قه‌ره‌قوش له‌ مێژوو- به‌ش دیوم

قه‌ره‌قوش له‌ مێژوو- به‌ش دیوم
2010-01-23T08:27:12+00:00

وهه‌میش گرنگترین كاره‌یلی ك تائمڕوویش شوینه‌واریان له‌ ناو قاهره‌ مه‌نگه‌ دروس كردن قه‌ڵایگ بویه‌ له‌ بان به‌رزاییگ ك وه ‌قه‌ڵا‌ی شاخ ناسریاگه‌ . بیجگه‌ ئه‌وانه‌یش چه‌ن جوو گه‌ورا له‌ بان رووبار نیل داگه‌و ئاو ره‌سانگه‌سه‌ ناوچه‌ی جیزه‌ له‌بان ڕی ئه‌هرامه‌یل و بنایه‌یگیش له‌ناو قاهره‌ دروس كردگه‌ ئه‌را ئه‌وانه‌گ ژیان خوه‌یان ئه‌را ئسلام و جهاد ته‌رخان كردنه‌ ك وه‌و شوینه‌ ئویشن ( رباك ).

له‌ ده‌یشت شورای قاهره‌یش خانیگ دروس كردگه‌ وه‌ل میوان خانه‌یگ ئه‌را كاروانچیه‌یل وگه‌شتیاره‌یل و وه‌راسی یه‌یش كار زیره‌كانه‌یگه‌ له‌وه‌ر ئه‌وه‌گ مه‌نن كه‌سه‌یل بیگانه‌ له ‌ناو شار قاهره‌ دویره‌و خستگه‌ .

بیجگه‌ ئه‌وانه‌یش قه‌ره‌قوش له‌ ساڵ ١١٦٢ ز له ‌شوین ئازاد كردن شارعه‌ككا كریاسه‌ وه‌رپرس ئی شاره‌ ؛ فه‌ره‌ وه‌پی نه‌چگه‌ ك خاچ په‌ره‌سه‌یل تویه‌نستنه‌ سه‌رله‌نوو شارعه‌ككا بخه‌نه‌ ژیرده‌سه‌ڵات خوه‌یان و قه‌ره‌قوشیش وه‌دیل یا ئه‌سیری گردنه‌و ئویشن دویاخر سوڵتان سه‌ڵاحدین وه‌ ٦٠ هه‌زار دینارئازادی كردگه‌ .

ئمجا بیلا بایمه ‌سه‌ر فه‌رمانڕه‌وایه‌تی یا ده‌سه‌ڵات قه‌ره‌قوش له‌ مسر :

دادوه‌ر ئه‌سعه‌د ناسریاگ وه‌ ( ئه‌بولمه‌كارم ) له‌ كتاوه‌گه‌ی له‌ ژیرناوونیشان ( الفاشوش في حوكم قه‌ره‌قوش ) فه‌ره‌ چشت ئه‌ڵاجه‌و‌ی له‌بان ئه‌و كه‌سایه‌تیه‌ باس ئه‌كا ك ئه‌را نموونه‌ : ئویشن رووژیگ دزیگ چووده‌ ماڵیگ و له‌وه‌ختیگ له‌ دیوارماڵه‌گه‌ چووده‌ بان ، دیوارحه‌وشه‌گه‌ ئه‌ڕمیه‌یگه‌ ملیاو دزه‌گه‌ ئه‌مریگ ؛ له‌یوا دیاره‌ دیواره‌گه‌ فه‌ره‌ كویه‌نه‌ بویه‌ و ڕمیاگه‌ ، كه‌سوكار دزه‌گه‌ چنه‌ لای قه‌ره‌قوش و له‌ خاوه‌ن ماڵه‌گه‌ شكات ئه‌كه‌ن و ئویشن خاوه‌ن ماڵه‌گه‌ دیواره‌گه‌ی خاس دروس نه‌كردگه‌ یا گرنگی وه‌پی نه‌یاس ، چوین ئه‌گه‌ر دیواره‌گه‌ قایم بویاتاگ و نه‌ڕمیاتاگ ؛ دزه‌گه‌ كار خوه‌ی كردویگ كردیاد ونه‌مردیاد و ئیسه‌ خیزانیگ وه‌بی سه‌رپه‌ره‌س نه‌یشته‌جی ، قه‌ره‌قوشیش له‌ جواو ئی شكاته‌ خاوه‌ن ماڵه‌گه‌ چڕیه‌و و چه‌ن قسه‌یگ ناشرین وه‌پی ئه‌كا و دویاخریش حوكم ئعدامی ده‌رئه‌كا له‌وه‌ر ئه‌وه‌گ بویه‌سه‌ بایس مردن دزه‌گه‌ . خاوه‌ن ماڵیش زوی ده‌س كرده‌ وه‌رگری كردن له‌خوه‌ی و وت : گه‌ورام ته‌خسیرمن نیه‌ ته‌خسیر ئه‌و به‌ناسه‌ ك دیواره‌گه‌ خاس دروس نه‌كردگه‌ چوین من حه‌قی دامه‌ وه‌لی ئه‌وی كه‌مته‌رخه‌می له‌كاره‌گه‌ی كردگه‌ و قه‌ره‌قوش وه‌ی قسه‌ قه‌ناعه‌ت ئه‌كا وئویشیگ خاوه‌ن ماڵه‌گه‌ ئازاد بكه‌ن و بچن به‌نناگه‌ بارن . به‌ننا تیه‌یگ و قه‌ره‌قوش وه‌پی ئویشیگ له‌وه‌ر ئه‌وه‌گ دیوار فوڵان ماڵ خاس دروس نه‌كردیده‌ بویده‌سه‌ بایس مردن پیاویگ ؛ به‌ناگه‌یش ئویشیگ : جه‌ناب قه‌ره‌قوش من كاره‌گه‌م وه‌خاسی ئه‌نجام دامه‌و كار من هویچ عه‌یبیگ نه‌یاشتگه‌ ؛ وه‌لی ئه‌وه‌گ بویه‌سه‌ بایس مردن ئه‌و پیاوه‌ هامشوكردن ئافره‌تیگ ڕه‌ین بویه‌ ك جنگه‌یله‌گه‌ی وه‌ دوگمه‌ی سه‌وز ئه‌ڵاجه‌وی رازانویگه‌و و ئه‌و ژنه‌ ئه‌وقه‌ره‌ ڕه‌ینه‌و بوید سه‌رنجم وه‌ره‌و لای خوه‌ی كیشا وهویرم لای دیوارنه‌مه‌ن و وه‌ی جووره‌ من ژنه‌گه‌ وه‌تاوانبار زانم ؛ به‌ناگه‌ هه‌میش وت: ك ژنه‌گه‌ هاوسایانه‌ . قه‌ره‌قوش فه‌رمان ئازاد كردن به‌ناگه‌ داو له‌ پیاوه‌یل خوه‌ی تواست تا ژنه‌گه‌ بارنه‌ ئه‌ڕالای ؛ ژن هاوردن و قه‌ره‌قوش قه‌یری قسه‌ی ناشرین وه‌پی كردو و وت : ئه‌گه‌ر تو له‌و رووژه‌ خوه‌د وه‌و دوگمه‌یل سه‌وزه‌ ڕه‌ینه‌و نه‌كرداید ؛ ئه‌وبه‌ننا له‌یوا دیواره‌گه‌ خراو دروس نه‌كردیاد  و ئه‌و دزه‌ نه‌مرد ؛ یه‌كسه‌ر حوكم ئعدام ژنه‌گه‌ ده‌رئه‌كا و ئویشیگ: تو بویده‌سه‌ قاتڵ ئه‌و دزه‌ . ژنه‌گه‌یش ئويشیگ : قوربان یه‌ تاوان من نیه‌ ؛ مه‌ردم ئازادن هه‌رچی دڵیان بتوایگ بكه‌نه‌ وه‌ر وه‌لی تاوان ئه‌و بازرگانه‌سه‌ ك وه‌ل قوماشه‌گه‌ ئه‌ودوگمه‌یل سه‌وزه‌ داسه‌ پیم ؛ بازرگانه‌ بیوه‌سه‌ بایس مردن دزه‌گه‌ . قه‌ره‌قوشیش زیو وه‌ قسه‌ی ژنه‌گه‌ قه‌ناعه‌ت كردو فه‌رمان دا ژن ئازادبكه‌ن وبازرگانه‌گه‌ بارن ؛ وه‌هه‌مان شیوه‌ قه‌یری قسه‌ی ناشرین وه‌بازرگان كردو حوكم ئعدامی ده‌ركرد ؛ بازرگانیش ده‌سكرده‌ دفاع كردن له‌خوه‌ی ووت: قوربان تاوان من نیه‌ ؛ تاوان ئه‌و خومچیه‌سه‌ ك قوماش ودوگمه‌گان ئه‌رام ڕه‌نگ كردگه‌ ؛ ئه‌و دوگمه‌گان ڕه‌ین دروس كردگه‌ تاوان من چه‌س ؟ قه‌ره‌قوشیش ئويشیگ ئازادی بكه‌ن و بچن خومچی ئه‌ڕام بارن ؛ وه‌ختی خومچی به‌دبه‌خت تیه‌ی ئایم فه‌قیر بی ده‌م و زوانیگ بویه‌ و نه‌تویه‌نستگه‌ له‌خوه‌ی وه‌رگری بكا

و قه‌ره‌قوشیش یه‌كسه‌ر فه‌رمان ئه‌يا له‌ قه‌ی چوارچیوه‌ی ماڵه‌گه‌ی بكه‌نه‌ی دارا ؛ جه‌لاده‌گانیش یه‌كسه‌ر په‌ت سێداره‌ ئاماده‌ كه‌ن و ئمجا داوا له‌ خومچی كه‌ن تا بایگ و له‌ وه‌رچه‌و مه‌ردم عدامی بكه‌ن ؛ وه‌ختی تیه‌رنه‌ی دوینن باڵای خومچی فه‌ره‌ به‌رزه‌و و له‌ ناو چوارچیوه‌ی قاپیه‌گه‌ جیی نیه‌وگه‌و ؛ وه‌قه‌ره‌قوش ئويشن قوربان چه ‌بكه‌یم ئه‌وه‌سه‌ مه‌ردم گشتی ئاماده‌ بویه‌ وه‌لی خومچیه‌گه‌ جیی نیه‌وگه‌و له‌ناو چوارچیوه‌گه‌ ؟ ئه‌ویش ئويشیگ: ئی خومچیه‌ ئازاد بكه‌ن و بچن خومچی باڵا نزمیگ له‌شار بویننه‌و بارن له‌یره‌ عدامی بكه‌ن ؛جه‌لاده‌یلیش چن و فه‌رمانه‌گه‌ی جیوه‌جی كه‌ن .

Shafaq Live
Shafaq Live