وه‌ختى ژانه‌یلمان له هویره‌و ئه‌وه‌یمن
هه‌ریه‌ك لیان تایبه‌تمه‌ندى خوه‌ى دیرى.
یه‌كیگ له‌و هاوبه‌شیه‌یله ئه‌وه‌سه ك پایته‌خت هه‌میشه ناوه‌ند یا مركز سازداین بڕیار سیاسیه و له‌ورا وڵاته‌گه وه‌ڕیه‌و ئه‌بریه‌ى وهه‌ر له‌ورایش پلانه‌یل ستراتیژى و گشتى دائه‌نریه‌ى، پایته‌خت فره‌جار منێده ئاسنڕه‌وایگ ئاره‌زوومه‌نده‌یل و خاوه‌ن به‌هره‌یل و وزه‌داره‌یل وه‌ره‌و لاى خوه‌ى كیشێ، فره‌كه‌س له‌تى گوم بوون و فره‌یش ناودرارن.
ئه‌گه‌ر باس به‌غدا بكه‌یم ك بویه‌سه پایته‌ختیگ بى ده‌روازه ؛ و شه‌ڕ وه گشت جووره‌یلى، سه‌خت نیه ئه‌راى بایده‌و ناوى؛ و په‌ناگه‌ى ئارامیگ نیه ئه‌را كاڵین بزگه‌خه‌نه، ده‌یان ساڵه بویه‌سه ناوه‌ند بڕیارداین دیكتاتۆر و جه‌لعووده‌یل... دویاى ڕمیان ڕژیم به‌عس و له‌شوون ئه‌و په‌لامار دڕندانه‌ى تیرۆرسمه، شاره‌گه هه‌رچى گه‌ڵا و په‌ل و پوو ژیار و ئاشتى داشت ڕویتگیاوه و بویه گه‌وراترین پایته‌ختیگ چه‌كدار ،هه‌زاران كێلومه‌تر دیوار كۆنكه‌ریتى بى ده‌نگئه‌را داوڕیان وه‌ل هاوسایه‌یله‌و له‌تى بڵینه‌و كریاس، و خاڵه‌یل وشكنینیش تاكه ئه‌ركیان وه‌خت كوشتن و ئه‌عساب سزانن و په‌كخستن وزه‌ى هه‌زاران جایڵ و جوانه ك پرتاڵ سه‌ربازى پووشانه، گشت ئه‌و هه‌وڵ و ته‌قه‌لا و ئاماده‌كاریه‌یله دیرى وه‌ئاسانى تویش ڕمیان ئه‌یه‌ید و له‌به‌ین چوود له‌وه‌رده‌م پخه‌كردنیگ شه‌ڕفرووشه‌یله‌و.
وه‌خت فره‌یگه چه‌و به‌غدا خه‌و نه‌ویه‌سه میوانى و دوئه‌وه‌نه‌یش وه‌خت، خوه‌شى و شادى له‌كیس ئیمه‌ى فه‌یلى چوى و له‌ناو كویچه‌و بازاڕه‌یل و گه‌ڕه‌كه‌یل گوم بویمن و بویمنه شوون میلكان شاریگ ئه‌وسا شانازى وه فره‌جوورى مه‌ردمى ئه‌كرد... ئیمه ئومیدوار بویمن له ژانه‌یلمان ڕه‌ها بویمن وه‌لى ئه‌لئان له ڕوى ئه‌وانه‌گ ئاگر شه‌ڕ داخیان كردیه، قرچه‌و كزه‌ى دڵه‌یل خوه‌مان له هویره‌و ئه‌وه‌یمن.
له شاریگ ده‌رنده‌یشت جوور به‌غدا، ك وه‌ئاسانى شه‌ڕ ئه‌تویه‌نى له هه‌ر گووشه و په‌نایگ خوه‌ى هه‌شار بیه‌ید و ئه‌تویه‌نى هه‌ر وه‌ختى بتواى سه‌رخوه‌ى هه‌ڵبگرى و بدراى؛ وه‌لى وه‌نسبه‌ت ئیمه دى وه‌خت هه‌شارهه‌شاره‌كى نه‌مه‌نیه، چوینكه ئى شار تاكه شوون زێد و ماوامانه و دى جییگ تر نه‌یریم، تاكه شوونیگه ك تویه‌نى له واوه‌یلى و مه‌ینه‌تى قورتارمان بكا... وه‌لى ئه‌لئان منێده كه‌شتییگ خه‌ریكه خوه‌ى و سه‌رنشینه‌یلى ژیراو بوون، ئه‌ى دى كى نه‌جاتى ئه‌دا؟!
