شه‌هرستانی تۆڵه‌ی‌ هه‌رێم‌ كوردستان له‌ خانه‌قین ئه‌كاده‌و‌

شه‌هرستانی تۆڵه‌ی‌ هه‌رێم‌ كوردستان له‌ خانه‌قین ئه‌كاده‌و‌
2010-09-08T11:39:54+00:00

سه‌عات 10ی شه‌وه‌كی ئمڕوو نزیكه‌ی 1500 كه‌س له‌ نيشته‌جايه‌يل شار خانه‌قین وه‌خاتر‌ نه‌وین كاره‌با له‌وه‌رده‌م قایمقامیه‌تی خانه‌قین‌ خوه‌ینيشانداين كردنه‌.قایمقام‌ شاره‌گه‌يش ئويشێ حسێن شه‌هرستانی‌ كاره‌باگه‌‌ بڕیه‌و تۆڵه‌ی‌ هه‌رێم‌ كوردستان له‌ خانه‌قین ئه‌كاده‌و‌.

وه‌گوره‌ی خه‌وه‌ره‌يل سه‌رچاوه‌يل خه‌وه‌ری به‌ش فره‌يگ له‌ مه‌ردم ئه‌و شاره‌ ڕشيانه‌سه‌ ناو شه‌قامه‌يل و دوكان و  بازاڕیان به‌سانه‌و هاتنه‌سه‌ وه‌رده‌م قایمقامیه‌ت، هاوار ئه‌كه‌ن "ئه‌گه‌ر كاره‌باگه‌مان خاسه‌و نه‌كه‌ين ‌ـ تاوه‌ره‌يل كاره‌بایی ئاگر ده‌يمن."

هاووڵاتیيگ له‌ شار خانه‌قین‌ وت" پارێزگای دیاله‌ هه‌ر وه‌ختيگ بخوازێ كاره‌با ده‌ێده‌پيمان‌ و هیچ به‌رنامه‌یگ نیه‌ ئه‌را كاره‌با داين وه‌ شاره‌گه‌مان," وتیش" ماوه‌ی دو مانگ ئه‌را سێ مانگه‌ ئه‌وه‌ حاڵ خانه‌قینه‌و له‌دويه‌كه‌يشه‌و‌ وه‌ته‌واوی كاره‌باگه‌مان بڕينه‌. "

" ئيمه‌ دى ته‌حه‌مول ئه‌ى بێ كاره‌باییه‌ ناكه‌یمن و پله‌ی به‌رز گه‌رما زیاتر بيزارمان ئه‌كا. داوا ئه‌كه‌یمن قایمقام خوه‌ی ئه‌ى كيشه‌‌مانه‌ چاره‌سه‌ر بكا."

محه‌مه‌د مه‌لا حه‌سه‌ن قایمقام قه‌زای خانه‌قین ئاشكرا كرد: "خانه‌قین له‌گشت خزمه‌تگوزاریيگ بى به‌شه‌، ئيسه‌يش ئه‌را تۆڵه‌كردنه‌وه‌ له‌كوردستان كاره‌بای قه‌زای خانه‌قین ‌بڕن"

قایمقام‌ خانه‌قین هه‌ميش وت ك‌ وه‌ڕێه‌وبه‌ر كاره‌بای دیاله‌ وتيه‌سه‌پی ك‌ وه‌فه‌رمان وه‌زیر نه‌فت كاره‌بای خانه‌قین بڕینه‌.

محه‌مه‌د مه‌لا حه‌سه‌ن زياتر وت" ئه‌يه‌ جوور تۆڵه‌ كردنه‌وه‌یگه‌ له‌ وه‌رانوه‌ر كيشه‌ی‌ نه‌فت‌ ناونى هه‌رێم و به‌غدا"

جی باسه‌، له‌شوون‌ ده‌س له‌ كاركيشانه‌وه‌ی‌ وه‌زیر‌ كاره‌بای‌ عێراق كه‌ریم وه‌حید، حسین شه‌هرستانی‌ وه‌زیر‌ نه‌فت‌ عیراق، ئيسه‌ وه‌ وه‌كاله‌ت ئه‌و وه‌زاره‌تيشه‌‌ وه‌رگرتگه‌.

Shafaq Live
Shafaq Live