی بكريه‌ێد.
ئه‌نجومه‌نه‌گه له به‌ياننامه‌يگ داخداری خوه‌ی ده‌رخست له‌وه‌رانوه‌ر ئه‌و كرده‌وه‌يله ك ريكخرياگ ترۆريستی داعش و گرووپه‌يل تر جوور سوپای ئه‌لڕه‌ب و بوكو حه‌رام ئه‌نجامی ئه‌يه‌ن له‌باوه‌ت بازرگانيكردن وه ئاده‌ميزاد.
ئه‌نجومه‌ن ناوبرياگ يه‌يش ده‌رخست ك بڕيگ له‌و كرده‌وه‌يله ك په‌يوه‌سه وه بازرگانيكردن وه ئاده‌ميزاد له‌ژواريوه‌ی كيشمه‌كيش چه‌كداری شايه‌ت تاوان جه‌نگ له‌لی بكه‌فێده‌و.
له‌لايگ تريشه‌و، تونڕه‌وه‌يل داعش باوه‌ڕيان ئه‌وه‌سه ك ئێزيديه‌يل شه‌يتان په‌رسن، وه‌ل ئه‌وه‌يشا هيمان زوورم ئێزيديه‌يل ك شماره‌يان نزيكه‌ی نيم مليۆن كه‌سه له‌ناو كه‌مپه‌يل ژيه‌ن له هه‌رێم كوردستان له باكوور عراق.
له هه‌مان وه‌خت چالاكوانه‌يليش باس له‌وه ئه‌كه‌ن ك له‌ناونی ئه‌و ٥٠٠٠ ئێزيدييشه له ژنه‌يل و پياگه‌يل ك كه‌فتنه‌سه ده‌س تونڕه‌وه‌يل داعش له تاوسان ٢٠١٤ تائيسه نزيكه‌ی ٢٠٠٠ له‌ليان واينه‌و ئه‌و باقيه‌گه‌يان هيمان وه ديلی مه‌ندنه له‌ژير ده‌سڵات ئه‌و ريكخرياگه.
