عه‌مار حه‌كيم و ديموكراسی له‌عراق
هه‌ميشه چه‌وه‌ڕيكرياگيگ بويه ، وه‌تايبه‌ت دگانناين وه راسيه‌يل تاريخی كه‌ركووك ك تووماريگ تاريخی گرنگه‌و ئه‌نجوومه‌ن باڵای ئسلامی شانازی وه‌پيه‌و كه‌يگ له‌وه‌ر هووكاريگ ساده ك مه‌به‌س له‌لی گرتنه‌وه‌ر سياسه‌تيگ ئاقڵانه‌س ك ديموكراسی و پيشكه‌فتن له‌لی بكريه‌يگه دی . عراق دوشمنی فره‌س ، ئی دوشمنايه‌تيكردنيشه هيزه‌يل خه‌ياڵی و ره‌گه‌زپه‌رسه‌يل په‌يڕه‌وی كه‌ن ، وه‌و كاريشه ته‌نيا ئاينده‌ی عراق وه تيه‌ريكی مينيگه‌وه ، ئاشكرايشه فره‌يگ له قسه‌يل ئه‌نجوومه‌ن باڵای ئسلامی وه‌پيان قويته‌و نيه‌دريه‌يگ و شايه‌ت له‌ئاينده‌يش دژ ئه‌نجوومه‌ن باڵايش بارنه‌ی كار ! ئه‌و جووره لايه‌نه‌يله دريژه ده‌نه سياسه‌ت ويرانكه‌ر ، ك سه‌ده‌ها ساڵه ئی سياسه‌ته له نيشتمان عه‌ره‌بی بويه‌سه ريگر له‌وه‌رده‌م پيشكه‌فتن ، له‌وه‌ر ئه‌وه بايه‌سه گشت تاكيگ عراقی ئه‌و راسيه بزانيگ ك بيجگه له‌دگانناين وه هه‌ق ديموكراسی يه‌كتری ، ملله‌ته‌يل عراق ريگه‌يگ تر له‌وه‌رده‌ميان نيه ، چوينكه لاپه‌ڕه‌يل دروسبوين ئی وڵاته له‌زوڵم و كوشتن وبڕين زياتر چشتيگ ئه‌را خوه‌شگوزرانی هاووڵاتيه‌يل له‌تی نه‌مه‌نده‌سه‌وه ، مه‌عنای ئه‌وه‌سه ئی تاريخه له‌وه‌ر خاتر چه دوباره‌وه بكه‌يم ؟ ك هس وه‌و راسيه بكه‌يم و هه‌ق خوه‌مانه بپرسيم ئه‌و هيزه‌يله له‌عراق ك له‌دژ كورد و هه‌قه‌يل ده‌ستووری و تاريخی پلان دروسكه‌ن چ ئامانجيگ ديرن ؟ ئايا وه چ ده‌سپيچگيگ توان دژ بنه‌مايه‌يل ديموكراتی و ده‌ستووری كار بكه‌ن ؟ له‌وه‌يش بترازيه‌يگ بايه‌سه گشت هاووڵاتييگ له‌ی هيزه‌يله بپرسيگ ئايا دوشمنايه‌تی ملله‌ت كوردستان چ قانجازيگ ره‌سنيگه خوه‌شگوزرانی عراقيه‌يل و پيشكه‌فتن سستم ديموكراسی له‌عراق ؟ ئاشكراس ك ئه‌و هيزه‌يله له‌ئاست ئه‌و جواوه ده‌سه‌داوان مينن ، چوينكه دوشمنايه‌تی كورد له‌عراق ئه‌گه‌ر مه‌عنايگ داشتووگ پيكهاتگه له كاركردن ئه‌را وه‌رده‌وامی له‌خوينڕشيان ناهه‌ق ك زياتر له هه‌يشتا ساڵه عراقيه‌يل وه‌ی ده‌رده‌وه گرفتار كردو هويچ تر ، له‌وه‌ر ئه‌وه قسه‌يل عه‌مار حه‌كيم گرنگی يا ئه‌هميه‌ت فره‌يگ ديريگ وه‌تايبه‌ت له‌مه‌يدان سياسی عراقی زياتر ئه‌وه ئاشكرا كه‌يگ ك حه‌كيم و ئه‌نجوومه‌ن په‌رووش يه‌كگرتگی و ديموكراسی عراقن و نيه‌توان دی له‌عراق دريژه بيريه‌يگه سياسه‌ت چه‌فت پڕ له‌زوڵم و زوور ، ئمجا كاركردن له‌وه‌رخاتر كرده‌وه‌ی جی وه‌جيكردن ئی باوه‌ڕ پڕ له‌ڕاسگوويی عه‌مار حه‌كيمه بووگه نه‌خش ريگه‌ی دروسكردن ده‌وڵه‌ت عراق فيدراڵی ديموكراسی سه‌روه‌خوه‌يی و سه‌ربه‌رز . حه‌كيم خوه‌شه‌ويسی كورد و ئاينده‌ی سياسی خوه‌ی وه‌ی راسگووييه ده‌سه‌وه‌ر كه‌يگ ، وه‌هه‌ڵويسته‌يليشی گشت ئه‌و راسيه‌يله ئه‌را كوردو ملله‌ت كوردستان ئاشكراتر بووگ ، ك نوێنه‌ره‌يل كورد تويه‌نستنه كاريگه‌رانه له‌عراق كار سياسی ئه‌نجام بيه‌ن ، چوينكه هه‌ڵويسته‌گه‌ی عه‌مار حه‌كيم بووگه هووكار وازكردن قه‌يريگ گريه‌كووره له‌باوه‌ت كيشه‌يل كورد له‌عراق تازه .
