وه‌فد هاوبه‌شيگ له ده‌زگای شه‌فه‌ق و رێكخراو ماڵ كورد له فێستيڤاڵ رووشنهويری كوردی يه‌كم له به‌غدا به‌شداری كرد
2009-10-08T07:27:56+00:00
شه‌وه‌كی دويه‌كه و له هۆڵ قه‌رته‌به‌ی هۆتێل مه‌نسوور ميليا چالاكيه‌يل فێستيڤاڵ رووشنهويری كوردی يه‌كم له به‌غدا ده‌س وه‌پی كرد . له‌سه‌ره‌تای فێستيڤاڵه‌گه مامۆستا تاهر ناسر حه‌موود وه‌كيل وه‌زاره‌ت رووشنهويری وته‌‌يگ پێشكه‌ش كرد و له‌ی وته‌يه له ئاماده بويه‌يل پێشوازی كرد و ئشاره‌ت كرده سياسه‌ته‌يل رژيم به‌عس وه‌رين ئه‌را ژيرپا خستن ناسنامه‌ی رووشنهويری پێكهاته‌يل ملله‌ت عێراق و په‌خشه‌و كردن رووشنهويری به‌عسی دويا كه‌فتگ و ديكتاتۆری و يه‌ك حزبی و يه‌ك سه‌رۆكی له بان ملله‌ت عێراق وه‌لی نه‌تويه‌نست سه‌ربكه‌فيگ . حه‌موود له‌دريژه‌ی قسيه‌يله‌گه‌ی ئشاره‌ت كرده قويلايی برايه‌تی له‌ناونی كورد و عه‌ره‌ب و وت: كويه‌يل كوردستان له رووژگاره‌يل سه‌خت ده‌سه‌ڵات به‌عس شوفێنی له گشت خه‌باتكا‌ره‌يل عێراقی له كورد و عه‌ره‌ب و توركمان و كلد و ئاشوور پێشوازی كرد و هه‌رێم كوردستان له‌شوون راپه‌ڕين ساڵ 1991 بويه شوون ئه‌منيگ ئه‌را هه‌ر هاوڵاتی وه‌شه‌ره‌ف و خه‌باتكا‌ر عێراقی . ناوبرياگ له كوتايی وته‌گه‌ی له وه‌زاره‌ت رووشنهويری له هه‌رێم كوردستان وه‌خاتر هاوكاری وه‌ل وزاره‌ته‌گه‌ی وه ئامانج به‌رپايی ئه‌ی فێستيڤاڵ رووشنهويريه ته‌شه‌كۆر كرد . شايان باسه له له‌دريژه‌ی ئاهه‌نگه‌گه چه‌ن چالاكیگ هونه‌ری جوور هه‌ڵپه‌ڕگه‌و گورانی كوردی له‌لايه‌ن تيپ رباگ كوردی له پارێزگای دهۆك پێشكه‌ش كريا . يه‌يش مه‌نگه بويشيم ك وه‌فد هاوبه‌شيگ له‌لايه‌ن ده‌زگای رووشنهويری و ره‌سانن كورده‌يل فه‌يلی و رێكخراو ماڵ كورد فستيڤاڵه‌گه به‌شداری كرد .
