كه‌ی دزه‌یل وگه‌ناته‌كاره‌یل سزا دریه‌ن؟
ودروشم شه‌فافیه‌ت ودیموكراسی ته‌وافوقی وفه‌ره له‌ی دروشمه‌یل بریقه‌داره ك تائیسه هیوچ كام له‌و شعاره‌یله نه‌یوه‌سه عه‌مه‌لی ؛ هه‌میش دروشم دوسی نیشتمانی ك جوركاره‌بای وه‌ته‌نی وه‌پی هاتگه‌و ته‌نیا ناوی ژنه‌فیم و وه‌چه‌و نیه‌یونیمه‌ی و دروشم ئاوه‌دانی وسه‌رمایه‌گوزاری ك ئمرو هاله سه‌ختترین وه‌زع وشعارئه‌منیه‌ت وسه‌قام ئه‌را گشت وكه‌س جاریگ هه‌س وه‌ئه‌مان نیه‌كه‌یگ ؛ وه‌لی گرنگترین ئه‌و دروشمه‌یله خوه‌ی دروشم نه‌هیشتن گه‌ناته‌كاری یافه‌ساده ؛ ئایا كه‌ی ئی دروشمه بووگه جیوه‌جی كریه‌ی وئی خه‌و كیوه‌نه‌ی عراقیه‌یله بووگه راسی ؟ هاكو پلان یاخوته‌ی نه‌هیشتن گه‌ناته‌كاری ؟ چیون تیوه‌نیم ئی ئه‌یژده‌ها له‌ناو بوه‌یم له وه‌ختیگ كوتله‌یل سیاسی وشه‌خسیه‌ته‌یل سیاسی ولات هه‌ركام له شاشه‌ی تلفزیونیگه‌و قسه وه‌ئه‌وه‌كه كه‌یگ و هه‌ركام له‌كوتله‌یل وحزبه‌یل له پیاوخراوه‌یل خوه‌یان دفاع كه‌ن وهویچ كامیان قه‌بول نیه‌كه‌ن وه‌دزیگیان بیوشی ؛ بریوه هابان چه‌ود ؛ چیون خوه‌یانیش ئی مه‌سله‌ت كوردیه له‌بانیان ته‌تبیق كریه‌ی ك ئیوشی ( شه‌ریك دزو ره‌فیق قافله ) ؛ ئاخركی تیوه‌نی وه‌ل فولان وه‌زیربیوشی له‌وه‌ختیگ زانیگ كوتله‌یگ سیاسی هاله پشتی ؛ كی تیوه‌نی وه‌ل جیگروه‌زیریگ قسه‌بكه‌یگ ؛ وه‌ختی حزبیگ سیاسی پشتگیریی كه‌یگ ؛ به‌لی وه‌ی خاتره سه گشت ئه‌و دروشم یاشعاره‌یله ك باسیان كردیم ؛ هیوچ كامیان عه‌مه‌لی نیه‌وگ و روژ وه‌روژ گه‌ناته‌كاری ودزی جور خوره سه‌ركه‌یگه ده‌نگ ئابوری ولاته‌گه‌مان وزه‌ره‌رمه‌ن یه‌كم له‌ی ناوه خوه‌ی چین هه‌ژارو كه‌م ده‌رامه‌ده ؛ به‌لی ئی كاره متمانه له‌ناونی مله‌ت وحكومه‌ت وحزبه‌یل وكیانه‌یل سیاسی ولات نیه‌یلی ؛ یه‌یش كاروه‌ده‌سه‌یل ده‌س پاك ولات نه‌یگه وه‌راوه‌ر ئی وه‌رپرسیاریه‌تیه ك نه‌بایه‌د ری بیه‌ن وه‌ی ئاسانیه سه‌روه‌ت وسامان مله‌ت ونیشتمان له وه‌رچه‌ویان له لایه‌ن تالانچیه‌یل بفه‌وتیه‌ی وبه‌ش فه‌ره‌یگ له چینه‌یل كومه‌لگا وه‌ده‌س ورسیه‌تی وبیكاری ونه‌بیون خزمه‌تگوزاری بنالنن ؛ وه‌خت ئه‌وه هاتگه كاروه‌ده‌سه‌یل ولات كه‌می بانه خوه‌یاناو ئه‌وجوره‌گ حه‌ساو ئه‌را خوه‌یان وخیزان وكه‌سوكارو لایه‌نگره‌یل حزبی وئه‌ندامه‌یل عه‌شره‌ته‌گانیان كه‌ن ؛ كه‌میگیش هیورله مه‌ردم هه‌ژارو كه‌مده‌رامه‌تیش بكه‌ن و نه‌ونه نمونه‌ی دیارئه‌و مه‌سله‌ت كوردیه ك ئیوشیگ ( زگ تیرخه‌وه‌ر له زگ وه‌رسی نه‌یری ) .
