سیاسه‌ت و په‌رله‌مان له‌ى وه‌خته‌یله
پۆسته‌یل بنه‌ڕه‌تى، ڕاسیه‌یل فره‌یگ ئه‌ڕامان ده‌ركه‌فت له‌باوه‌ت ئه‌و كه‌سایه‌تیه‌یل و ئه‌و قه‌واره‌یله ك له‌بان ده‌ستوور و به‌رژه‌وه‌ندى باڵاى وڵات قسه كه‌ن و له‌لیانیش قسه له‌بان خزمه‌تگوزراى و چشته‌یل تر كه‌ن و ملله‌تیش هویچ له‌لیان نه‌یه‌سه چه‌و.
تائیسه‌یش وه‌گووره‌ى زانیاریه‌یل جووراوجوور دوینیم و ژنه‌فیم ك هیمان فره‌یگ له وه‌زیره‌یل پاى راسیان ها له‌به‌غداو ئه‌و پاگه‌یانیش ها له‌ده‌یشت وڵات هه‌ر له‌ته‌هران تا دوبه‌ى، به‌عزیگ له‌لیانیش له‌كه‌نداو یا خه‌لیج وده‌ریایه‌یلیش په‌ڕیگه‌وه ئه‌را ئه‌مریكاو ئۆرپاو ده‌وڵه‌ته‌یل تر و ئیمه‌یش وه‌پیان نیه‌زانیم، وه‌لى سه‌ركرده‌یلیمان شوناسنامه‌ى ئه‌و وڵاته‌یله دیرن و دڵسووزى ئه‌ڕایان دیرن و نانه‌گه وه‌لمانا به‌ش كه‌ن و به‌ش شیر له‌لى به‌ن و به‌ش كه‌رویشك هیلنه‌وه ئه‌را ملله‌ت، وه‌ل ئه‌وه‌یشا ئویشن به‌عزیگ له‌لیان له‌ى ڕووژه‌یله دارایه‌یلیان هه‌واڵه كه‌ن ئه‌را بانكه‌یل خوه‌رئاوا یا غه‌ربى له‌وه‌ر ئه‌وه‌ك ڕسوا نه‌ون و دزیه‌گه‌یان بكه‌فیگه ده‌یشت و كاره‌یلیان ئاشكرا بكریه‌یگ جویر گه‌ناته‌كارى و تاڵانى و چشته‌یل تر، بیگومان وه‌ى جووریشه ئه‌وانه خوه‌یان خه‌نه ئه‌مان، چوینكه شوناسنامه بیگانه‌گه مقه‌یه‌تیان ئه‌كا له قانوون عراقى و له‌هه‌مان وه‌خت مقه‌یه‌تى له‌حزبه‌یل و قه‌واره‌یلیانیش ئه‌كا.
مه‌سه‌له‌یگ تر ئه‌وه‌سه ك به‌عزیگ له‌وه‌زیره‌یل لكیه‌نه قه‌ى وزاره‌گه‌و هه‌ر توان دوباره هه‌مان پۆست بگرنه ده‌س ئه‌را قوناغیگ تر، ئه‌ویش وه‌مه‌هانه‌ى ئه‌وه‌ك وه‌زاره‌گه‌ى فڵان له‌ساڵه‌یل وه‌رین روى وه‌ڕوى مه‌ترسیه‌یل فره‌یگ بویه‌سه‌وه‌و نموونه‌یگ بویه له گه‌ناته‌كارى و بڕیاره‌یل ناپه‌سه‌ن و گشت ئه‌و په‌یمانه‌یل جه‌هانیه شكانگه ك په‌یوه‌س بویه وه‌وزاره‌ته‌گه‌ى. ئمجا ئه‌ڵڵاجه‌وى له‌ى كاره ئه‌وه‌سه، ك وه‌گشت بویرى و ڕویداریه‌وه باس له‌سه‌ركه‌فتن و به‌ر وزاره‌ته‌گه كه‌ن ئه‌را ماوه‌ى ئاینده، وه‌لى له‌ڕاسى دوینید به‌ر وزاره‌گه‌یشى له‌كاڵه‌كمارانه تیه‌ڵتره‌و پیسترین بوو دیریگ . په‌رله‌مانیش له‌ى زه‌مانه بویه‌سه چشت ئه‌ڵڵاجه‌وییگ و یه‌ك وه‌رز وه‌ته‌واوى چیه‌سه‌ر و ته‌نیا یه‌ك دانیشتن له‌په‌رله‌مان كریاو تائیسه‌یش ئه‌را هه‌فت مانگه چووگ هه‌ر وه‌رده‌وامه‌و گشتیانیش مانگانه‌ى خه‌یاڵى خوه‌یان سینن و بیجگه پویل تایبه‌ت و دیارى و چشته‌یل تر له‌ماڵ ملله‌ت. دى نیه‌زانیم ئى هه‌مگه پویله ك دریه‌یگه پیان له‌ورانوه‌ر چ چشتیگه‌و چ كاریگ ئه‌نجام ده‌ن بیجگه له‌قسه‌یل بیتام نه‌وگ، بیگومان ملله‌ت عراق دى باوه‌ڕیان نه‌مه‌ندگه وه‌ئه‌ندامه‌یل په‌رله‌مان و وه‌زیره‌یل و گشت كه‌ناڵه‌یل ره‌سانن و رووژنامه‌یلیش خوه‌یان وه‌كیشه‌و گرفته‌یل ئه‌وانه‌وه خه‌ریك كه‌ن و به‌رنامه‌یلیان وه‌پیان پڕه‌و كه‌ن.
