ترس له غورفه‌ى په‌يجوورى و مه‌رگ له جاده
شه‌فه‌ق نيوز/ ترس روى له جايه‌ڵ جوانيگ كردوێد له وه‌ختيگ ك سه‌ربازه‌يل عراقى وه‌چه‌و به‌سياگ هاوردنه‌ى وه‌رده‌م ئه‌فسه‌ر هه‌واڵگرى له يه‌كيگ له ماڵه‌يل له ده‌وگرد باكوور شار موسڵ.
موقه‌ده‌م عامر فه‌تلاوى پرسيار له‌و جايه‌ڵ جوانه كرد ك وسياوێد له‌وه‌رده‌مى و وته‌پى" له چ وه‌ختيگه‌و كه‌فتێده وه‌ل داعش؟"
ئه‌و جايه‌ڵ جوان ته‌مه‌ن 17 ساڵانه وته ئه‌فسه‌ره‌گه: گه‌وره‌م ئه‌را ماوه‌ى 20 رووژه.
جايه‌ڵه‌گه ده‌سوه‌سه‌ر كريا، وه‌لێ فه‌تلاوى وه‌رپرس هه‌واڵگرى له تيم 16 له سوپاى عراقى گومان له‌وه كرد ئه‌و جايه‌ڵه مه‌ترسى داشتوود دوياى ته‌مامبوين رووژه‌يل حوكم ريكخرياگ داعش ك ده‌س گرته بان رويوه‌ر فراوانيگ له خاكه‌يل عراق.
دوياى فيشتر له دو ساڵ زاڵبوين تونڕه‌وه‌يل له‌بان موسڵ و ئعلانكردن خلافه‌ت، جاريگتر هيزه‌يل عراقى وه پشتگيرى هيزه‌يل هاوپه‌يمان ده‌سكردنه په‌لامارداين ئه‌را ئازادكردن ديم خوه‌رهه‌ڵات له شاره‌گه‌و حاڵ حازريش ئاماده‌ن ئه‌را ئازادكردن ديم خوه‌رئاواى.
هه‌رچه‌نى ك له سه‌ره‌تاى ئه‌و هه‌ڵمه‌ته تائيسه هه‌زاران ترۆريست كوشيانه ك ئه‌را ماوه‌ى سێ مانگه ده‌س وه‌و هه‌ڵمه‌ته كرياگه، پيشبينى يه‌يش ئه‌كريه‌ێد وجوود ريكخرياگ داعش وه‌رده‌وام بدێ و ژير وه‌ژير كاره‌يليان ئه‌نجام بيه‌ن و شيوازه‌يل ياخيبويه‌يل بارنه كار.
يه‌يش ماناى ئه‌وه‌سه دوشمن كه‌متر ده‌رئه‌كه‌فێد له‌وه‌رده‌مم هيزه‌يل عراقى و دوياخريش جه‌نگ نائاشكرا ده‌س وه‌پى ئه‌كا وه‌شيوه‌يگ فيشتر.
فه‌تلاوى له‌باره‌ى جايه‌ڵه‌گه وت: جوور شانه‌ى خه‌فتگ بيلنه‌ى، چوينكه ئه‌به ئه‌دێده هه‌واڵده‌ر ژير وه‌ژير داعش.
ئه‌و جايه‌ڵه ك جنگه‌يل جينز له‌وه‌ر كردوێد باس له‌وه كرد ك وه‌ل گرووپيگ بويه پيكهاتنه له 150 كه‌س و له‌وه‌رجه ساڵيگ له‌ناو مزگفتيگ ناوچه‌يى گرده‌و بوينه‌و جيواز كريانه ئه‌را سه‌ربازگه‌ى مه‌شقداين نزيكيگ.
جايه‌ڵه‌گه باس له‌وه‌يش كرد ك رووژانه ده‌مه‌و شه‌وه‌كى زوى هه‌ڵسيانه ئه‌را نماز و قه‌واڵتى و دوياى ئه‌وه‌يش مه‌شقكردن جه‌سه‌يى و گووشگرتن له ده‌رسه‌يل شه‌رعى و مه‌شقكردن له‌بان وه‌كارهاوردن تفه‌نگ كڵاشينكۆف.
دوياى سێ هه‌فته ڕى وه‌و موجه‌نه‌ده‌يله دريا له ئيجازه‌يگ بچنه‌و ئه‌را ماڵه‌يليان، ئمجا جايه‌ڵه‌گه وت: داوا له‌ليم كردنه گله‌و بخوه‌م، وه‌لێ ممن رخم چيه‌و گله‌و نه‌خواردمه.
وه‌لێ له‌ى باوه‌ته‌و، فه‌تلاوى باوه‌ڕ وه‌و قسه نه‌كرد و وه گومانيگه‌و وت: گشتيان ئويشن گله‌و نه‌خوارديمنه.
فه‌تلاوى وت: ئاماده‌ى ئه‌كه‌يم و زانيارى له‌لى وه‌رئه‌گريم و ئويشيمنه‌پى: ئه‌گه‌ر دوشمن خوه‌د ناسيده ئاسانه ئاشكراى بكه‌ێد.
وه‌ل راوناين ريكخرياگ ترۆريستى داعش له خوه‌رهه‌ڵات موسڵ له‌لايه‌ن هيزه‌يل عراقيه‌و ك به‌ڵگه‌يل فريه‌يگ له‌شوونى مه‌نده جى، شيوازه‌يل تر ئه‌و ريكخرياگه كه‌فته ده‌يشت و چشته‌يل فره‌يگيش ئاشكرا بوى.
نويسينگه‌ى فه‌تلاوى پڕ بوى له به‌ڵگه‌يل ك له‌ناو بنگه‌يل داعش له باكوور موسڵ دوينريانه‌و، له‌وانه‌يش نه‌خشه‌يليگ ئه‌را دروسكردن ته‌ياره‌يل بى ته‌ياره‌وان و پاسه‌پۆرت رووسى و به‌ڵگه‌يل تر.
وه‌ل ئه‌وه‌يشا په‌يوه‌ندى ناوخوه‌ييش بويه له‌ناونى ئه‌ندامه‌يل گه‌وراى ئه‌و ريكخرياگ ترۆريستيه وه‌ل سه‌ركرده‌يل تر له‌باره‌ى رينمايه‌يل و له‌ڕى وه‌كارهاوردن سه‌ماعه له‌وه‌خت خزمه‌ت و قسه‌كردن و خه‌ڵه‌تانن مه‌ردم.
هيزه‌يل عراقى ئاگادارى دا مه‌ردم ناوچه‌گه خه‌وه‌ر له‌بان ئه‌وانه بيه‌ن ك هاوكار ريكخرياگ ترۆريستى داعش بوينه، يه‌يش له‌وه‌ختيگ ك هيزه‌يل عراقى چينه ناو ناوچه‌يليان، وه‌لێ ده‌زگايه‌يل ئاسايشى ده‌سكردنه له‌وه‌رگرتن ڕى وشوونه‌يل فيشتر له وشكانن مه‌نهه‌جى.
له يه‌كيگ له دويا ناوچه‌يليگ ك پاكه‌و كريا له ديم خوه‌رهه‌ڵات شار موسڵ، هيمان دروشم داعش خوه‌شهاتن له زياره‌تچيه‌يل ئه‌كاو ته‌رمه‌يليگيش له‌بان ڕى و جاده وجوود داشتن ك ديار بوى وه‌ى تازه كوشياوێن.
له جاده‌يگ نزيكيش مناڵه‌يليگ خه‌ريك بازيكردن بوين و پياوه‌يليش له ماڵه‌يليان هاتنه ده‌يشت له هه‌وڵيگ ئه‌را خوه‌يگونجانن وه‌ل واقع تازه، يه‌يش له‌وه‌ختيگ ك هيزه‌يل عراقى مقه‌يه‌تى ناوچه‌گه ئه‌كا نه‌ك ريكخرياگ ترۆريستى داعش.
هيمان تائيسه‌يش كابرايگ وه ريش دريژيگ و شواڵه‌گه‌ى له‌ناو جوراوه‌گه‌ى بوى ترس وه‌پيه‌و ديار بوى له ئاكام ئه‌و زوڵم و جه‌وره ك ريكخرياگ ترۆريستى داعش له‌بانيان فه‌رزى كردوێد.
له‌ى وه‌ختيشه ئه‌فسه‌ريگ وه‌ناو عه‌ڕاس وه توڕه‌يگه‌و له‌لى پرسى: ئه‌را ريشد نه‌تاشێده؟ ئه‌ويش وت: ئه‌يه سونه‌ت موسڵمان ئيمانداره. ئه‌فسه‌ره‌گه‌يش وته‌پى: گشتى بتاش، وه‌ل ئه‌وه‌يشا سه‌ربازيگيش چه‌مياوه‌و ده‌رپاى شواڵه‌گه‌يشى له‌ناو جوراوه‌يلى ده‌ركرد.
ئمجا وه‌ل پيشڕه‌ويكردن سوپا، تونڕه‌وه‌يل ناچار بڕيگ له مه‌ردم كرد له‌ماڵ ده‌ربچن و ماڵه‌يليان هاوردنه كار ئه‌را وه‌رگرى له خوه‌يان و دوياخريش وه‌ختى له‌تيان ده‌رچين ده‌سكردنه سزانن ئه‌و ماڵه‌يله.
له‌ى باوه‌تيشه‌و، ئه‌بو مالك وت: ئه‌و تونڕه‌وه‌يله ترس فريه‌يگ له گيانيان نيشتگه و باس له‌وه‌يش كرد ك چوين بڕيگ چه‌كدار مێردمناڵ وه چه‌كه‌و هه‌ڕه‌شه له‌لى كردنه ئه‌را ئه‌وه‌گ ماڵه‌گه‌ى بيلێده جى.
له‌وه‌رده‌م ماڵگه‌ى ئه‌بو عومه‌ر ك تونڕه‌وه‌يل داگيرى كردوێن وه‌رجه ئه‌وه‌گ بسزننه‌ى، هيمان خوين يه‌كيگ له چه‌كداره‌يل وشكه‌و نه‌وێد ك وه سه‌ختى زه‌خمى بوێد و ته‌رمه‌گه‌ى كيشيا وه‌ره‌و جاده.
مه‌ردم ناوچه‌گه‌يش باس له‌وه كرديان ك چوين تونڕه‌وه‌يل ته‌رمه‌يل خستيانه ناو كيسه‌ى پلاستيكى چه‌رمگ و جيوازى كرديان له‌ڕى به‌له‌م.
وه‌لێ چاره‌نويس جايه‌ڵ جوانه هه‌ڤده ساڵانه‌گه ديار نيه ك ده‌سوه‌سه‌ر كريا.
