هویچ ڕوفاتیگ كوه‌یتى له عیراق نه‌مه‌نیه، ئه‌ى ڕوفات جوانه‌یل فه‌یلى چه‌وه‌پى هات؟؟!!
ئاسایش جه‌هانى له خول یا ده‌وره‌ى حازریى سه‌فیر مه‌كسیك له نه‌ته‌وه‌یل یه‌كگرتێ كلاود هێله‌ر وت ك هویچ پاشمه‌نییگ هاووڵاتیه‌یل كوه‌یتى یا لایه‌نییگتر له عیراق له مانگ ته‌شرین دویم وه‌رینه‌وه تا ڕووژ ئیمڕوو.نه‌دوینریاسه‌وه".
هه‌واڵه‌گه زیاتر ئویشێ: "ئه‌نجوومه‌ن ئاسایش جه‌هانى له وه‌خت دوباره‌له‌یه‌كه‌وداین خولانه یا مراجه‌عه‌ى ده‌ورى خوه‌ى ئه‌را بارووه‌زع ناونى عیراق و كوه‌یت وت ك كوه‌یت نزیكه‌ى یه‌ك ملیۆن دۆلار خه‌رج كردیه له خاتر مینه‌كردن ڕوفات هاووڵاتیه‌یلى له ناو قه‌ورسانه‌یل ده‌سه‌جه‌مى عیراقى وه ڕیگه‌ى به‌رنامه‌ى كوومه‌ك كردن هاوبه‌شیگ له ناونى عیراق و نویسینگه یا مه‌كته‌ب خزمه‌تگوزارى نه‌ته‌وه‌یل یه‌كگرتێ".
شایان باسه له دویاى ئه‌وه‌گ هێزه‌یل ڕژیم دیكتاتۆرى به‌عسى سه‌دامى له كوه‌یت وه‌زوور ده‌ركریان شماره‌یگ هاووڵاتى كوه‌یتى گردن و خستنه‌یانه زیندانه‌یل عیراق و گومیان كردن و حكوومه‌ت كوه‌یتیش وه گشت هه‌وڵ و ته‌قه‌لایگه‌و كه‌فته مینه‌یان و هانا برده ناونه‌نده‌یل جه‌هانى و پویل فره‌یگ خه‌رج كرد و له ئاكاما ڕوفات زوورمیان له ناو قه‌رسانه‌یل وه‌جه‌م له ناوچه جیاجیاگان عیراق دوینریانه‌وه، ئه‌یه‌یشه ئه‌وه ئاشكرا كه‌ید ك حكوومه‌ت كوه‌یت چه‌نى بایه‌خ ده‌یده ئى مه‌سه‌له‌ى ئنسانیه و هاوخه‌مى خوه‌ى وه‌ل كه‌سوكار ئى قوربانیه‌یل بى گوناهه كه‌ید و هویچ كه‌مته‌رخه‌مى و دریخى نیه‌كه‌ید ئه‌را ڕه‌سین وه ڕاسى چاره‌نویسیان.
ئیمه له‌یرا هه‌ق خوه‌مانه ئه‌گه‌ر پرسیاره‌یل گه‌ورایگ ئاراسته‌ى گشت ناوه‌نده ناوخۆیى و ده‌ره‌كیه‌گان بكه‌یمن:
1- ئه‌راچه وڵاته‌یل جه‌هان ئى هه‌مكه بایه‌خه ده‌نه هاووڵاته‌یلیان و ئاماده‌ن هه‌رچى دیرن و نه‌یرن بنه‌نه قورت خوه‌شگوزرانى و ئاست زندگانى و ته‌ندروستى و ژیان یه‌كه یه‌كه‌یان؟!
2- ئه‌را ملله‌ت عیراق وه‌گشت پیكهاته‌گانیانه‌و له كه‌وكه‌بیگ تره‌و هاتیه تاگه‌ر خوین ڕووڵه‌یلى وه‌ى جووره هه‌رزان بوود و كه‌س بایه‌خ وه گیان و ژیانیان نه‌یه‌ید و ئه‌و قه‌ورسانه‌یل وه‌جه‌مه ك یه ده‌یان ساڵه جه‌سته‌ى ده‌یان هه‌زار هاووڵاتى بیتاوان گردیه‌سه خوه‌یه‌و، ئه‌گه‌ر ئاشكرایش بكریه‌ن، ته‌ماشاكه‌ید وه‌شیوه‌یگ شه‌لم كوورم و دویر له وه‌كارهاوردن ته‌كنۆڵۆجیاى سه‌رده‌مانه وازكریه‌ن و په‌نا به‌نه شۆفڵ و بیڵ و قوڵه‌نگه‌یل ژه‌نگن ئه‌را دراوردن پاشمه‌نێ سوقان و جنگ و كه‌ل و په‌ل وه‌ریان؟!
3- له لاى گشت كه‌س و لایه‌نیگ مه‌علوومه ك له په‌لاماره دڕندانه‌گه‌ى ڕژیم وه‌رین له سه‌ره‌تاى هه‌یشتاگان سه‌ده‌ى وه‌رین سه‌دان هه‌زار كورد فه‌یلى ته‌سفیر كریان ئه‌را ئیران فڕه‌یان دریا بان سنوور یا حدوود ئیران وه مه‌هانه‌ى ته‌به‌عیه‌تیان وه‌و وڵاته و نزیكه‌ى 15 تا 17 هه‌زار له جایڵ و جوانه‌یلیان گله‌و دریان و زندانى كریان و دویاخر ئه‌وه ده‌ركه‌فت ك گشتیان وه‌شیوه‌یگ وه‌حشیانه كوشیانه و كریانه‌سه قوربانى تاقیه‌وكردن چه‌كه‌یل كوومه‌ڵكوژى كیمیاوى و بایۆلۆجى... ئایا مه‌عقووله ك تا ئیسه ته‌نانه‌ت ته‌رم تاكه كه‌سیگیانیش نه‌دوینریاسه‌وه و كه‌سیش كه‌مترین هه‌وڵ و ته‌قه‌لا نه‌یایه ئه‌را ڕه‌سین وه ڕاسیه‌گه‌ى ئه‌وه‌گ وه‌سه‌ریان هات و چمانى ئى هاووڵاتیه‌یل بى تاوانه عیراقى نین و نه‌خشوده‌ور سه‌ره‌كى خوه‌یان نه‌یاشتن له بیناكردن ئى وڵاته؟!
4- هه‌تا ئه‌گه‌ر وه‌وه قه‌بوول بكه‌یم ك ئه‌ى كورده‌یل فه‌یلیه له‌لاى حاكمه‌یل كوێنه‌و نووه‌و عیراقى نین، مه‌گه‌ر ئه‌یانه ئنسان نین و وه‌ك ته‌مام ئنسانه‌یل جه‌هان خوین و گووشت و ئه‌عساب و هس و شعوور نه‌یرن، ئه‌ى ئیوه چوین تویه‌نین و دڵدان چوین نیه‌ته‌ره‌كیه‌ى له ڕوى قرچه‌وكزه‌ى دڵه‌یل داڵگه‌یل ڕووڵه كوشیاى و چه‌وه‌ڕى و ئه‌سر چه‌وه‌یل باوگه‌یل پیر و په‌ك كه‌فتێ؟!
یانه پرسیاره‌یلیگن پڕ وه‌ده‌م هاواریان ئاراسته‌ى وژدان ته‌مام وژدانداره‌یل جه‌هان كه‌یمن...
