جنان باس مه‌ويسی خوه‌ی ئه‌كا له بازاڕ داعش
دويای وه‌سه‌رچگن فيشتر له ساڵيگ له‌بان ئه‌و مه‌ويسيه ك هاته تويش ئێزيديه‌يل له عراق له‌بان ده‌س ريكخرياگ داعش، پيشبينی ئه‌وه ئه‌كريه‌ێد ئی كتاوه له فره‌نسا ده‌ربچێد و ناونيشان "ڕق له‌لای داعش" ك باس له حكايه‌ت دويه‌ت جايه‌ڵيگ ئێزيدی بكا ك له دوزه‌خ ريكخرياگ داعش ژياگه.
ئه‌و كتاوه ك له‌لايه‌ن ده‌زگای "فايار"ه‌و ده‌رئه‌چێد باس له مه‌ينه‌تيه‌يل جنان جايه‌ڵ جوان ئێزيدی ئه‌كا ك ته‌مه‌نی ١٨ ساڵانه، ك باس له‌و مه‌ينه‌تيه‌يله ئه‌كا هاتنه‌سه تويشی و تويش شماره‌ی فريه‌يگ له دويه‌ته ئێزيديه‌يل تر دويای ئه‌وه‌گ كه‌فتنه‌سه ده‌س چه‌كداره‌يل داعش.
ئى دويه‌ت جايه‌ڵه ك له‌ده‌س ئه‌و ريگخرياگ ترۆريستيه وايه‌و ئيسه له كه‌مپ په‌نابه‌ره‌يل ژيه‌ێد له عراق باسه‌گه‌ی پڕ له‌ژانه وه‌ل دويه‌ته‌يل تر له بازاڕه‌يل داعش تونڕه‌و، وه‌ل ئه‌وه‌يشا باس له چوينێتی جيوازبوينی ئه‌كا له ماوه‌ی سێ مانگ ده‌سوه‌سه‌رگرتنی له عراق له كووتايی ساڵ ٢٠١٤ له زيندانه‌يل ئه‌و ريكخرياگه وه‌رجه واينی له شه‌ويگ له شه‌وه‌يل وه تيه‌ركی.
جنان ئويشێد: دويای ئه‌وه‌گ جيواز كريام له‌ناونی چه‌ن زيندانيگ له موسڵ، پۆليسيگ وه‌رين و ئيمام مزگفتيگ سه‌ندنه‌م وه‌ل بريگ له دويه‌ته ئێزيديه‌يل تر له ماڵيگ زيندانی كريام، باس له‌وه‌يش ئه‌كا ك بيجگه سزاداين ناچاريش كريانه وه زوور ك بانه بان ئايين ئسلام و ئه‌گه‌ريش ئه‌و كاره ره‌ته‌و بكردان ئه‌وه سزای فيشتر ئه‌دريان و ناچاريش كريانه له‌وه‌ر خوه‌ر بووسن و له‌و ئاوه‌يل پيسه بخوه‌ن ك مويش له‌تی مه‌له كردياد و له هه‌مان وه‌خت هه‌ڕه‌شه‌ی سزاداين وه كاره‌بايش له‌لی كرياگه.
جنان باس له‌وه‌يش كرد و وت: ئه‌و پياوه‌يله به‌شه‌ر نيين و له مردن بتارزيه‌ێد فكر له چشتيگ تر ناكه‌ن و وه‌رده‌واميش حه‌ز له مادده‌يل بيهووشكه‌ر ئه‌كه‌ن ئه‌را ئه‌وه‌گ ئنتقام له مه‌ردم بكه‌ن وه‌پی و جه‌خت له‌وه‌يش ئه‌كه‌ن ك بايه‌سه دوڵه‌ت ئسلام حوكم گشت جه‌هان بكا.
جنان ك گه‌شت پاريس كرد له ماوه‌ی گوزه‌يشت وه‌ل هاوسه‌ره‌گه‌ی ك دويای گرتنی دوباره يه‌كه‌و گرتن، له باسه‌گه‌ی ئويشێد: له موسڵ جيواز كريايم ئه‌را ساڵه‌ی پيشوازی فراوانيگ ك عاموده‌يل فريه‌يگ له‌تی بوی وه‌ل ده‌يان ژنه‌يل تر، ئمجا چه‌كداره‌يل وه‌لامانا گوزه‌ر كرديان و نوكته وتيان و ده‌س ديان له جه‌سه‌مان و يه‌كيگ له‌ليان وتياد: من دويه‌تيگ ئێزيدی روخسار چه‌رمگ و چه‌وكه‌و ئه‌خوازم و ئه‌گه‌ر يه‌كيگ وه‌ی شيوازه بوينمه‌و ئاماده‌م هه‌رچی پويل بتوان بيه‌مه‌ی.
جنان ئويشێد: كابرايگ له‌ليان هات بوه‌يده‌مان ئه‌را يه‌كيگ له چه‌كداره‌يل ئه‌و ريكخرياگه‌و وته يه‌كيگ تر ده‌مانچه‌گه‌د بيه‌پيم ئی ده‌مچه‌و گه‌نميه ده‌مه‌پێد، وه‌لی ئه‌گه‌ر بتوايد وه پويل نه‌خت بسينيده‌ی ١٥٠ دۆلار له‌لێد ئه‌خوازم و ئه‌تويه‌نيديش وه دينار عراقييش بسينێده‌ی.
ئی دويه‌ته جايه‌ڵ ئێزيديه باس له‌وه‌يش ئه‌كا ك له بازاڕ ڕق چه‌وی كه‌فته‌سه مه‌ردمان عراقی و سووری و بيگانه‌يش له‌وه‌ختيگ ك نمايشی كردنه ئه‌را فرووشتن، وه‌لی له هه‌مان وه‌خت باس له‌وه‌يش ئه‌كا ك دويه‌ته‌يل جوان و ڕه‌نگين فرووشيه‌نه مه‌ردم كه‌نداو، چوينكه پويل فيشتر ئه‌يه‌ن ئه‌را سه‌ندنيان.
جنان له كووتايی قسه‌يلی ئويشێد: ئه‌گه‌ر گله‌و خوه‌يم ئه‌را ئاوايه‌يل خوه‌مان، ئه‌وه بيگومان سه‌رله‌نوو ئه‌دێمنه قورانی تازه‌ی كوشتار و ته‌نيا چاره‌سه‌ريش ئه‌وه‌سه له ناوچه‌يليگ بژيه‌يم له‌ژير چه‌وديری و مقه‌يه‌تيكردن ناوده‌وڵه‌تی بدێ.
