ئه‌زره‌ت كورده‌يل سوريا
له‌ناونى ڕى قامشلى و عامودايش ك نزيكه‌ى كه‌متر له 30 كم له يه‌كتره‌و دويرن له پاريزگاى حه‌سه‌كه، ده‌يان تابلۆى تازه وه ڕه‌نگ كه‌و كوتيانه ك ڕى وشوونه‌يل تر نيشاند ئه‌يه‌ن له هه‌ردوگ ديم ڕييگه، وه‌ل ئه‌وه‌يشا ده‌يه‌ها وينه‌ى عه‌بدوڵڵا ئۆجه‌ڵان سه‌ركرده‌ى كورد و ئاڵاى كورديش كوتيانه.
"ئه‌زره‌تيگ وه‌ديهاتگ"دو وشه‌س ك ڤيان خوزى ئحساس خوه‌ى وه‌پيان كوڵه‌و كرد ك ئاماژه وه پيته‌يل كوردى ئه‌كا وه گووره‌ى ئه‌وه‌گ فرانس پرێس باسى كرد له راپۆرتێگ ك (شه‌فه‌ق نيوز)ئاگادارى بوى و وت: ديده‌ن هه‌ر ئاماژه‌يگ يا هه‌ر نيشانه‌يگ ئه‌را كورده‌يل وه‌رجه 2011 كار مه‌حاڵيگ بوى.
ڤيان ك ته‌مه‌نى 33 ساڵه‌و كار شوفێرى ئه‌كا له‌ناو ناوچه‌يل ئدارى كورد وت: له وه‌رجه جه‌نگ سوريا ته‌نيا هه‌ر ئه‌وه‌نه بوتياد كورد يا خريايده زيندان يا ده‌سگير كرياێد.
قامشلى له‌ساڵ 2004 خوه‌ينيشانداين فراوانيگ دژ رژيم ئه‌نجامدا، وه‌لى وه‌هيز سه‌ركوت كرياو چه‌نه‌ها كوشياگ و زه‌خمدار له‌لى كه‌فته‌وه‌و ده‌يه‌ها كه‌سيش ده‌سگيركريان.
كورد فيشتر له 10% ريژه‌ى مه‌ردم سوريا پيك ئه‌يه‌رن، وه‌لى وه دريژايى ده‌يه‌ها ساڵ ناڵانن وه‌ده‌س فه‌رامووشكردن و دويره‌وخستن و به‌ش فريه‌يگيش له‌ليان بيبه‌ش بوين له ره‌گه‌زنامه‌ى سورى و زووان خوه‌يانيش له‌ليان قه‌يه‌غه بوى وه‌ل بريگ داب ونه‌ريت و له‌وانه‌يش جه‌شن نه‌ورووز.
له‌ساڵ 2013 حزب يه‌كێتى ديموكرات جوور ديارترين نوێنه‌ر كورد له سوريا ئاشكراى دامه‌زرانن ئداره‌يگ خوه‌يموختارى وه‌ختى كرد له سێ ناوچه‌ى جزيره(حه‌سه‌كه) و عفرين و كۆبانى(ريف حه‌له‌ب)له‌ژير ناونيشان رۆژئاوا.
ڤيان له‌بان مه‌سه‌له‌ى وجوود وشه‌يليگ وه عه‌ره‌بى له مه‌يدانه‌يل و شوونه‌يل گشتييش وت: زوورم مه‌ردم كورد ئه‌تويه‌نن وه كوردى قسه بكه‌ن، وه‌لى شماره‌ى كه‌ميگ له‌ليان ئه‌تويه‌نن نويسانن يا خوه‌ندنه‌وه‌ى كوردى بزانن، چوينكه له يايگرتن زووانه‌گه وه شيوه‌يگ ئه‌كاديمى قه‌يه‌غه كريايم.
بنگه‌ى ژنه شه‌هيد "جانيار سه‌رحه‌د" كه‌فته‌سه جاده‌ى سه‌ره‌كى ناوڕاس شار عامودا، ك تايبه‌ته وه نيشانداين زووان كوردى و يه‌يش يه‌كه‌مين بنگه‌يگه له‌ى جووره له سورياو برياره له‌يه‌و دويايش نزيكه‌ى 50 بنگه‌ى تر له ناوچه‌ى جزيره واز بكريه‌ێد.
يه‌كيگ له‌و كارمه‌نده‌يله ك كار له‌ناو ئى بنگه ئه‌كا وه‌ناو سه‌ردار، باس له‌وه كرد و وت: وازكردن ئى بنگه له ته‌ممووز 2011 مه‌ترسى گه‌ورايگ بوى، چوينكه له‌و وه‌خته يه‌كه‌يل پاسه‌وان ملله‌ت ئه‌وه‌نه ده‌سڵات نه‌ياشت.
سه‌ردار هه‌ميش وت: ئه‌و بنگه چوار پۆل ئه‌گرێده خوه‌ى و هه‌ر پۆليگيش نزيكه‌ى 10 خوه‌ندكار ئه‌گرێد و دو ده‌واميش له‌تى ئه‌كريه‌ێد شه‌وه‌كيان و ئيواران وه بوونه‌ى ئه‌وه‌گ خوه‌ندكاره‌يل فريه‌يگ روى له‌لى كردنه.
ئاشكراس ك په‌يڕه‌وه‌يل زانستى فه‌رمى سوورى هويچ مادده‌يگ يا كتاويگ وه زووان كوردى له‌تيان نه‌وى و هه‌ر وه‌و خاتريشه مناڵه‌يل كورد تواناى يايگرتن نويسانن و خوه‌نين وه زووان كوردى نه‌ياشتن.
له‌بازاڕ مه‌دمى عامودايش، روخسار دوكانه‌يل پڕن له جنگ باو كورده‌وارى و دروشم كوردى و ئاڵاى كوردستان و يه‌كه‌يل پاسه‌وان ملله‌ت و يه‌كه‌يل پاسه‌وان ئافره‌ته‌يل.
له‌ى باوه‌تيشه‌و ئه‌حمه‌د بوزۆ ك ته‌مه‌نى 30 ساڵه وه خه‌نستنيگه‌و وت: ئه‌وسا له گوزه‌يشته فرووشتن ئاڵاى كوردستان له مادده‌يل بيهووشكه‌ر خه‌ته‌ر تر بوى، وه‌لى له سه‌ره‌تاى 2012 داواى هاوردن جنگ كوردى له‌ليمان كريا وه‌تايبه‌ت له‌شوون خوه‌يكيشانه‌وه‌ى سوپاى رژيم له شاره‌گه، ك ئيسه وه‌بى ترس ئه‌تويه‌نيم گشت كاڵايگ باريم و بفرووشيم.
كورد له عامودا له كووتايى ساڵ 2012 كه‌ناڵيگ ئاسمانى وه‌ناو "روناهى" دامه‌زرانن، ك ته‌نيا كه‌ناڵيگ ئاسمانيه له سوريا به‌رنامه‌يلى وه زووان كوردى پيشكه‌ش ئه‌كا.
زولال بينييسى وه‌ڕيه‌وبه‌ر كه‌ناڵه‌گه باس له‌وه ئه‌كا ك حاڵ حازر نزيكه‌ى 50 كارمه‌ند له كه‌ناڵه‌گه كار ئه‌كه‌ن و له‌ناونيانش عه‌ره‌ب وجوود ديرێد و له ماوه‌ى 24 سه‌عات كار ئه‌كاو فيشتر له 25 به‌رنامه‌ى سياسى و رووشنهويرى و كومه‌ڵايه‌تى وه هه‌ردوگ زووان كوردى و عه‌ره‌بى له‌تى پيشه‌ش ئه‌كريه‌ێد و هه‌وڵ ئه‌وه ئه‌يه‌ن ده‌نگ كورد بڕه‌سننه جه‌هان.
