بايه‌سه‌ ستراتيجيه‌ت راسكانی له‌ناونی ئه‌مريكا و كوردستان ئه‌نجام بگريد

بايه‌سه‌ ستراتيجيه‌ت راسكانی له‌ناونی ئه‌مريكا و كوردستان ئه‌نجام بگريد
2015-06-16T07:02:11+00:00

ساڵێگ ته‌مام ئه‌دێ له‌بان دامه‌زرانن خه‌لافه‌ت ئسلامی له‌لايه‌ن ترۆريسته‌يل داعش و له‌ی ساڵه‌ ئه‌و ترۆريسته‌يله‌ خاك فيشتر داگير ئه‌كه‌ن و وه‌ به‌راورد وه‌ ساڵ گوزه‌يشت توانايگ خاستر ديرن.

حه‌ننا ئويشيد: سه‌ره‌تا داعش ئسپات ئه‌وه‌ كرد ك ئه‌تويه‌نيد بدێده‌ هيزيگ جه‌نگاوه‌ری كارا، يه‌يش وه‌و مانا ك فيشتر جوور سوپايگ هه‌ڵسوكه‌فت كرد نه‌ك جوور گرووپيگ ترۆريستی و فه‌رمانده‌و جه‌نگاوه‌ره‌يليشی وه‌ خاسی پڕچه‌ك كريانه‌و جه‌نگ خاسيش ئه‌كه‌ن، ك له‌يوا دياره‌ خاوه‌ن داراييگ بته‌و و هه‌واڵگری خاسيگيش بوون و هانده‌ر و پشتگير بته‌ويش ديرن و ئاماده‌ن ئه‌را ئه‌نجامداين هه‌ر كاريگ ك خواست بدێ ئه‌را چه‌سپانن ئيراده‌ی خوه‌يان له‌بان ركابه‌ر و نه‌ياره‌يليان.

خاڵێگ تر ئه‌وه‌سه‌ ك داعش به‌خت خاسيگ داشت، چوينكه‌ دوسمنه‌يلی كزن، وه‌شيوه‌يگ سه‌ره‌كی هه‌ردوگ رژيم ديمه‌شق و به‌غدا دو رژێمن ك تاڕاده‌ی فريه‌يگ جه‌مسه‌رگير و تايفه‌گه‌ريين، ك سياسه‌ته‌يليان بوينه‌سه‌ هووكار ئه‌وه‌ك به‌شيگ گه‌ورای مه‌ردمه‌گه‌يان لانه‌ويز بوون، وه‌تايبه‌ت پيكهاته‌يل سونی.

حه‌ننا ئاماژه‌ وه‌يه‌يش كرد و وت: خوه‌رهه‌ڵات ناوين بويه‌سه‌ كيشه‌يگ ناوده‌وڵه‌تی ك تون و تيژی باڵ كيشاسه‌ بانی و باس له‌وه‌يش ئه‌كريه‌يد ك ئی ناوچه‌ وه‌ره‌و جه‌نگيگ خويناوی ئه‌چێد له‌ناونی شيعه‌و سونی و باوه‌ڕميش ئه‌وه‌سه‌ هويچ كه‌سيگ ناتويه‌نيد وه‌ متمانه‌وه‌ پيشبينی ئه‌وه‌ بكا ك ساڵيگ تر خوه‌رهه‌ڵات ناوين چوين ئه‌دێد؟.

حه‌ننا وت: حاڵ حازر ئاينده‌ی خوه‌رهه‌ڵات ناوين فريه‌ تيه‌ريك دياره‌و يه‌يش مه‌سه‌له‌يگه‌ ك هويچ گومانيگ له‌تی نيه‌، وه‌لی من ترس له‌وه‌ ديرم ئی ئاينده‌ فيشتر تيه‌ريك بدێ له‌ غياب سه‌ركردايه‌تييگ پاداگر ئه‌مريكا و له‌ غياب پابه‌ندبوين وه‌ جووشداين هيزه‌يل سيستم جه‌هانيه‌و ئه‌را ئحتواكردن و دويرخستن ئه‌و هيزه‌يله‌ ك ترس و ڕخه‌وبردن و بشيوی و دڕندايه‌تييگ بی ڕاده‌ بڵاو ئه‌كه‌نه‌و.

له‌باوه‌ت ئه‌رك ئه‌مريكايش حه‌ننا وت: گرينگترين كاريگ ك ئه‌مريكا ئه‌تويه‌نيد ئه‌نجامی بيه‌يد پيكهاتگه‌ له‌ مقه‌يه‌تيكردن نه‌خش خوه‌ی جوور وه‌هيزترين ئه‌كته‌ريگ ناوچه‌گه‌و سازداين هاوپه‌يمان و دووسه‌يلی وه‌خاتر له‌وه‌رگرتن سياسه‌تيگ وه‌جه‌م ك وه‌ئامانج په‌ره‌وه‌پيداين به‌رژه‌وه‌نديه‌يل بنه‌ڕه‌تی دانرياويد له‌ خوه‌رهه‌ڵات ناوين و ئه‌و به‌رژه‌وه‌نديه‌يليشه‌ پيكهاتنه له‌ ئاسايش و سه‌قامگيری و خاسسازی.

له‌باوه‌ت كيشه‌ی كورديش له‌ خوه‌رهه‌ڵات ناوين، حه‌ننا باس كرد و وت: حاڵ حازر ته‌نيا كورده‌ ك تويه‌نستگه‌ وه‌ راسی ترۆر بشكنيده‌وه‌و كورد له‌عراق پاڵه‌وانانه‌ جه‌نگ وه‌ل داعش كردنه‌و تويه‌نستنه‌ سه‌رجه‌م ئه‌و خاكه‌يل هه‌رێم كوردستانه‌ باريده‌و ك زويتر له‌ژير ده‌سڵاتيان بويه‌و پشتگيری ئاسمانی ئه‌مريكايش گرينگ بوی وه‌ل ئه‌و هه‌وڵ و خه‌باته‌ ك كورد ئه‌نجاميداو له‌ هه‌مان وه‌خت پشتگيری فراوانيگيش له‌لی ئه‌كريه‌يد له‌لايه‌ن كومه‌ڵگای ناوده‌وڵه‌تيه‌و.

حه‌ننا دوياخريش وت: هويچ گومانيگ له‌وه‌ نه‌يرم ك بايه‌سه‌ مه‌شق و هاوكاری ئه‌مريكا وه‌ل هه‌رێم كوردستان فراوانتر بكريه‌يد و قويلتره‌و بدێ و بايه‌سه‌ په‌ره‌ بدريه‌يده‌ شه‌راكه‌ت ستراتيجی راسكانی له‌ناونی ئه‌مريكاو هه‌رێم كوردستان ك هه‌رێميگ بته‌و و گه‌شه‌كردگ بدێ و خاسسازی له‌تی ئه‌نجام بدريه‌يد و ئامانجيگ سه‌ره‌كی سياسه‌ت ئه‌مريكا بدێ و بدێده‌ ستوينيگ گرينگ ئه‌ڕا دوباره‌ وه‌ده‌سهاوردنه‌وه‌ی ئاستيگ له‌ سه‌قامگيری و ئاسايش له‌ ناوچه‌گه‌.

ج . أ

Shafaq Live
Shafaq Live