هاووڵاتيبوين و ئنتما
كيشمه‌كيش وه‌و لاوه هويچ تر ناورده‌سه ده‌س .
رژيمه‌يل يه‌ك له شوون يه‌ك عراقيش وه ئه‌قڵيه‌ت په‌ككه‌فتگ خوه‌يان هه‌ميشه هووكار ئه‌و كيشه‌و قه‌يرانه‌يله بردنه‌وه ئه‌را هووكار ده‌ره‌كی و دروسكرياگ له‌لايه‌ن بيگانه‌وه ، وه‌لی وه‌و ئه‌قڵێه‌ته ك باوه‌ڕ وه‌هويچ هوير و فكره‌يگ تازه‌و هاوچه‌رخ نه‌ياشتگه‌و نه‌تواستنه باوه‌ڕ وه ئه‌وه بكه‌ن ك عراق وه‌ك وڵاتيگ وه زوور وه‌پيه‌ولكياگ فره‌نه‌ته‌وه‌و فره مه‌زه‌وه ، هه‌ر له‌وه‌ر ئه‌وه‌يش نه‌تويه‌نستنه وه‌ك خواستيگ مقه‌يه‌تی له ئارامی و ئاسايش وڵات بكه‌ن ،وه‌ل ئه‌وه‌يشا هه‌ميشه وه زوڵم و زوور فره‌يگه‌وه ته‌ماشای هاووڵاتيه‌يل جياواز له‌خوه‌يان كردنه له‌ڕوی نه‌ته‌وه‌يی و مه‌زهه‌بيه‌وه‌و جوير دوشمنيگ ته‌ماشای هاووڵاتيه‌يل غه‌يره خوه‌يان كردنه‌و گشت وه‌ختيگ له‌ناو دام وده‌زگايه‌يل حكوومه‌ت چه‌وديری يا مراقبه‌يان كرياگه‌و هه‌ر وه‌ختيگيش بتواسيان سزايان درياگه .
ئه‌و وه‌زع وه‌رينه راسه‌وخۆ بويه وه‌سه‌به‌ب ئه‌وه‌ك نه كاريگ نه‌يش پيشكه‌فتنيگ سياسی و ئابووری و رووشنهويری و كوومه‌ڵايه‌تی بايگه ده‌س ، هه‌ر ئه‌و ئه‌قڵێه‌ته گشت توانای خوه‌ی خسته‌سه كار ئه‌را دويره‌وخستن جياوازيه‌يل له به‌شداريكردن كرده‌وه‌يی له‌ده‌سڵات و داناين سياسه‌ته‌يل ده‌وڵه‌ت عراق .
هه‌ڵبه‌ت يه‌يش له‌يوا كردگه رووح ئنتمابوين ئه‌را عراق له‌یلا مه‌ردمانيگ كزه‌و بكه‌يگ و جووره فكره‌و مه‌يليگ په‌يا بووگ ك هاوشيوه نه‌ون وه‌ل فكره‌يل نيشتمانيا. ئی قسه‌يله ك ئشاره‌ت وه‌پی كرديم ئه‌را سه‌رده‌م وه‌رجه ئازادی عراق بوی ، چوينكه له‌شوون ئازادی قه‌يريگ له هيزه‌يل سياسی عراق له مه‌عنای ئه‌و جووره ئاينده‌ی عراق و مه‌ندنه‌وه‌ی يه‌كپارچه‌ييه نه‌ڕه‌سينه‌وه‌و مه‌ترسی كه‌فته دڵيان و نه‌گه‌ردينه شوون ريگه‌چاره‌ی گونجياگ ، ئه‌و هيزه‌يل سياسيه له فره رويه‌وه جياوازن له‌يه‌كتری و هيمان يه‌كگرتنيگ فكری و ئايدۆلۆجی و نه‌زه‌ری نيه له‌ناونيان ئه‌را چاره‌سه‌ر ئه‌و كيشه‌و گرفته‌يله ك سياسه‌ته‌يل ره‌گه‌زپه‌رسی وه‌رين له‌عراق چه‌سپاننه‌ی و هيمان گام كاريگه‌ر نه‌نرياگه‌و به‌رنامه‌ی خاسيگ دانه‌نرياگه نه له‌لايه‌ن دام و ده‌زگايه‌يل حكووميه‌وه نه‌يش له‌لايه‌ن هيزه‌يل سياسيه‌وه بيجگه كورد ، چوينكه ته‌نيا كورد له‌لای خوه‌يه‌وه هه‌وڵ چه‌سپانن چه‌مك هاووڵاتيبوين ده‌يگ و خه‌مخوه‌ر ئه‌وه‌سه ك رووح ئنتمابوين كوومه‌ڵايه‌تی و سياسی و نيشتمانی بته‌و بكه‌يگ لای هاووڵاتيه‌يل كورد و مه‌ردم عراق و به‌ڵگه‌يش ئه‌را ئی راسيه له‌وراوه كه‌فيگه‌ده‌س ك وه‌جوانی چه‌وديری قسه‌ی سياسی و ديد فكری گشت لايه‌نه‌يل بكه‌يم و گشت كرده‌وه‌و قسه‌يگ له‌يه‌كه‌و به‌يم ، يه‌يش فره نيه‌توايگ ، چوينكه له كه‌ناڵه‌يل ره‌سانن يا ئعلامه‌وه هه‌ميشه هه‌ڵويسته‌يل خوه‌يان خه‌نه‌ڕوی .
