ئه‌مريكا چوين جواو په‌لامار فه‌سيله‌يل عراقى ئه‌ياده‌و؟

ئه‌مريكا چوين جواو په‌لامار فه‌سيله‌يل عراقى ئه‌ياده‌و؟
2020-03-29T21:38:05+00:00

شه‌فه‌ق نيوز/ هيمان وڵاته‌يل يه‌كگرتگ له‌ ديد جواودانه‌وه‌ نوڕێده‌ په‌لاماره‌يل دوباره‌كرياێ ك له‌لايه‌ن فه‌سيله‌يل سه‌ر وه‌ ئيران ئه‌را بان به‌رژه‌وه‌ندى ئه‌مريكا له‌ عراق ئه‌نجام ئه‌گرێد، ئه‌ويش وه‌ گووره‌ى قسه‌ى وه‌رپرسه‌يل ئه‌را رووژنامه‌ى "واشنتۆن پۆست".

 

ئه‌و رووژنامه‌ى ئه‌مريكيه‌ باس له‌وه‌ ئه‌كا فه‌سيله‌يل لايه‌نگر ئيران جورئه‌تيان فيشره‌و بويه‌ له‌ په‌لامارداين هيزه‌يل ئه‌مريكى له‌ عراق، ك په‌لاماره‌يل مووشه‌كى دژ بنگه‌يل ئه‌مريكا وه‌ شيوه‌يگ دوباره‌كرياێ ئه‌نجام دريه‌ێد و له‌ رووژيش جێوه‌جێ ئه‌كريه‌ێد.

 

وه‌رپرسه‌يل ئه‌مريكى ئويشن: وه‌ رووژانه‌ راپۆرته‌يليگ له‌بان په‌لاماره‌يل ئه‌كه‌فێده‌ ده‌سيان ك پلان ئه‌راى دانرياگه‌ دژ دامه‌زرياگه‌يل سه‌ربازى يا دبلۆماسى و په‌يوه‌س وه‌ وڵاته‌يل يه‌كگرتگ ئه‌مريكا.

 

وه‌لێ راپۆرت رووژنامه‌ى واشنتۆن پۆست جه‌خت له‌وه‌ ئه‌كا ئداره‌ى دۆناڵد تره‌مپ سه‌رۆك ئه‌مريكا هيمان دابه‌شه‌ له‌باره‌ى چوينێتى جواودانه‌وه‌و وه‌خته‌يل و گامه‌يل زيايه‌ ك بايه‌سه‌ له‌وه‌ر بگيريه‌ێد ئه‌را روى وه‌ڕوێ بوينه‌وه‌ى فه‌سيله‌يل وه‌بى ئنتقامكردن.

 

رووژنامه‌گه‌ له‌ زووان وه‌رپرسيگ ئه‌مريكى وت: ئى جواوداينه‌ له‌ دوياخره‌و ته‌ماشاى قه‌واره‌ى مه‌ترسيه‌گه‌ى ئه‌كريه‌ێد ك سه‌رۆك قه‌بولى بكا له‌ عراق وه‌رجه‌ ئه‌وه‌گ وجوودمان له‌ورا قورساييگ بدێ.

 

وه‌رپرسه‌يل ئه‌مريكى مناى كه‌تيبه‌يل حزبوڵڵا كردن ك يه‌كيگه‌ له‌و فه‌سيله‌يل سه‌ره‌كيه‌ ك له‌لايه‌ن ئيرانه‌و پشتگيرى ئه‌كريه‌ێد له‌باره‌ى ئه‌و په‌لاماره‌يل مووشه‌كييه‌ ك زويتر ئه‌نجام دريا ئه‌را بان سه‌ربازگه‌ى تاجى له‌ باكوور به‌غداى پايته‌خت و له‌ئه‌نجاميش قوربانى له‌ڕز سه‌ربازه‌يل ئه‌مريكى و بريتانى له‌لى كه‌فته‌و.

 

دى له‌وسا تائيسه‌ وه‌لاى كه‌مه‌و چوار په‌لامار ئه‌نجام درياو دامه‌زرياگه‌يل سه‌ربازى و دبلۆماسى ئه‌مريكى له‌تى كريا ئامانج.

 

وه‌رپرسه‌يل ئه‌مريكييش باوه‌ڕيان ئه‌وه‌سه‌ ك كوشيان يا زه‌خمداركردن زياتر له‌ ڕز هيزه‌يل ئه‌مريكى ته‌نيا مه‌سه‌له‌ى وه‌خته‌، جوور ئه‌وه‌گ رووژنامه‌گه‌ باس له‌لى كردگه‌.

 

وه‌رپرسيگيش له‌ وه‌زاره‌ت وه‌رگرى ئه‌مريكا، ك نه‌تواسگه‌ ناوى ئاشكرا بدێ له‌وه‌ر هسيارى مه‌سه‌له‌گه‌، باس له‌وه‌ كردگه‌ كه‌تيبه‌يل حزبوڵڵا ئه‌خوازێد ئنتقام له‌ ئه‌مريكيه‌يل بكا له‌ئه‌نجام كوشيان ئه‌بو مه‌هدى موهه‌ندس.

 

وه‌رپرسه‌گه‌ وتگه‌ دوياى په‌لاماره‌يل مووشه‌كى ئه‌را بان سه‌ربازگه‌ى تاجى، ئاشكرا نيه‌ جواودانه‌وه‌ى ئه‌و په‌لاماره‌يله‌ كه‌ى ئه‌نجام ئه‌گرێد، وه‌لێ وشدارى و ئاماژه‌يليگ هه‌س له‌و باوه‌ته‌وه‌و هه‌ر وه‌و خاتريشه‌ حزبوڵڵا هه‌وڵ په‌لامارداين هيزه‌يل ئه‌مريكى ئه‌ياد.

 

رووژنامه‌گه‌ له‌ زووان دو كه‌س ئاگادار وت: ئداره‌ى ئه‌مريكا له‌ 11ى مارس باس له‌ ئه‌نجامداين په‌لاماره‌يليگ كردگه‌ دژ ئامانجه‌يل فريه‌يگ له‌وانه‌يش بنگه‌يل په‌يوه‌س وه‌ پاسه‌وان شوورش له‌ ئيران و سوريا، وه‌لێ وه‌ گورجى ره‌ته‌و كرياگه‌ ، چوينكه‌ كاره‌سات گه‌ورا له‌لى كه‌فتياده‌و.

 

په‌لاماره‌گه‌ى بان سه‌ربازه‌گه‌ى تاجى له‌ باكوور به‌غدا له‌ 11ى مارس بويه‌ هووكار كوشيان سه‌ربازه‌يل ئه‌مريكى و بريتانى، ك له‌لايه‌ن واشنتۆنه‌و جواوه‌و دريا و باره‌گايه‌يليگ سه‌ر وه‌ كه‌تيبه‌يل حزبوڵڵا له‌ كه‌ربه‌لا و بابل بۆردمان كريا.

 

زويتريش رووژنامه‌ى نيويۆرك تايمز ئه‌مريكى وت: پنتاگۆن فه‌رمان داسه‌ سه‌ركرده‌يل سوپا پلان دابنه‌ن ئه‌را په‌لامارداين له‌ هه‌ڵمه‌تيگ سه‌ربازى له‌ عراق، ئه‌ويش دژ فه‌سيله‌يل سه‌ر وه‌ ئيران ك هه‌ڕه‌شه‌ى په‌لامارداين دژ سه‌ربازه‌يل ئه‌مريكى ئه‌كه‌ن.

 

وه‌لێ رووژنامه‌گه‌ ئاماژه‌ وه‌يه‌يش كرد ك گه‌ورا سه‌ركرده‌يل ئه‌مريكى له‌ عراق وشدارى دانه‌ له‌وه‌گ ئيچنه‌ هه‌ڵمه‌ته‌يليگ خويناوێ ئه‌دێ و ده‌رئه‌نجامى خراويگ له‌لى ئه‌كه‌فێده‌وه‌و هه‌ڕه‌شه‌س ئه‌را به‌رپابوين جه‌نگ وه‌ل ئيران.

Shafaq Live
Shafaq Live