كورد و تاوان و عه‌يد قوروان
داواكردن خاك و نيشتمان ئه‌را ملله‌تيگ 40مليونی تاوانه، قسه كردن وه‌زووان داڵگيش تاوانه، كوردبوين و له خاك كوردستان ژيان، ئازادی، هه‌ناسه، زنه‌ێ، شادی ،زانست، مێژوو و... ئه‌را كورد، تاوانه! فره‌جار وه‌وه تاوانبار كريه‌يمن ك ئيمه توايم عاڵه‌م و ئاێم گشتی بكه‌يمه كورد و گشت خاكيگيش بكه‌يمه كوردستان، مه‌مه‌ر تاوانباركردنيشمان ئه‌وه‌س ك ته‌نيا داوای خاك داگيرياێ و هه‌ق ژێرپا خرياێ و مێژوو دزرياێ و زووان وه‌عه‌ره‌بی و فارسی و توركی كرياێ و سه‌روه‌ت و سامان وه‌تاڵان برياێ و زانا و شاعر و كه‌سايه‌تييه‌يل ناوگوم كرياێمان كرديمنه.
له‌ێره توام جوور كورديگ ك داێمه وه‌داواكردن هه‌قه‌يلم تاوانبار كريه‌م تاوانيگ تر بكه‌م، نه له‌ڕوی ده‌مارگرژی يا ته‌عه‌صۆب به‌ڵكم وه‌به‌ڵگه‌وه توام بسه‌لمنم يا ئسبات بكه‌م ك (عه‌يد قوروان) عه‌يد كورده‌و خاون راسكانيی ئيمه‌يمن؛ فره له سه‌رچه‌وه‌يل مێژوويی باس له‌وه كه‌ن حه‌زره‌ت ئبراهيم ك ئسماعيل كوڕی كرده قوروانی و له‌شوون ئه‌وه، ڕووژ قوروانی كردنه‌گه بويه عه‌يد گه‌ورای موسڵمانه‌يل، كورد و وه‌ڕه‌چه‌ڵه‌ك هه‌ورامی بويه، وه‌لی ئه‌ی مه‌سه‌له ئه‌و به‌ڵگه نيه ك ئه‌را ئسبات كردن ئه‌وه‌گ كورد خاون راسكانی عه‌يد قوروانه ئاماژه وه‌پی كردم.
به‌ڵگه ئه‌را ئسبات كردن ئه‌ی راسيه ئه‌وه‌سه ك ملله‌ت كورد و قوروانی داين وه‌دريژايی مێژوو دو باوه‌ت له‌يه‌ك جياوه نه‌كرياين، چ وه‌رجله حه‌زره‌ت ئبراهيم و قوروانی داينی چ له‌شوون ئه‌وه‌گ ئه‌و وه‌سه‌رهات و تاقيه‌وكردنه بويه عه‌يد مليۆنه‌ها كه‌س له دنيا. مه‌سه‌له‌يگ ديار و نه‌شارياگه ك ملله‌ت كورد ئه‌را چه‌سپانن مافه‌يلی و ڕه‌سين وه ئامانجه‌يلی و ئازادكردن ئاووخاكی له چنگ داگيركه‌ره‌يل كوردستان وه‌وه‌رده‌وامی قوروانی داگه، نه ته‌نيا خاسترين ڕووڵه‌يلی به‌ڵكه‌م ماڵ و موڵك و دار و نه‌داريشی له ڕی ڕه‌سين وه ئامانجه ڕه‌واگانی فدا كردگه‌و ته‌نانه‌ت زووان و ناسنامه‌يشی بويه‌سه قوروانی. بی سه‌روشوين كردن ده‌يان هه‌زار ژن و مناڵ و پير وجوان، كيمياواران، كووچوه‌پيكردن وه‌زوور، زندان و شكه‌نجه، ڕمانن و ويران كردن شار و ئاوايه‌يل و بوردمان كردن سنووره‌يل و ئاگرداين باخ و بوسانه‌يل و سه‌دان كاره‌سات تر، يانه گشتی قه‌تره‌يگن له ده‌ريای زوڵم و زووريگ ك شه‌پووله‌يلی وه‌رده‌وام ملله‌ت كورد گرديه‌سه‌و و كرديه‌سه‌ی قوروانی خوه‌ی.
وه‌لی ئه‌وه‌گ فره‌تر په‌يوه‌ندی وه‌ی باوه‌ته‌و ديرێ په‌ت سێداره‌س ك دووسيگ كويه‌ن مل و قۆڕگ دويه‌ت و كوڕه‌يل كورده...
سزای له‌سێداره‌داين خه‌ڵات رژيمه‌يل ديكتاتۆر و شۆڤێنی و داگيركه‌ره‌يل كوردستانه ئه‌را نه‌ونه‌مامه‌يل كورد ك هه‌ر وه‌ختيگ هاوار ئازادييان ژنه‌فن، وه په‌ت سێداره پێشوازی له‌ليان كه‌ن و توان وه سێداره‌ی شووميان ئه‌ی ده‌نگه‌يله بخنكنن. خافڵ له‌وه‌گ شايه‌د بتويه‌نن وه له‌سێداره‌داينيان ڕووح له جه‌سه‌يان جياوه بكه‌ن، وه‌لی مێژوو ئاشكراێ كه‌ێد ك په‌ت سێداره هويچ وه‌خت نه‌تويه‌نستگه‌و نيه‌تويه‌نێد هاوار ئازادی بخنكنێ و ده‌نگه‌يل ئازاديخواز كپه‌و بكه‌ێ. هه‌رچه‌ن ك ڕووژيگ نيه له مێژوو كورد، خوين ڕووڵه‌يلی نه‌ويده باده‌ی عه‌يش و نووش دۆشمنه‌يل، وه‌لی وه‌داخه‌و ئمساڵيش جوور ساڵه‌يل گوزه‌يشته وڵاته‌يل موسڵمان داگيركه‌ر كوردستان، خاسترين ڕووڵه‌يل ملله‌ت كورد كه‌نه قووچ قوروانی ئه‌راعه‌يد و وه‌رجه چه‌ن ڕووژيگ له عه‌يد قوروان، له سێداره‌داين جوانه‌يل كورد كه‌نه خه‌ێر و خه‌ێراتيان.
ئه‌گه‌ر له‌ڕوی ئه‌خلاقيه‌و ته‌ماشای ئه‌ی تاوان قه‌ێزه بكه‌يمن، دوينيمن ك له‌سێداره‌داين ئنسان فره دويره له ئه‌خلاق وه گشتی و وه تايبه‌ت له‌ڕوی ئه‌خلاق سياسی، له ڕه‌فتاره‌يل پيس و سيه‌ێ سياسه‌ته، له ڕوی هه‌ق ئاده‌ميزاديش سزای له‌سێداره‌داين وه‌گشتی له‌سه‌رتاسه‌ر دنيا ڕه‌ده‌و دژ وه هه‌قه‌يل به‌شه‌ره و له‌پرۆتۆكۆله‌يل هه‌ق ئاده‌ميزاد مه‌حكوم كرياگه، وه‌لی وه‌داخه‌و هويچ به‌ند يا ماده‌يگ ئه‌و ياسايه‌يله جايه‌ڵ و جوانه‌يل كورد نيه‌گرێگه‌و. ئه‌گه‌ر له‌ڕوی ئايينيشه‌و ته‌ماشای مه‌سه‌له‌گه بكه‌يمن، يه‌كيگ له خاڵه‌يل هاوبه‌ش ناونی ئاينه‌يل ئاسمانی وه‌تايبه‌ت ئاين ئسلام، وه‌خشين يا عه‌فو كردنه، وه‌لی نيه‌زانم ئه‌را له‌جياتی ئه‌وه‌گ فه‌رمان وه‌خشين و كه‌مه‌وكردن سزا ئه‌را چالاكه‌يل سياسی بدريه‌ێ، وه‌چه‌واشه‌و وه‌بوونه‌ی عه‌يد قوروان، سزای له‌سێداره‌داين ده‌سه‌جه‌می ده‌رهه‌ق وه جوانه‌يل كورد ده‌ركريه‌ێ. له‌ێره پرسيمن ك ئايا قووچ قوروانی ڕاسكانی ك گشت ڕووژيگ ئه‌رای عه‌يد قوروانه كيه و له‌ڕاسيا كی خاون عه‌يد قوروانه؟!
