په‌ند پیشینه‌یل و قسه‌یل نه‌فدار ئاده‌میزاد(عراق وه‌نموونه‌)

په‌ند پیشینه‌یل و قسه‌یل نه‌فدار ئاده‌میزاد(عراق وه‌نموونه‌)
2010-09-27T07:13:41+00:00

له‌وانه‌یش ئه‌را ئامووژگاریكردن یا نیشانداین و گرتنه‌وه‌ر ڕیگه‌ى خاس و دروسیگ  و دویر له‌كیشه‌و گرفت و په‌شیمانى ، چوینكه‌ پیشینه‌یل خاوه‌ن ئه‌زموون كوومه‌ڵایه‌تى راس و جوانیگ  بوینه‌ له‌ژیان و قسه‌یل ته‌ڵایى و نه‌فداریان جویر دانه‌ مروارى ئه‌ڕامان هیشتنه‌سه‌جى.

بیگومان دونیاى ئمڕوومان پڕه‌ له‌ژان و كیشمه‌كیش و ڕویداگ ناخوه‌ش و مه‌ردمه‌یل ئى وه‌ختیشه‌ له‌فره‌ چشت دژ وه‌یه‌كترن و نه‌گونجیان ئاشكرایگ  هه‌س له‌ناونى گرووپه‌یل و لایه‌نه‌یل جووراو جوور ك یه‌یش بویه‌سه‌ بویه‌سه‌ مایه‌ى ئه‌وه‌ك وڵات له‌نائارامى و ناسه‌قامگیرى بژیه‌یگ  و كه‌سه‌یل ساده‌و بى وه‌ى بوونه‌ قوربانى ئه‌وانه‌ك هه‌میشه‌ دژایه‌تى یه‌كترى كه‌ن و هه‌ر توان دونیا له‌به‌رژه‌وه‌ندى خوه‌یان بووگ ، وه‌لى لایه‌نیگ  تر هه‌س نیه‌یلیگ  ئه‌واكانتر بچنه‌ گژ یه‌كاو له‌یه‌كتر بكوشن یا مرافه‌و ده‌مه‌قاڵ دروس بكه‌ن ، ئمجا له‌ى باوه‌ته‌وه‌ پیشنه‌یل وتنه‌ (ئه‌گه‌ر لویت نه‌وگ چه‌و چه‌و خوه‌یگ ) . ئمڕوو له‌ى عراقیشه‌ كورد نه‌خش یا ده‌ور خاسیگ  دیریگ  و هه‌میشه‌ ها له‌هه‌وڵ ئه‌وه‌ك ئاشتى و ته‌بایى یا گونجیان باریگه‌ ده‌س له‌ناونى لایه‌نه‌یل ناكووك و گشت وه‌ختیگ  لایه‌نه‌یل تر عراقى په‌نا به‌نه‌ وه‌ر ئه‌قڵ حه‌كیمانه‌ى كورد ئه‌را هه‌ر ناكووكى و گرفتیگ  ك ڕویده‌یگ  له‌ناونیان ، ك یه‌یش مایه‌ى فه‌خر و شانازیه‌ ئه‌را ملله‌ته‌گه‌مان دو تایفه‌ یا دو هیز سیاسى ناكووك بخه‌یگه‌ یه‌ك و نه‌یلیگ  هویچ كیشه‌یگ  دروس بووگ له‌ناونیان.

له‌باوه‌ت مه‌سه‌له‌ى كیشمه‌كیش و حوكمكردن وڵاتیش فره‌جار دوینید هه‌ر وڵاتیگ  په‌شیوى و ناسه‌قامگیرى بكه‌فیگه‌تى وه‌سه‌به‌ب به‌رژه‌وه‌ندى تاكه‌كه‌سى و ته‌نیا حزبیه‌وه‌ ، ئمجا پیشینه‌یل وتنه‌ (دو پاشا له‌بان یه‌ى گڵیم شوونیانه‌و نیه‌وگ) یه‌یش ئمڕوو له‌ى عراقه‌ وه‌ئاشكرا دیاره‌و مه‌سه‌له‌ى (من و من) سه‌ر له‌ملله‌ت بیتاوان شیوانگه‌و یه‌یگه‌رى به‌عزیگ  له‌ سه‌ركرده‌یل له‌یوا كردگه‌ ڕووژانه‌ مه‌ردم عراق بوونه‌ قوربان ته‌قینه‌وه‌و كاره‌سات فره‌یگ  . یا فره‌جار له‌ده‌م ئه‌ى وئه‌و ژنه‌فیم و ئویشن (ئى خه‌ویره‌ ئاو  فره‌ كیشیگ ) ، به‌ڵى ئى په‌ندیشه‌ هه‌ر ڕاسه‌و ئه‌وه‌سه‌ له‌ى عراقه‌ گشت ڕووژیگ  هه‌ر كوشت و كوشتاره‌و سته‌م و مه‌حاڵه‌ وه‌جاریگ  به‌رقه‌راى و ئاسووده‌یى دروس بووگ و جه‌نگ  و مرافه‌ كووتایى وه‌پى بایگ  و ناچار بایه‌سه‌ ئى جه‌وره‌ بكیشیم ، چوینكه‌ هه‌ر كه‌سیگ  وه‌لاى خوه‌یا كیشیگ  و جاریگ  نیه‌زانن مه‌سه‌له‌ى فیدراڵى یا دیموكراسیه‌ت چه‌نیگ  نه‌فداره‌ ئه‌را ژیان پڕ له‌به‌خته‌وه‌رى . په‌ندیگ  تر هه‌س ئویشیگ  (ئاو له‌هه‌ر كانییگ  خواردید لێڵى مه‌كه‌) وه‌لى دوینید ئمڕوو له‌ى عراقه‌ ك كانیاو خه‌یر وبه‌ره‌كه‌ت و سه‌رچه‌وه‌ى درامه‌ته‌ كه‌سه‌یلیگ  نه‌ف له‌لى وه‌رگرتنه‌و ده‌س گرتنه‌سه‌ بانیا مه‌گه‌ر هه‌ر خوه‌یان بزانن چ جووریگ  و چوین خوه‌نه‌ى و به‌نه‌ى ، وه‌ل ئه‌وه‌یشا دوینید چكه‌چك بنه‌گه‌یشى لێڵ كه‌ن و نیه‌یلن ملله‌ت نه‌ف له‌لى وه‌ربگریگ  و ئه‌گه‌ر گاز و به‌نزین و نه‌فته‌گه‌س چه‌ن قاتیگ  زیاى كریاگه‌و دزیه‌گه‌ى خوه‌یان وه‌پى شارنه‌وه‌ ، ئه‌گه‌ریش مه‌سه‌له‌ى خوه‌راك (تموینیه‌) جویر سه‌ده‌قه‌ى سه‌ر وه‌پى كردنه‌و مانگیگ  نیه‌ له‌لى نه‌وڕن و خوه‌یانیش له‌خاسترین ژیانیگ  ژیه‌ن و قرقه‌و دانه‌ له‌دزى و تاڵانى . ئومیده‌واریم ژیان ئاده‌میزاد پڕ بووگ له‌وژدان پاك و بیگه‌رد ، ئه‌یاكه‌ خه‌یر وه‌ ئه‌واكه‌ بتوایگ  ، چوینكه‌ دونیا تاسه‌ر ئه‌ڕا كه‌س نیه‌.

Shafaq Live
Shafaq Live