كورده‌يل فه‌يلى له عێراق تازه
ريز نواوه بوين ، ئه‌وان هه‌ر زوى كه‌فتنه وه‌ر په‌لاماره‌يل رژيم به‌عس و جيوازكردن ، جوور ئه‌وه‌ك وه ته‌سفير فه‌يليه‌يل ناسرياگه ، له‌و په‌لاماره كورده‌يل فه‌يلى له بان ماڵ و حاڵ و كارو كاسبى خوه‌يان ده‌ركريان و ماڵ و موڵكه‌يليان له‌ليان زه‌فت كريا و شوونه‌يليان ته‌عريب كريا ، له‌وه‌ر ئه‌وه له عێراق تازه هه‌ق خوه‌يانه كورده‌يل فه‌يلى له رز نواوه گرنگى يا ئهتمام وه‌پيان بدريه‌يگ .
دكتۆر قاسم مه‌نده‌لاوى له‌ى باوه‌ته‌وه ئويشيگ : ئه‌وه‌ك راسى بووگ كورد فه‌يلى به‌شيگ ره‌سه‌ن كوردن و له ناو كوومه‌ڵگاى عێراقيش رووبةر فره‌يگ داگير كردنه له به‌غدا له ناوچه‌ى (ئه‌بو سه‌يفێن ، جه‌ميله ، شۆرجه ، جاده‌ى فلستين ، ناوچه‌ى سه‌در ، كازميه ) و چه‌نه‌ها ناوچه‌ى تر له به‌غدا و هه‌رله‌يوا (خانه‌قى ، مه‌نه‌لى ، زرباتيه ، به‌دره ، عه‌لى شه‌رجى ، عه‌لى غه‌ربى ) و چه‌نه‌ها شوونه‌يل تر فه‌يلينشين .
كورد فه‌يلى دو جوورن : جووريگ له‌ليان له‌وه‌رخاتر كوردايه‌تى و نه‌ته‌وايه‌تى خوه‌يان دڵسووزانه له شووڕش بارزان و ئه‌يلوول به‌شدارى كردن و له هه‌ردوگ لايه‌ن سياسى و پێِشمه‌رگايه‌تى خه‌باتكردنه‌و تا ئمڕوويش پشتگيرى ته‌واو جموجويل رزگاريخواز كورد كه‌ن . به‌شيگ له ليانيش دڵسووز كوردن و خه‌ريك بازرگانى بوينه‌و هه‌ر له سه‌رده‌م مه‌له‌كى وه دوياوه له وه‌ختيگ بازرگانى زياتر وه‌ده‌س يه‌هووديه‌يل بوى دى به‌شيگ له فه‌يليه‌يليش خه‌ريگ بازرگانى بوين ، وه‌ختيگيش جموجويل رزگاريخواز كورد ده‌س وه‌پيكرد دڵسووزانه هاوكارى ماددى كردنه‌و مه‌يل ئه‌را كوردايه‌تى داشتنه ، وه‌لى رژيم به‌عس كه‌فته دژايه‌تيكردن كورده‌يل فه‌يلى وه تايبه‌ت بازرگانه‌يل و به‌ش فره‌يگ له‌ليان ره‌وانه‌ى ئيران كرد ، يه‌يش پيلان يا موئامره‌يگ بوى له‌ليان كريا تاگه‌ر ده‌س بگرنه بان ماڵ و موڵك و سه‌روه‌ت و سامانيان وه مه‌هانه‌ى ئه‌وه‌ك گوايه ته‌به‌عيه‌ن ، ئى كاريشه له هه‌فتايه‌يل سه‌ده‌ى گوزه‌يشت ده‌س وه‌پيكرد وه تايبه‌ت له شاره‌يل به‌غداو خانه‌قى و مه‌نه‌لى و به‌دره‌و جه‌سان و شوونه‌يل فه‌يلينشين تر ، ئى كاره‌ساته له تاريخ ئنسانيه‌ت وه سه‌ر هويچ ملله‌تيگ نه‌هاتگه ، چوينكه خێزانه‌يل فره‌يگ ته‌فروتوينه بوين و له يه‌كتر بڕيان ، ئه‌وه‌ك عومرى له 15 ساڵ كه‌متر بوى وه‌ل ژنه‌يلا ته‌سفيريان كرياو ئه‌وه‌ك له 15 ساڵ وه‌ره‌و ژويه‌ر بوى خريانه زندانه‌وه ، وه‌ل ئه‌وه‌يشا ئه‌وانه‌ك ته‌سفير كريان شناسنامه‌و گشت به‌ڵگه‌يگ له‌ليان سه‌نياوه ، تا ئيسه‌يش زياتر له 10,000 جايه‌ڵ جوان له رووڵه‌يل كورد فه‌يلى شوونيان گومه و كه‌س نيه‌زانيگ له كورا زينگ وه‌چاڵ كريانه ، وه‌ل ئه‌وه‌يشا هيمان له عێراق تازه هويچ گام خاسيگ نه‌نرياگه ئه‌را كورده‌يل فه‌يلى و قه‌ره‌بوو نه‌كريانه و ياساى عێراق وه‌داخه‌وه هه‌ر رووژيگ جووريگه‌و دويره له ريزگرتن نه‌ته‌وايه‌تى و هه‌ق ئاده‌يزاد، بيگومان تا ئيسه هويچ هساويگ ئه‌را كورد فه‌يلى نه‌كرياگه‌و تا ئيسه‌يش له‌ليان هه‌س له ئۆردگايه‌يل ئيران ژيه‌ن و فره‌يش له‌ليان روى كردنه‌سه وڵاته‌يل ئۆروپاو چه‌وه‌ڕى ئه‌وه كه‌ن له عێراق تازه قه‌ره‌بوو بكريه‌ن .
