عیراق وه‌ره‌و كاملا چوود وه‌ى حكوومه‌ته ك وه خواست گشتلایگ دانه‌مه‌رزیا؟!
پێوانه‌یل یا معیاره‌یل كارزانى وداوانپاكى ونیشتمانپه‌روه‌رى و سه‌رپه‌رشتى كردن به‌رژه‌وه‌ندیه‌یل ڕووڵه‌یل نیشتمان كریا، دویر له هه‌ر ئعتبارات حزبى و تایه‌فى ومه‌زه‌وى، وگشتلایگ له‌بان ئه‌یه ڕیككه‌فتن، هه‌م له دامه‌زرانن حكوومه‌ت و هه‌میش له هه‌ڵوژانن وه‌زیره‌یل.
سه‌رۆك وه‌زیره‌یل ته‌كلیفكریاى نورى مالكى له قسه‌گانى وه‌رج له پیشكه‌شكردن كابینه‌گه‌ى ئه‌را په‌رله‌مان ئه‌را ده‌نگداین له‌بانى وت:" ئى حكوومه‌ته وه‌گووره‌ى خواست دڵم نیه و وه‌گووره‌ى خواست هویچ لایگیش نیه". وئاماژه‌یش وه‌وه‌دا ك فره سه‌خته حكوومه‌تیگ له‌بان بنه‌ڕه‌ت هاوبه‌شى یا شه‌راكه‌ت نیشتمانى دامه‌رزنید و گشت لاینه‌یل به‌شدار له ئۆپه‌راسیۆن سیاسى وه‌پى ڕازى بكه‌ید.
له‌باوه‌ت پرۆژه‌یل گۆڕانن ك بڕیگ فراكسیۆن سیاسى گرتنه‌ى وه‌ر، وه‌رج له دامه‌زرانن حكوومه‌ت، ئه‌را ده‌ركردن عیراق له قه‌یرانه‌یل سیاسى و ئابوورى، نوێنه‌ر فراكسیۆن عیراقیه حامد موتڵه‌گ له قسه‌گانى ئه‌را ماڵپه‌ڕ شه‌فه‌ق گوزارش له باوه‌ڕ خوه‌ى كرد ك لیسته‌گه‌ى خوه‌یان ك عیراقیه‌س و پرۆژه‌یگ گۆڕان گردیه‌سه وه‌ر، خاسترین كاندید پیشكه‌ش نه‌كردنه ئه‌را پۆسته‌یل وه‌زارى و زیاتریش وت:" بایه‌ت بوى عیراقیه زیاتر له یه‌ك كاندیدیگ ئه‌را هه‌ر پۆستیگ وه‌زارى پیشكه‌ش بكردیاد تا خاسترینیان هه‌ڵوژیان، وه‌لى ئى كاره نه‌كرد".
نویسه‌ر وپه‌یجووریكه‌ر زیا شه‌كه‌رچى جوور عه‌یبیگ باس له قه‌بوولكردن چینه‌یل سیاسى كرد وه حكوومه‌تید 42 وه‌زیرى، ك شماره‌ى پێوانه‌یى یا ره‌قه‌م قیاسى حكوومه‌ته‌یل عیراقى وه‌رین شكان، و له‌گشتى كز تر داره‌ى قه‌ڵه‌م ك كه‌سایه‌تى كارزان ته‌كنۆكرات له‌تى نیه. شه‌كه‌رچى زیاتریش وت :" چه‌ن وه‌زاره‌تیگ هه‌س ته‌نیا ئه‌را ئه‌وه كریاس ك بڕیگ لایه‌ن سیاسى وه‌پیان رازى و خه‌ڵات بكریه‌ن، وه‌نه من نیه‌زانم مه‌عناى چه‌س وه‌زاره‌تیگ ده‌وڵه‌ت ئه‌را قسه‌كه‌ر وه‌ناو حكوومه‌ته‌و په‌یا بكریه‌ید، ئایا ئه‌یه وازهاوردن نیه له‌و قه‌وڵه‌یله ك وه‌رج له دامه‌زرانن حكوومه‌ت دریان؟".
شه‌كه‌رچى وتیش بیلا هه‌ڵه‌په‌ڵه نه‌كه‌یمن له‌باوه‌ت سه‌ركه‌فتن حكوومه‌ت یا سه‌رنه‌كه‌فتنى چوینكه ملله‌ت چه‌وه‌ڕى سه‌كه‌فتنیه، و وت :" وه‌لى ئیمه نیگه‌رانى خوه‌مان نیه‌شاریمنه‌و له سه‌رنه‌كه‌فتن و وه‌یه‌كه‌ونه‌سازیان له‌ناونى ئه‌ندامه‌یلى، و دیاره ك ئه‌رك سه‌رۆك وه‌زیره‌یل فره‌سه‌خته و بایه‌ته چه‌وه‌ڕى بكه‌یمن چه بوود؟".
له‌باوه‌ت دیارنه‌داین ژن له‌ى كابینه‌ى وه‌زاریه شه‌كه‌رچى وت :" قسه‌ى ده‌م سیاسه‌تمه‌داره‌یل عیراقى له‌باوه‌ت گرنگى به‌شدارى كردن ژن له بڕیار سیاسى و وه‌رگردن پۆسته‌یل وه‌زارى ته‌نیا مۆده و فرمیگ بوى، وئه‌گه‌ریش كۆتاى ژنه‌یل نه‌ویاتا ، یه‌ك ژن له‌ناو په‌رله‌ما وه‌چه‌و نه‌دوینستیایمن، چوینكه ئه‌قڵیه‌ت نیرانه زاڵه وه‌بان چین سیاسیمان".
له لاى خوه‌یه‌و مه‌یسون ده‌ملوجى سه‌ركرده له لیست عیراقیه ئه‌وه ئاشكرا كرد ك خوه‌ى تاكه كاندیدیگ ژن بوى ئه‌را وه‌رگردن پۆستیگ وه‌زارى له حكوومه‌ته نووه‌گه، وه‌لى سه‌رۆك حكوومه‌ت نورى مالكى وه‌پى قه‌بوول نه‌كرد، له دریژه‌ى قسه‌گانى ئه‌را ماڵپه‌ڕ شه‌فه‌ق ده‌ملوجى گوزارش له بیزارى خوه‌ى كرد وخه‌جاڵه‌تكیشان خوه‌ى نیشاندا له‌وه‌گ ئۆپه‌راسیۆن سیاسى ڕه‌سیه‌سه پى ك نه‌خشوده‌ور ژن له‌تى گومه‌وكریاس و وت:" له‌وه خه‌جاڵت كیشم ك ئه‌و فراكسیۆنه ك هامه تى وه‌ل ئه‌واكانه‌و جیاوازى نه‌یرى له دویره‌وخستن نه‌خشوده‌ور ژن عیراقى وخه‌باتى ك ئه‌را سه‌رده‌م ڕژیم وه‌رین چووده‌وه و منیش هیمان یه‌كیگم له‌لیان، و فراكسیۆن سه‌رۆك وه‌زیره‌یلیش له‌ى قاڵبه ده‌رنه‌چیه وهویچ ژنیگ كاندید نه‌كرد ئه‌را وه‌رگرتن پۆستیگ وه‌زارى".
كفاح هادى
