وازيه‌يل كورده‌واری ئه‌ڕاچه نه‌مه‌ندنه ؟
مه‌ته‌ڵ و په‌ند پيشينه‌يل و نوكته و گه‌مه‌و چشته‌يل تر گشت ئه‌يانه وه‌ك شوناسنامه‌يگ موڵك نه‌ته‌وه‌ی كوردن . ئمجا با وه‌ك نموونه باس له وازی جووراوجوور كورده‌واری بكه‌يم ك ئی وازيه‌يله خوه‌شترين وه‌ختن ئه‌را مناڵ و جايه‌ڵه‌يل و تاراده‌يگيش پيره‌يل . وازی كورده‌واری به‌رهه‌م ئه‌و كه‌سه‌يله‌نه ك پيشكه‌شی كردنه‌سه نه‌وه‌يل دويای خوه‌يان وه‌ك دياری گرانقيمه‌ت ژيان .
ئه‌گه‌ر بايگ و بپرسيم ئه‌راچه ئيسه ئه‌و وازيه‌يله كه‌مه‌و بوينه يا نه‌مه‌ندنه و كه‌سيش باسيان نيه‌كه‌يگ ؟ هووكار يا سه‌به‌بيان فره‌س ، وه‌لی چاره‌سه‌ر نيه‌كريه‌ن ، له‌وانه‌يش موهمترين ئه‌و هووكاره‌يله وه‌ل زيايبوين شماره‌ی مه‌ردما ده‌س وه‌پيكه‌يگ ك ئه‌ويش ئه‌رك ژيان قورسه‌و كه‌يگ له‌بان مناڵه‌يل و جايه‌ڵ ئه‌را خه‌ريكبوينيان وه ژيانيان و داوڕيانيان له‌ی سامان گه‌ورا . وه‌ل ئه‌وه‌يشا له‌ی سه‌رده‌مه پيشكه‌فتن زانسته‌يل خوه‌ندن و په‌يابوين وه‌سيله‌ی ئه‌ڵكترۆنی و ته‌كنۆلۆجيای سه‌رده‌م و هووكاره‌يل ئاسانكه‌ر وه‌ك سه‌ياره‌و ته‌له‌فزيۆن و كاره‌باو چشته‌يل تر له‌يوا كردنه ك مناڵه‌يل و جايه‌ڵه‌يل خه‌ريك ئی چشته‌يله بوون و كه‌مه كه‌مه وازيه‌يل كورده‌واری گوم بكه‌ن و دوياخريش بفه‌وتننه‌ی .
ئه‌وسا وازيه‌يل فره‌يگ له كورده‌واری وجوود داشت و ده‌سه ده‌سه مناڵه‌يل و جايه‌ڵ جوانه‌يل ده‌رچيان و تا ديره وه‌ختيگ خه‌ريك بوين و گه‌مه كرديان ، وه‌لی ئيسه ئه‌و گه‌مه‌يله له‌هويره‌و برياگه‌و تا تيه‌يگ زياتر له‌هويره‌و چووگ مه‌گه‌ر جارجاريگ له ناو ئاوايه‌يل بكه‌فيگه وه‌رچه‌و ك ئه‌ويش فره وه‌كه‌می وجوود ديريگ وه‌ك (نيشانگرتن) ك ئی وازيه ده‌ور فره‌يگ داشت له‌ناوكوومه‌ڵگايه‌يل كورده‌واری و فره‌كه‌س حه‌ز له‌ی وازيه كردياگ ، ك يه‌يش وه‌چه‌ن چشتيگ كريه‌يگ وه‌ك : چه‌ك ، دارلاسيك (تيركه‌مان) ، كوچگ وه‌شانن . فره‌جار ئی وازيه مه‌رجگره‌و له‌بانی كرديان له‌بان خواردن يا له‌بان هه‌ر چشتيگ تر ساده‌ی سه‌رده‌ميانه ، ئمجا فره كه‌س له‌ی وازيه ناوبانگ له‌ناو كوومه‌ڵگا ده‌ركردنه وه‌بوونه‌ی ئه‌وه‌ك ده‌س و تيريان له نيشانگرتن راس بوی يا هونه‌ر نيشانشكاننيان فره جوان بوی و گره‌وه‌گه برديانه‌وه ، وه‌لی ئيسه ئه‌و داب و نه‌ريت و كلتوور كوردايه‌تيه نه‌مه‌ند و ئه‌گه‌ريش بووگ فره كه‌مه .
