مه‌سه‌له‌ی كورد وه‌بی ئۆجه‌ڵان
و ، وه سسی و نادادپه‌روه‌ری ئه‌نجام بدريه‌يگ ، به‌ڵكوو بايه‌سه وه‌ك خواستيگ ديموكراسی و راسه‌قينه‌و مۆدێرن بناسريه‌يگ ك گشت هاووڵاتيه‌يل وه كورد و تورك و كه‌مايه‌تيه‌يل تره‌وه له‌وه‌كارهاوردن زوان داڵگی و كلتوورو ....چشته‌يل تر يه‌كسان بوون ، وه‌جووريگ كه‌س له‌يوا نه‌زانيگ له ئاسمانه‌وه هاتگه‌و خوداوه‌ند نه‌ته‌وه‌گه‌ی ئه‌و له‌بان نه‌ته‌وه‌يل تر په‌سه‌نكردگه .
ئی قسه‌يله قسه‌ی (يه‌شار كه‌مال) گه‌ورا نويسه‌رو رووشنهويره ، ئه‌و يه‌شار كه‌ماڵه ك هاوعومر كوومار توركياسه‌و ، وه‌دريژايی سێ چاره‌كه سه‌ده‌ی گوزه‌يشت له‌زوورم كيشه‌و ناڕه‌حه‌تيه‌يل كوومه‌ڵگای توركی ئاگادار بويه و چه‌نه‌ها جاريش وه‌سه‌به‌ب ئاشكراكردن و خستنه‌ڕوی ژان و ناڕه‌حه‌تيه‌يل ئاده‌ميزاد توركياوه دوچار سزاداين و زندانيكردن بويه‌سه‌وه .
ئی قسه‌يل يه‌شار كه‌ماڵه رووژيگ له‌شوون ئه‌وه هات ك (له‌يلا زانا) وه مه‌هانه‌ی بانگه‌وازكردن ئه‌را پارت كارگه‌ره‌يل كوردستان له له‌نده‌ن پايته‌خت بريتانيا وه (١٥) مانگ زندانيكردن سزا دريا ، بيگومان ئه‌و بڕيار دادگای توركيا چشتيگ چه‌وه‌ڕيكرياگ بوی ك چوين له‌هه‌ريم (ئيتا)ی جياخواز ئسپانيا چه‌ن قانوونيگ مه‌رزدار ديريگ ئه‌را ريگه‌گرتن له تون وتيژی ، وه‌لی مه‌سه‌له‌ی ئی جاره‌ی له‌يلا زانا فره له‌مه‌سه‌له‌يل ئسپانيا جياوازه‌و بايه‌سه وه‌ك به‌ڵگه‌ی چاره‌سه‌رنه‌كرياگ كيشه‌ی كورد ته‌ماشا بكريه‌يگ و نه‌رمی و ئارامی و بيتاوانی سه‌ركرده‌يل سياسی كورد توركيا ئسپات كه‌يگ .
قه‌يريگ له پارته‌يل سياسی توركيا وه‌پيان له‌يواسه ك بايه‌سه ئه‌را وه‌ديكردن چاره‌سه‌ريگ ئاشتيانه‌و گورج له‌بان چه‌ن وه‌ربه‌س وگرفتيگ باز بيه‌ن و قه‌يريگ له‌ليانيش له‌شوون هه‌ڵسووكه‌فتيگ گونجياگ و په‌سه‌نكرياگ ويڵن و گشت كيشه‌يل كوومه‌ڵگای باشوور خوه‌رهه‌ڵات توركيا له بيچاره‌يی و فه‌قيری و نه‌وين مه‌يدانيگ ئه‌را ده‌رخستن هويروئه‌ڕای چوين جياواز به‌شيگن له هويرپڕحه‌سره‌ت وژان ئه‌و ملله‌ته .
ئايا بايه‌سه جياوازی چه بووگ له‌ناونی قسه‌يل يه‌شار كه‌ماڵ و ره‌فيقه‌يلی ؟ چه‌نه‌ها ساڵه وه‌رپرسه‌يل رۆبۆت ئاسايه‌يل توركيا خه‌ريگ له‌يوكه‌وداين و گفتوگوو فره‌يگن ، وه‌لی هه‌ر رووژيگ چشت تازه‌و مه‌هانه‌ی تازه‌يگ خه‌نه وه‌رده‌م ميديايه‌يل و رای گشتی وه‌پی چه‌واشه كه‌ن ، هه‌ر له‌وه‌ر ئه‌وه‌يش له‌يادگاری هه‌ر تاكيگ كوومه‌ڵگاگه‌مان كتاويگ توومار كرياگه وه‌ك رابه‌ريگ چاره‌سه‌ر. ئمجا له‌يرا مه‌به‌سمان له به‌شداربوين يا به‌شداری نه‌كردن خود ئۆجه‌ڵانه ك ئايا كه‌ی و له چ وه‌ختيگ خواسته ئه‌و سه‌ركرده‌ی زندانيكرياگه باريه‌يگه بان شانۆ يا مه‌سره‌ح گفتوگوو ؟ ئمجا ئه‌گه‌ر بايگ و چه‌وديره‌يل سياسی قسه‌ی وه‌رپرسه‌يل له‌يه‌كه‌و بيه‌ن و به‌راورد يا مقارنه‌ی بكه‌ن وه‌ل په‌يامه‌يل عه‌بدوڵڵا ئۆجه‌ڵانا ك له‌زندانه‌وه له‌ناوڕاس ده‌ريای مه‌ڕمه‌ڕه‌وه ئاراسته‌ی كرده رای گشتی ، بيگومان ئه‌وه ده‌ركه‌فيگ ك په‌يام و قسه‌يل هه‌ردوگلا له كووتايی ره‌سنه يه‌ك و هاوشيوه‌ن ، هه‌ردوگ لايه‌ن حكوومه‌ت و ئۆجه‌ڵان قسه‌يليان وه قانجاز پرووسه‌ی گفتوگووكردن و دانيشتن ئاشتيانه شكيه‌يگه‌وه .
له‌ی قوناغ هسيار ئيسه ك پارت داد و گه‌شه ئه‌گه‌ر مه‌به‌سی ئه‌وه بووگ چاره‌سه‌ريگ ئاشتيانه ئه‌را كيشه‌ی كورد بوينيگه‌وه ، بايه‌سه له‌لای خوه‌يه‌وه كورديگ خاوه‌ن ئه‌زموون ناو پارته‌گه‌ی خوه‌ی بكه‌يگه نوێنه‌رو نوێنه‌رايه‌تی دانيشتنه‌يل بكه‌يگ وه‌ل لايه‌ن په‌يوه‌نديدارا ، ك دوياخريش چاره‌سه‌ريگ بكريه‌يگه دی ئه‌را ئۆجه‌ڵان له‌و زندانيه‌وكووتايی وه زوان چه‌ك باريه‌يگ .
