بويچگترين چالاكوان سياسى له‌بان فه‌يسبوك
لاپه‌ڕه‌گه‌ى نما له‌بان ماڵپه‌ڕ په‌يوه‌نديه‌يل كومه‌لايه‌تى فه‌يسبوك نزيكه‌ى 150 هه‌زار سه‌رسامبوين له ماوه‌ى دو هه‌فته وه خويه‌و ديه‌و زوورم ئه‌وانه‌يش ته‌عليق له بان لاپه‌ڕه‌گه‌ى نويسنن پيشبينى ئه‌وه ئه‌كه‌ن ك شماره‌ى مه‌ردمه سه‌رسامه‌گه‌ى بڕه‌سيده يه‌ك مليۆن كه‌س، ك ديار راز ئى مه‌سه‌له‌يشه ها له چالاكيه‌يلى ك هه‌فته‌يگ وه‌بى بڵاوكردن شماره‌يگ گرته‌ى ڤيديۆيى له‌بان ماڵپه‌ڕه‌گه ڕه‌د ناكا.
نما له ڤيديۆيه‌يلى باس له نه‌وين ئاو و كاره‌با و ياساشكنى مافه‌يل مناڵه‌يل ئه‌كاو زوورم باسه‌يليشى له‌بان وه‌رپرسه‌يل هه‌رێم كوردستانه ك واده‌ى خاسسازى خزمه‌تگوزارى دانه.
نه‌ريمان سابر باگ نما باس له‌وه ئه‌كا ك دويته‌گه‌ى هه‌ر له مناڵيه‌و ئى به‌هره‌و خاڵه‌يل جياوازه ديرێد وه‌ل مناڵه‌يل تر و هه‌ر له مناڵييه‌و تويه‌نستگه قسه بكاو ئاماژه وه يه‌يش ئه‌كا ك سه‌ره‌تاى قسه‌كردنى وه نويسانن بويه وه‌ل ميمگى ك نيشته‌جى ئه‌مريكاس، ك هه‌ر وه‌و خاتريشه جورئه‌ت ئه‌وه‌يش ديرێد له‌وه‌رده‌م كاميرا بووسيه‌ێدو له‌ى رويه‌و تواناى خاسيگ ديرێد.
نه‌ريمان ك حاڵ حازر له بوار ره‌سانن كار ئه‌كا، ئه‌وه ده‌رخست ك ده‌رده‌شه‌ى نما وه‌ل ميمگى له ئه‌مريكا له‌يوا وه‌پى كرد هه‌ر له مناڵييه‌و پرسيار بكاو بويشێد: ئه‌ڕاچه مناڵه‌يل ئه‌مريكا ژيان خاسيگ ديرن و ئيمه جوور ئه‌وان نييم؟ ئه‌وان كاره‌با له‌لايان ناوڕيه‌ێد و ئاويش ديرن، ئه‌ى ئيمه ئه‌ڕاچه ئاو و كاره‌با نه‌يريم؟
نه‌ريمان باس يه‌كه‌م رووژيگ ئه‌كا ك نما له‌تى ده‌سكرده بڵاوكردنه‌وه‌ى چالاكيه‌يلى له‌بان فه‌يسبوك و وت: رووژيگ له رووژاان نما و خوه‌يشكه‌گه‌ى ته‌ماشاى ته‌له‌فزيۆن كرديان، له‌ناكاو كاره‌با برياو ئه‌يانيش دڵته‌نگ بوين و خوه‌يشكه گه‌وراگه‌ى پيشنيار كرد گرته‌يگ ڤيديۆيى تۆمار بكا ئه‌را داواكارى خاسه‌وكردن كاره‌با، نمايش ده‌سكرده تۆماركردن قسه له‌بان مۆبايل و داوا له داڵگيان كردن گرته ڤيديۆيه‌گه ئه‌ڕايان بلاو بكا له‌بان فه‌يسبوك، داڵگيانيش جواو داواكاريه‌گه‌يان داره‌وه‌و ڤێديۆگه ئه‌ڕايان بڵاو كرد، دى ئه‌وه سه‌ره‌تاى نما بوى له‌بان ماڵپه‌ڕه‌يل په‌يوه‌ندى كومه‌ڵايه‌تى.
چالاكيه‌يل نما مه‌ردمان فريه‌يگ خوه‌شاڵن وه‌پى، وه‌لى داڵگ وباوگى ئه‌كه‌فنه وه‌ر ره‌خنه له‌لايه‌ن توێژه‌ره‌يل كۆمه‌ڵايه‌تى و چالاكوانه‌يل مه‌ده‌نى ك فكره‌ى وه‌كارهاوردن چالاكيه‌يل سياسى ئه‌را مناڵ ره‌ته‌و ئه‌كه‌ن، چوينكه وه قسه‌ى ئه‌وان ئى فكره تايبه‌ته وه گه‌ورايه‌يل نه‌ك مناڵ.
له‌ى باوه‌تيشه‌و، له‌تيف حسێن توێژه‌ر كۆمه‌ڵايه‌تى له سلێمانى ئه‌ويشێد: من دژ وه‌كارهاوردن و بڵاوكردنه‌وه‌ى گرته ڤيديۆيه‌يل نما وسيه‌م، چوينكه هه‌ڵه‌س جه‌هان جوام مناڵه‌يل تيكه‌ڵ وه جه‌هان حزب و حكومه‌ت بكه‌ێد، هه‌ر وه‌و خاتريشه نادێ مناڵ بكريه‌ێده هووكار له ره‌سانن كومه‌ڵايه‌تى و دويره‌و بخريه‌ن له جه‌هان مناڵى.
باوگ نما ئويشێد: من خاس زانم له‌و بانگه‌واز جه‌هانى ماف مناڵه‌يله و ئه‌را ماوه‌ى فريه‌يگيش چالاكى له‌و بواره‌و داشتم، هه‌ر له‌وه‌ر ئه‌وه‌يش باوه‌ڕم ئه‌وه‌سه نما كاريگ ناكا دژ ئعلان جه‌هانى مافه‌يل مناڵه‌يل بوودو حزبيش كاريگه‌رى له‌بان هوير وڕاى نه‌يرێد.
ئمڕوو نما بويه‌سه پاڵه‌وان له فه‌يسبوك، وه‌لى خيزانيگ وه ته‌مامى هانه پشتى و له‌ى رويه‌و باوگى ئويشێد: من و خيزانه‌گه‌م ودويه‌ته‌گه‌م كارمان ئه‌وه‌سه ڤرته ڤيديۆيه‌يل نما تۆمار ئه‌كه‌يم و ريكى ئه‌خه‌يم وه‌لياو دووان له برايه‌يلميش له ئداره‌ى لاپه‌ڕه‌گه‌ى كار ئه‌كه‌ن و له‌ڕى مۆبايله‌و كاره‌يلمان ئه‌نجام ئه‌يه‌يم.
دوياخريش باوگ نما جه‌خت له‌وه ئه‌كا ك وه‌رده‌وامن له‌ى كاره‌يله وه‌ل نما تاوه‌ختيگ گه‌ورا ئه‌دێ و پشت وه‌خوه‌ى ئه‌وه‌سێد له گامه‌يل ئاينده‌ى، وه‌لى ئمڕوو جوور ئه‌وه‌گ باوگى باس كرد فشار له‌بانى كه‌مه‌و ئه‌كه‌ن و واده‌ى چگنى ئه‌را باخچه‌ى مناڵه‌يليش نزيكه‌و بويه.
