كومه‌ڵه‌ی چالاكوانه‌يل سياسی كوردستان خوارگ: يه‌كگرتنمان، سه‌ركه‌فتنمانه
پيرۆزبايی له كورده‌يل فه‌يلی كرد، يه‌يش ده‌ق برووسكه‌گه‌س:
په‌يام كومه‌ڵه‌ی چالاكوانان سياسی كوردستان خوارگ سه‌باره‌ت وه‌ناسانن دۆسیه‌ی كورده‌يل فه‌يلی وه‌ژینۆساید
براوخوه‌شكه‌يل سته‌مديه‌ی كورد فه‌يلی
خانواده‌يل سه‌رفه‌راز شه‌هيده‌يل و كه‌س كار قۆروانييه‌يل
هاوزوانه‌يل بێبه‌شكرياێ له شيوه‌زوان داڵگيێمان
گه‌رمترين بمارگباييه‌ل كۆميته‌ی ناوه‌ندی چالاكوانان سياسی كوردستان خوارگ وه بوونه‌ی دوياهاتن وه دادگاييكردن تاوانباره‌يل دۆسيه‌ی كورد فه‌يلی و حۆكمداين تاوانباره‌يل و وه‌ژينۆسايد شناسانن ئه‌و تاوانه‌يله له دادگای عراقی قه‌بول بفه‌رمان.
له‌وه‌ختيگ بمارگبايی له‌ليدان كه‌يمن ك ناسين تاوان كۆشتن و گردن و شه‌كه‌نجه‌داين و ده‌ركردن و بردن ماڵ و مڵك و دار ونه‌دار كورد فه‌يلی وه ژینۆساید، سه‌ركه‌فتن عداڵه‌ت ئنسانيه وه‌بان تاوانكردن و شۆڤنيزم و ديكتاتۆری و سیاسه‌ت قه‌تڵ عام ملله‌ت كورد له‌لايه‌ن رژيم ديكتاتۆر وه‌رين عراق، يه سه‌ركه‌فتێن وژدان زنگ ئنسانيه وه‌بان دۆشمنه‌يل ئنسانيه‌ت.
ئه‌زيزه‌يل، دڵنيابوون ئيمه جور كومه‌ڵه‌ی چالاكوانه‌يل سياسی كوردستان خوارگ ته‌قلا و كار كه‌يم ئه‌را قه‌ربویكردن و ره‌سانن ده‌نگدان وه جه‌هان ده‌يشت و وه‌ده‌سهاوردن هه‌قه‌يل وه‌ژێرپا خستێدان و له‌بان ده‌سه‌وه‌ر كردن گشت هه‌قه‌يلدان له كوردستان مكوڕيم و جارێتريش بمارگبايی له ملله‌ت كورد له چوارپارچه‌ی كوردستان وه تايوه‌ت براوخوه‌شكه‌يل فه‌يلی له ناو و ده‌يشت كوردستان كه‌يم و له‌وه‌راوه‌ر شه‌هيده‌يلمان سه‌ر نه‌وازش چه‌منيم.
يه‌كگرتنمان، سه‌ركه‌فتنمانه...
كۆميته‌ی ناوه‌ندی
كومه‌ڵه‌ی چالاكوانان سياسی كوردستان خوارگ
2010-11-30
