٤٥ ڤیدیۆ کولتوور و فۆلکلۆر ئێزدیەیل کەێدە بەڵگە

 لە راپۆرتیگ کە ئاژانس شەفەق نیوز ئەڵگەردانی کرد، ئاژانسە ئەمریکییەگە راگەیانیە کە پاڵپشتییگ بەخشندەی دارایی ئەرا ئەو پڕۆژە کردیە کە لە لایەن "ریخریاگ یەزدا" ئەرا بەرهەمهاوردن زنجیرە وینەکریایەگە وە ئامانج مقیەتیکردن میرات کولتووری ناوازە و بی نرخەگەی کۆمەڵگەی ئێزیدی، بیجگە لە وەرەونوابردن هوشیاری جەهانی و دروسکردن پەیوەندییگ لە ناوەین کولتوورەیل، وتیش؛ "یەزدا" لە 13ی تەمووز نمایشکردن ڤیدیۆەیلی لە پارێزگای دهۆک راگەیان.

ئاژانسەگە لە راپۆرتەگەی باس لەوە کرد ک “یەزدا” تا ئیسە بڕیگ 10 کلیپ ڤیدیۆیی بڵاو کردیە کە ئەرا نووڕستن ها وەردەس لە هەردوگ ماڵپەڕ فەرمی و کەناڵ یوتیوب، وتیش؛ “یەزدا” وەردەوام بوود لە بازاڕخستن دوو ئەڵقەی نوو گشت رووژەیل سێشەممە و پەنجشەممە لە هەفتەگە تا گشت کلیپەیل ڤیدیۆ ٤٥ بڵاو کەیمن، کە گەشتیگ نوقمکەر ئەرا تەماشاکەرەیل وەرەو ناو کەلتوور ئێزیدی دروس کەێد.

لەی باوەتە، ئیلیس جێنسن، وەڕیەوبەر نوێنەرایەتی USAID لە عراق راگەیان؛ وەپەی راپۆرتەگە، "ئی گورانی و چیرووک و سەمایلە گشتیان بەشیگ دانەوڕیایین لە کولتوور ئێزیدیەیل، و بەڵگەنامەکردن ئەو چالاکییەیلە لە ری ڤیدیۆ، چەویگ وە جەهان بەخشێد ئەرا ئی کولتوورە ناوازانەیلە". 

جێنسن باس ئەوەیش کرد ک دەزگای ئەمریکا ئەرا گەشەپیدان ناودەوڵەتی شانازی کەێد وە هاوبەشیکردنی وەگەرد ریخریاگ یەزدا و هاوپەیمانی ئاسەواری لە عراق، ئەرا چاشیان ئێزیدییەیل لەبان هونەر فیلمسازی، هەرلیوا ئەرا دابینکردن ئامرازیگ کە بتوەنن یادیگ میراتەیل بکەنەو، و لە سەرانسەر جەهان وەردەسی بخەن. راپۆرتەگە لە زوان ئیسماعیل عیسا، وەڕیەوبەر پرۆژەی مقیەتیکردن رووشنهویری لە یەزدا، کە سەردەم مناڵی خوەی هاوردە یاد، ئویشێد: تا ئیسەیش وە رووشن ئەو ئیوارانەیلە لە هویرمە کە لە ماڵ داپیرەم، و گووش دیام لە چیرووک دڵرفنی، هەرچەن ئەرام سەختە ک گشت هویردەیل لەهویرم بوود، مقیەتیکردن ئی گەنجینەی فۆلکلۆری وەنرخە خزمەتیگ کۆمەڵایەتی بی نرخە”.

وە قسەی پیتەر هێردیک، هاودامەزرێنەر هاوپەیمان ئاسەواری: "یە پڕۆژەیگ داهێنەرانەس، ک  داتابەیسیگ ناوازە لە گرتە ڤیدیۆییەیل کۆمەڵگەی ئێزیدی دابین کەێد"، و ئویشیدیش "وە بەڵگەنامەکردن کولتوور ئێزیدی هیلێد وەشیوەیگ دیجیتاڵی مقیەتیی بکەیمن ئەرا نەوەیل بانان". "

لە کۆتایی ڕاپۆرتەگە باس لەوە کریا  کە توەنن لە ماڵپەڕیگ فەرمی ریخریاگ "یەزدا" لە www.yazda.org تەماشاکەر زنجیرە ڤیدیۆگە بوین یا لەبان ئی لینک خوارەو: www.youtube.com/@yazda6461/v کەناڵ یوتیوبەگەیان بگەردین.