به‌ڵگه‌.. عه‌باس به‌ياتى و هه‌ڕه‌شه‌ێ كوشتن ولاوردنى له‌ په‌رله‌مان

به‌ڵگه‌.. عه‌باس به‌ياتى و هه‌ڕه‌شه‌ێ كوشتن ولاوردنى له‌ په‌رله‌مان
2018-02-25T17:14:00+00:00

شه‌فه‌ق نيوز/ تاريفكردن په‌نج فراكسيۆن له‌ هاوپه‌يمان شيعه‌ وه‌ "په‌نج لايه‌ن خاوه‌ن به‌تيه‌" له‌لايه‌ن عه‌باس به‌ياتى ئه‌ندام ئئتلاف ده‌وڵه‌ت ياسا له‌ يه‌كيگ له‌ كه‌ناڵه‌يل ئاسمانى ك گرته‌ ڤيديۆيه‌يلێ بڵاو كريا، بويه‌ ئاگريگ ئه‌ڕاێ له‌ئاكام تويڕه‌يى تونيگ له‌لايه‌ن لايه‌نگره‌يل دوازنزه‌ ئيمامى له‌ عراق.

 

به‌ياتى هه‌رچه‌نى به‌ياننامه‌گه‌يش ده‌ركرد و له‌تى ئه‌وه‌ ده‌رخست ك مه‌رامى له‌و تاريفكردنه‌ راسى نه‌ويه‌، به‌ڵكوو مه‌جازى و له‌ڕوێ ته‌وه‌ڕكانه‌وه‌ بويه‌، وه‌لێ ئى به‌ياننامه‌ شه‌فاعه‌ت ئه‌راى نه‌خوازێ و هه‌ر وه‌و خاتريشه‌ واسق ئه‌لبه‌تات سه‌ركرده‌ى "سوپاى ئه‌لموختار" داوا له‌لى كرد پاشگه‌ز له‌و قسه‌يله‌ بدێ و داوا وه‌خشين بكا وه‌ شيوه‌يگ به‌زه‌ييانه‌ له‌وه‌رده‌م مه‌زارگه‌ێ ئيمام عه‌لى كوڕ ئه‌بى تاڵب له‌ نه‌جه‌ف سڵام خودا له‌لى.

 

ئه‌لبه‌تات له‌ گرته‌يگ ڤيديۆيى وت: عه‌باس به‌ياتى دز په‌نج لايه‌ن ك به‌شدارى له‌ هه‌ڵوژاردنه‌يل ئه‌كه‌ن وه‌ په‌نج لايه‌ن خاون به‌تيه‌ تاريف ئه‌كا، ك يه‌يش وه‌ ئستهتار باس كرد.

 

ئه‌لبه‌تات روى وتاره‌گه‌ێ له‌ به‌ياتى كرد و وت: يا ئه‌وه‌سه‌ ته‌وبه‌ ئه‌كه‌ێد و داواى وه‌خشين ئه‌كه‌ێد، يا ماف توڵه‌سه‌ندن ئه‌يه‌مه‌ جهادكاره‌يل ك هه‌قيه‌و له‌لێد بكه‌ن و خوه‌ديش خاس زانێد ماناى توڵه‌ چه‌س و ئى قسه‌يليشه‌ وه‌ هه‌ڕه‌شه‌يگ وه‌ربگر.

 

له‌ دريژه‌ى وتاره‌گه‌ێ، ئه‌لبه‌تات وت: ئه‌گه‌ر پيرووزى ئى كه‌سايه‌تيه‌يله‌ نه‌زانێد چه‌س، ئه‌وه‌ تفه‌نگ و گوله‌ نيشاند ئه‌يه‌ن كيين ئه‌و كه‌سه‌يله‌.

 

به‌ياتى رووژ جومعه‌ى گوزه‌يشت له‌ به‌ياننامه‌يگ وت: مه‌ردمانيگ گرته‌يگ له‌ ديداره‌گه‌م وه‌ل كه‌ناڵ ئه‌لمه‌يادين دوينن و يه‌يش ده‌رخست و وت: جوور ئاشكراكردنيگ ئه‌را ئه‌وانه‌گ ئه‌خوازن راسى بزانن ئه‌را مه‌رام قسه‌يلم وه‌پيان ئويشم هويچ كه‌سيگ نيه‌ لاسايى كه‌سه‌يل خاوه‌ن به‌تيه‌ بكا و شه‌باهه‌تيان بكا له‌بان خاك نه‌ ئه‌وساو نه‌يش ئيسه‌و نه‌يش له‌ ئاينده‌.

 

به‌ياتى وت: من مه‌رامم ئه‌وه‌ نيه‌ شه‌باهه‌ت وه‌پيان بكه‌ن نه‌ ئه‌را خوه‌م و نه‌يش ئه‌را كه‌سه‌يل غه‌يره‌ خوه‌م، به‌ڵكوو شماره‌و شماردن ئه‌هل به‌تيه‌ سڵام خودا له‌ليان خسته‌ هويرم ك هه‌ميشه‌ خازرن له‌ دڵ و ده‌روين و هه‌ر وه‌و خاتريشه‌ ته‌وڕكيان هاوردمه‌ هوير، ك يه‌يش جى يادكردنه‌ هه‌ناى ك بڕيگ شماره‌ ئه‌خه‌يمنه‌ هوير له‌ بوونه‌و رويداگه‌يل.

 

وه‌ل ئه‌وه‌يشا عه‌لى تاڵه‌قانى خوتبه‌ده‌ر، عه‌باس به‌ياتى وه‌ هه‌رزه‌كار و سووك ناو برد و داوايش له‌ ئه‌نجومه‌ن نوێنه‌ره‌يل عراقى كرد ئه‌ندامێتى له‌لى بسيننه‌وه‌و قاوى بيه‌ن.

 

تاڵه‌قانى له‌ گرته‌يگ ڤيديۆيى، وت: ئيمه‌ ئمڕوو هايمنه‌ وه‌رده‌م ديارده‌يگ ك موسڵمانه‌يل بيجگه‌ به‌تيه‌ى محه‌مه‌د و ئالوبه‌تى وه‌رجه‌ 1400 چشتيگ تر نازانن ك ئيسه‌يش دوياى ئه‌و هه‌مگه‌ ساڵه‌ كه‌سيگ ئه‌ياد نه‌فام و هه‌رزه‌كار و ناڕيك وپيك په‌لاار عه‌قيده‌ى ئسلامى ئه‌ياد وه‌ى شيوه‌و ئى ره‌نگ و خوه‌ى وه‌خاوه‌ن به‌تيه‌ زانێد و ئى ناوه‌ ئه‌را حزبه‌يليگ نه‌ێد ك مه‌ردمان فريه‌يگ له‌لێ وه‌ گه‌ناته‌كار ناسريان و وه‌ زوڵم و ده‌سدريژى له‌بان ملله‌ت.

 

تاڵه‌قانى وت: ئى باوه‌ته‌، فريه‌ مه‌ترسيداره‌ و داوايش له‌ مه‌رجه‌عه‌يل ئايينى ئه‌كه‌م جواودانه‌وه‌ى يه‌كلاكه‌ريگ ئه‌راێ داشتوون و داوايش كرد به‌ياتى له‌ ئه‌نجومه‌ن نوێنه‌ره‌يل و گشت پايه‌يل سياسى قاو بدريه‌ێد، ك ئه‌گه‌ر ئى كاره‌يله‌ ئه‌نجام نه‌گرێد وه‌و شيوه‌، ئه‌وه‌ وه‌رپرس يه‌كه‌م له‌لى حزبه‌گه‌ێ و ئه‌و شوونه‌سه‌ گرته‌سه‌ێ خوه‌ى وه‌ى ده‌مدريژى و ناڕفتاريه‌.

 

ئمجا خاوه‌نه‌يل به‌تيه‌ يا عه‌باى يه‌مانى وه‌گووره‌ى روايات موسڵمانه‌يل وه‌تايبه‌ت شيعه‌ له‌ليان پيكهاتنه‌ له‌ محه‌مه‌د په‌يامبه‌ر و فاتمه‌ى دويه‌تى و عه‌لى كوڕ ئه‌بو تاڵب هاوسه‌رێ و حه‌سه‌ن و حسێن كوڕه‌يلێ.

 

وه‌ل ئه‌ويشا پاريزه‌ريگ ك كار له‌ دادگاى ئستئناف پاريزگاى موسه‌نا ئه‌كا وه‌ناو عه‌لى داخل ئه‌يدام، شكايه‌تيگ دژ به‌ياتى ئه‌را وه‌رده‌م دادگا به‌رزه‌و كرد وه‌ تومه‌ت ئه‌وه‌گ ده‌مدريژى كرده‌سه‌ بان ئه‌هلولبه‌يت.

 

يه‌يش ده‌ق ئه‌و شكايه‌ته‌سه‌ ك به‌رزه‌و كرياگه‌:

Shafaq Live
Shafaq Live