فه‌ره‌ح داواى وه‌خشین مه‌كه
درزیگ بویننه‌و (معامله)گانیان ته‌واوبكه‌ن...وه ئارامیه‌و داواى وه‌خشین كه‌ید و وه لیوخه‌ن گه‌ورایگه‌و هه‌وڵ ئه‌وه ده‌ید ئه‌و هاووڵاتى (مراجع) شه‌كه‌ت و وڵه‌كه‌ته ئارامه‌و بكه‌ید ك چه‌وه‌ڕیكردنى فره دریژه‌وبویه و شایه‌ت تا دویاى نیمه‌ڕوو دویابكه‌فى. فه‌ره‌ح په‌نج ده‌قه جارى نووڕیده‌پى و لیوخه‌نیگ ئه‌راى كه‌ید و ئویشید: بوه‌خشه‌مان ئه‌را دویاكه‌فتند. ئه‌ویش جوواوده‌ید و ئویشید: پاپاى مه‌و، كاره‌گه وه‌ده‌س تن نیه. ئه‌یه حاڵ ده‌وڵه‌ت عیراقه هه‌ر له‌وساوه، ئه‌را ماوه‌یگ ته‌ره‌كیا و ئینجا یه‌سه دوباره بینابوود و كه‌مه‌كه‌مه په‌ره‌سینید له بان ئه‌و هه‌مگه ویرانى و شیوایشیوه ك دا له ژیرخانه‌یل و په‌ك گشت دام و ده‌زگاگانى خست ك هه‌وڵ ده‌ن دوباره هه‌ڵسیه‌ن، له وه‌ختیگ ك كارمه‌نده‌یلى وه ده‌س بڕیان كاره‌با و ئاو و به‌رزه‌وبوین پله‌ى گه‌رمى ناڵنن، و قه‌ڵه‌باڵغ مراجعه‌یل و هه‌پ و هه‌وڵیان ئه‌را ته‌واوكردن معامله‌گانیان ك وه ئاسانى ته‌واو نیه‌كریه‌ى تا خاتردارى خاترداران نه‌ود و خاسى بڕیگ فه‌رمانبه‌ر ك وه گورجى هه‌وڵ ده‌ن ئه‌را ته‌واوكردنیان... داواى وه‌خشین مه‌كه فه‌ره‌ح، چوینكه وه‌ڕاسى كاره‌گه وه‌ده‌س تن نیه، حكوومه‌تیش مه‌ینه‌تى خوه‌ى دیرى و كه‌فتیه‌سه گیچه‌ڵه‌یلیگ گه‌ورا ك نیه‌تویه‌نى جوواو پرسیاره‌یلمان بیه‌ید له گیژاو ڕكابه‌رى له خاتر ڕه‌سین وه پۆسته‌یل به‌رز و سباق دویر و دریژ ناونى فراكسیۆنه‌یل سیاسى له خاتر ڕه‌سین وه بۆند یا صه‌فقه‌یگ ك داواكارى هه‌رچى سیاسه‌تمه‌داره‌یله جیوه‌جى بكه‌ید و ملله‌ت عیراق پشتگووش خه‌ید ك یه هه‌فت ساڵه چوى ساڵه‌یل یووسف ناڵنى.
ئى ملله‌ته چوینكه هووكاره‌ى ئازار و مه‌ینه‌تى بویه ، له‌وه‌ر ئه‌وه وه گشت وریاییگه‌وه وسیایه له ڕوى ئه‌وانه‌گ ناویان نریاس سیاسه‌تمه‌دار ك هویچ چشتى نیه‌زانن ته‌نیا ئه‌وه نه‌ود ك ڕه‌سنیده‌یانه ده‌سكه‌فته‌یل نزم خوه‌یان...فه‌ره‌ح ، ملله‌ت وه‌ى جووره مینه‌ى مه‌هانه‌یش ئه‌را تو كه‌ید هه‌رچه‌نى ك معامله‌گه‌یشى دویا بكه‌فى، مه‌منوونیشه له‌لید چوینكه لیوخه‌نه‌یلد وه‌خشیده پى ك مه‌ینه‌تیه‌گانى سووكه‌وكه‌ید و نیه‌یلیده‌ى له‌ى دویاكه‌فتنیه عاجز بوود.منیش چوى گشت عیراقیه‌یل نیه‌زانم ئى كاروباره چوى ته‌مام بوود و چ ڕیگه‌یگ بڕیمن تا بڕه‌سنیده‌مانه ئامانجه‌یلمان، چوینكه شه‌كه‌ت و مه‌ویس بویمنه له‌ى بارووه‌زع گه‌نمانه. وه‌لى تو ئه‌وه وه‌پید كریه‌ى ك وه‌رده‌وامى بیه‌یده كاره‌گه‌ى خوه‌د و له‌وه‌یشه دڵنیا به ك زه‌رده‌خه‌نه‌گه‌د له ته‌واوكردن معامله‌ى هاووڵاتى دو ده‌سكه‌فت دیرى، یه‌كمیان (معامله)گه‌ى ته‌واو بوود و دویمیان زه‌رده‌خه‌نه جوانه‌گه‌د دوینى، وه‌لى ئه‌وانه‌گ خه‌ریكن له جاڕ ده‌سكه‌فت و چه‌پاوكردن خوه‌یان له‌وه‌ڕن، و له‌هویره‌وبردن بویه‌سه نعمه‌تیان، بایه‌سه ئه‌وه له هویریان بوود ك ئه‌و كه‌سه‌گ شاهه‌نشاهه‌یل له ناوبه‌ید تویه‌نى كه‌سه‌یلیگتر له جیاتییان بارید، و ئه‌وه‌گ وه‌رینه‌یل ماڵى، تویه‌نى ئه‌وانه‌یشه بماڵید له شوونیان تیه‌ن... (معامله)گه‌ى ته‌واوكرد و ده‌رچوى و وت: مه‌منوونم له‌تو فه‌ره‌ح له سه‌رده‌م خه‌مبارى و شكیان و خه‌مۆكى سیه ك باڵ كیشاسه بان ده‌روین گشتمان و خواست ژیان له ناو ده‌روین زه‌خمدارمان په‌ك خستیه.
