(گورزم تا) وه‌رزشیگ (فه‌یلی)انه‌س
دیاره‌و له‌وانه‌یش (چویزان و كڵاوڕفنه‌كى و پاڵان و چه‌وشاره‌كى و زه‌ڕه‌مشته‌كى و سوار سوار )و هونه‌ره‌یل تر ، وه‌لى وه‌ل ئه‌وه‌یشا له‌مه‌یدان وه‌رزشیشه‌وه ئیمه جویر كورده‌یل فه‌یلى له‌شان ملله‌ته‌یل تر بیبه‌ش نه‌ویمنه له‌دروسكردن وازییگ سه‌روه‌خوه‌مان ك له‌باوگ و باپیره‌یلیمان ئه‌ڕامان مه‌نده‌سه‌جى و دویر نیه مه‌ردمان بیگانه ئى وازیه له‌ئیمه‌وه جیواز كردوین ئه‌را ولاِته‌یل خوه‌یان ك ئیسه بویه‌سه وازییگ جه‌هانى.
(گورزم تا) ئى وشه یا كه‌لیمه كوڵه‌وكریاگ ئه‌و رسته یا جومله‌سه ك ئویشیگ (هه‌واى گورزم تا كوورا چووگ)یه‌یش وه‌و مه‌عنا ك وه‌ختى وه گورزه‌گه ده‌یگ له‌تووپه‌گه تا كوورا چووگ ؟ ك وه‌دریژایى ڕووژگار له‌لى كوڵه‌و كریاگه‌و بویه‌سه (گورزم تا).
ئى وازیه ك ئیسه ئویشنه‌پى (بیسیبوڵ – Baseball) تاریخى له‌لاى كورده‌یل فه‌یلى ناوچه‌ى خانه‌قى و ده‌وروه‌رى چووگه‌وه ئه‌را وه‌رجه چه‌ن سه‌ده‌یگ وه‌رجه ئیسه ، چوینكه وه‌گووره‌ى قسه‌ى ئه‌و پیاوه‌یل گه‌ورا ك ئیسه فره‌یگ له‌لیان چیه‌سه ڕه‌حمه‌ت خوداو له‌وانه‌یش (مه‌لا وه‌یسمراد و كه‌لاى حه‌سه‌ن و نه‌یاز ڕه‌زا)و كه‌سه‌یل تر ك خه‌ڵك خانه‌قى بوین و نیشته‌جى ئاوایه‌یل ده‌یشت شاره‌گه بوین له‌سه‌ره‌تاى ساڵه‌یل هه‌فتاى سه‌ده‌ى وه‌رین باس ئى وه‌رزشه كردنه ك له‌باپیره گه‌ورایلیانه‌وه ئه‌ڕایان مه‌ندویگه جى. ئمجا یه‌كیگ له‌و پیاوه‌یله ك مه‌شق ئى وه‌رزشه كردگه ناوى (مه‌لا وه‌یسمراد) بوى و هه‌زاران ڕه‌حمه‌ت له‌قه‌ورى وتیاگ باپیره‌میش وازیزان خاسیگ بویه‌و ناودار بویه له‌ى وه‌زرشه . هه‌ر وه‌گووره‌ى ئه‌وه‌یش ئویشیم ئى وه‌رزشه وه‌رزشیگ فه‌یلیانه بویه‌و كورده‌یل فه‌یلى ئى وازیه دامه‌زراننه چوینكه ئه‌گه‌ر بچیمنه دویاوه ئه‌را تاریخ و ساڵ له‌دایگبوین هه‌ر یه‌كیگ له‌خود ئى پیاوه ك له‌ساڵ 1918 هاته‌سه دونیاو باوگیشى شایه‌ت ئه‌وه‌نه‌ى خوه‌ى عومر كردگه‌و باپیره‌یشى هه‌ر ئه‌وه‌نه ، ك مه‌عناى ئه‌وه‌سه وه‌رجه ئه‌وه‌ك له‌وڵاته‌یل یه‌كگرتگ ئه‌مریكا له‌ساڵ 1845 ئى وه‌رزشه باریه‌یگه كار له‌لاى ئیمه‌ى كورده‌یل فه‌یلى زویتر له‌و تاریخه ئى وازى وه‌رزشیه دامه‌زریاگه‌و هاوریاسه كار ، هه‌ر له‌وه‌ر ئه‌وه‌یش ئویشیم هه‌ر له‌بنه‌ڕه‌ته‌وه ئى وازیه له‌كورده‌یل فه‌یلى ناوچه‌ى خانه‌قى و ده‌وروه‌رى سه‌رچه‌وه گرتگه . شیواز ئى وازیه ئه‌وه‌سه ، ك وازیزانه‌یل بویانه دو ده‌سه‌وه ، ده‌سه‌یگیان وه خه‌تمانه‌شیر له‌سه‌ره‌تاوه تووپه‌گه كه‌فتیاگه ده‌سیان ، تووپه‌گه‌یش له‌نه‌و قایم و له‌ژیر نه‌وه‌گه‌یشه‌وه لاسیك دروسكریاگ بوى و چه‌نه پرتقاڵیگ ، ئمجا ده‌سه‌ى یه‌كم گورزیگ دارین ئه‌وه‌نه‌ى یه‌ك مه‌تر هاوردیانه كار و ته‌نیا هه‌ر یه‌ك گورز ئه‌را ئى تیمه یا فه‌ریقه‌گه‌و یه‌ك گورزیش ئه‌و تیمه‌گه گردیانه‌ده‌س له‌وه‌خت وه‌شانن تووپه‌گه‌و هه‌ر جاریگ و یه‌كیگ له وازیزانه‌یل گرتیانه‌ى ده‌س تا تووپه‌گه وه‌پى بووه‌شنیگ ، هه‌ر وه‌ختیگیش تووپه‌گه بیاتاگ له‌زه‌وى و كه‌س نه‌گرتیاگه‌وه‌ى ئه‌وه خاڵ یا نوخته‌یگ توومار بویاگ ئه‌و تیمه ك تووپه‌گه وه‌شانیان ، هه‌ر وه‌ختیگیش فه‌ریق دویه‌م تووپه‌گه وه‌ده‌س بگردانه‌وه ئه‌وه نوره‌ى ئه‌یان هاتیاگ و تووپه‌گه كه‌فتیاگه ده‌سیان و تا بكه‌فتیاگه زه‌وى هه‌ر وه‌ده‌س خوه‌یانه‌وه بوى و هه‌ر خاڵ توومار كردیان.
وه‌لى ئى وازیه له‌وه‌ختیگ جیواز بویه ئه‌را وڵاته‌یل تر و ناوى نریاگه (بیسبۆل) قانوون تازه‌تر ئه‌ڕاى دانریاگه‌و كه‌مه كه‌مه وه‌گووره‌ى ڕووژگار بویه‌سه وازییگ جه‌هانى ، ئمجا ئى وازیه ئیسه له‌وڵاته‌یل جویر كه‌نه‌دا و مه‌كسیك و كوباو كوومار دۆمنكان و په‌نه‌ماو فه‌نزویلا و یابان و تایوان و كوریا خوه‌شه‌ویس بویه ك هه‌رچه‌نى جویر تووپ پا ناوبانگى فره‌یگ نه‌یریگ ، وه‌لى جار له‌یوا هه‌س وه‌رده‌وامه‌و هه‌ر وازییگى (2)ڕووژ دریژه دیریگ و پیكهاتگه له (9) وچان (شوگ) و ته‌نیا یه‌ك كه‌سیش تویه‌نیگ وازیه‌گه ئه‌نجام به‌یگ. وه‌هه‌ر حاڵ تویه‌نیم بویشیم ئى وازى وه‌رزشیه ك له‌لاى كورده‌یل فه‌یلى ناوى نریا (گورزم تا) وه‌رزشیگ فه‌یلیانه‌س ك ئیسه بویه‌سه وازییگ جه‌هانى.
