عراق و كوردستان ... ئه‌وه‌زكردن ئمتيازه‌يل

عراق و كوردستان ... ئه‌وه‌زكردن ئمتيازه‌يل
2009-09-24T07:16:48+00:00

له‌تاك عراقی ره‌سمی نه‌كريا ، له‌ناو قۆڵ يا قاعه‌و له‌بان ته‌خت سه‌رووكايه‌تی عراق دوينريا . وه‌ل ئه‌وه‌يشا وه‌گووره‌ی خواست ئه‌وه‌ بوی ده‌رفه‌ته‌يل هه‌ڵنه‌كه‌فت و ، وه‌سه‌به‌ب له‌هويره‌وبردن تاريخ وه‌رجه‌ عراق تازه‌ چه‌نه‌ها سته‌م له‌بان ريگه‌ی پرووسه‌ی سياسی و ديموكراسيه‌تكردن عراق دروسكريان ، ئه‌يه‌ بيجگه‌ ئه‌وه‌ك وه‌سه‌به‌ب كرده‌وه‌ی تيرۆرستی و ئه‌قڵيه‌ت شه‌ڕه‌نگيزيه‌وه‌ گه‌شه‌كردن له‌پرووسه‌ی سياسی و گه‌شه‌ی كوومه‌ڵايه‌تی وه‌ك خواستيگ نه‌چيه‌ ڕييه‌وه‌ .

له‌ماوه‌ی ٦ ساڵ دويای قورتاربوين عراق له‌ حوكم دڕنه‌ترين دكتاتۆر سه‌ده‌ی (٢٠ و ٢١) له‌ڕوی سياسيه‌وه‌ گام گه‌ورا له‌بان ئاست ناوخود و ده‌يشته‌وه‌ نرياگه‌ . هه‌رچه‌نی هه‌ريم كوردستان وه‌ك هه‌ريميگ فيدراڵ نموونه‌ی ئی گامه‌يله‌ بويه‌ ، وه‌لی له‌گشت ئاسته‌يل چه‌وه‌ڕی زياتر له‌هه‌ريم و به‌غدايش كرياگه‌و جه‌خت له‌وه‌ كرياگه‌ هه‌رچی زياتره‌ پرووسه‌ی سياسی و ديموكراسی گه‌شه‌ وه‌پی بدريه‌يگ و له‌ی باوه‌ته‌وه‌ نموونه‌ی خاسيگ پيشكه‌ش بكريه‌يگ .

هه‌ريم كوردستان عراق له‌ماوه‌ی ١٨ ساڵ گوزه‌يشت وه‌قوناغ جووراوجووره‌وه‌ گوزه‌ر كردگه‌و له‌بان ئاست ناوخوه‌يی و هه‌ريمی و ناوده‌وڵه‌تی روی وه‌ روی هه‌ردوگلايه‌ن پشتگيری و دوشمنايه‌تی بويه‌سه‌وه‌ ، وه‌لی له‌ئه‌نجام ئاسو حوكم ديموكراسی له‌لی ده‌ركه‌فتگه‌ .هه‌ڵوژاردن ئی جاره‌ی په‌رله‌مان و سه‌رووكايه‌تی هه‌ريم كوردستانه‌ ، گه‌شه‌ی سياسی و كوومه‌ڵايه‌تی و چالاكی ريكخرياگه‌يل مه‌ده‌نی و پيشه‌يی و ئازادی رووژنامه‌گه‌ری و ده‌ركه‌فتن جموجويل و جويله‌ی ژن و جايه‌ڵه‌يل و فره‌ڕنگی په‌رله‌مان و چه‌نه‌ها چشت تر هه‌ق خوه‌يه‌ وه‌ك گام خاسيگ ته‌ماشا بكريه‌يگ وه‌ئاراسته‌ی ديموكراسيه‌تكردن زياتر .

بيگومان ئه‌يانه‌ به‌س نين ئه‌را ئه‌وه‌ك ئيمه‌ وه‌ك مۆدێليگ پيشكه‌فتگ ته‌واو ته‌ماشای بكه‌يم ، به‌ڵكوو چه‌نه‌ها گرفت و سته‌م هه‌س ك هه‌وه‌جه‌ وه‌ خه‌بات وه‌رده‌وام ديرن ئه‌را ئه‌وه‌ك هه‌رچی ئازادی زياتر رووژنامه‌گه‌ری و قسه‌وباس و كار سياسيه‌ وه‌ره‌و نوا بووه‌يم تا راده‌يگ تاك كورد له‌وه‌رانوه‌ر مه‌شقكردن هه‌قه‌يلی هس وه‌ترس و نيگه‌رانی نه‌كه‌يگ و قانوون وه‌شيوه‌يگ سه‌روه‌ر بووگ دادوه‌ری كوومه‌ڵايه‌تی ئه‌را گشتی دابين بكريه‌يگ .

به‌شه‌ عه‌ره‌بيه‌گه‌ی عراق ك شه‌ش ساڵه‌ له‌ حوكم سه‌دام حسێن قورتاری بويه‌ ، هيمای وه‌ده‌س نه‌وين ئه‌من و ئاسايش و كيشمه‌كيش تايفی و نه‌ته‌وه‌په‌رسيه‌وه‌ ناڵنيگ و مه‌يدانيگ نيه‌ كيشمه‌كيشه‌يل سياسی وه‌خاسی له‌تی بوريه‌يگه‌ رييه‌وه‌ .
Shafaq Live
Shafaq Live