سه‌ركرده‌يل كورد له‌ناونی سێ ريگه
{مه‌لا مسته‌فا}ی نه‌مريش وه‌ك وه‌رپرس گشت هيزه‌يل بارزانی له كوومار ، دويای شكانن هيزه‌يل له‌شكر ئيران له‌چه‌نه‌ها جه‌نگ سه‌خت ، دوياخر وه‌خوه‌ی و هيزه‌گه‌يه‌وه له {١٨ی حوزه‌يران ١٩٤٧} له‌ئاو ئاراس كردنه ئه‌وبه‌ر و ئاواره‌ی يه‌كێتی سۆڤێت جاران بوين .
هه‌ر هه‌مان ساڵ له {١٩ی حوزه‌يران}يش چوار ئه‌فسه‌رباڵای كوومار مه‌هاباد وه‌ناو { مسته‌فا خوه‌شناو، عزه‌ت عه‌بدولعه‌زيز، خه‌يروڵڵا عه‌بدولكه‌ريم ، محه‌مه‌د قودسی} له‌شوون ئه‌وه‌ك خوه‌يان دانه ده‌س حكوومه‌ت عراقه‌وه ، له‌ده‌مه‌وسوو (١٩ی حوزه‌يران ١٩٤٧} له‌شار به‌غدای پايته‌خت عراق له‌سێداره دريان .
ئمجا له‌شوون (٦٢) ساڵ له‌و رويداگ وتاريخه بايه‌سه بپرسيم ، ك كام له‌و هه‌ڵويست يا مه‌وقفه‌يله تاريخی و ئاينده‌يی بوين ؟ يا ئه‌گه‌ر {قازی محه‌مه‌د} خوه‌ی نه‌ياتاگه ده‌س ده‌وڵه‌ت ئيرانه‌وه دريا له‌سێداره‌وله‌و وه‌خته شه‌هيد بوياگ ؟ يا مه‌لا مسته‌فای نه‌مرو ياوه‌ره‌يلی ئه‌گه‌ر خوه‌يان ته‌سليم ده‌وڵه‌ت ئيران بكردان و ريگه‌ی ئاواره‌يی نه‌گرديانه وه‌ر شه‌هيد كريان ؟ يا ئه‌گه‌ر ئه‌و چوار ئه‌فسه‌رئازاديخوازه له‌لايه‌ن رژيم پاشايه‌تيه‌وه ده‌سگير نه‌كرياتان له‌و وه‌خته شه‌هيد بويان ؟ .
له‌يرا وه‌ختيگ باس له‌و رويداگه‌يل تاريخيه كه‌يم ، بيجگه وه‌فداری و دڵسووزی هه‌ريه‌كيگ له‌و هه‌ڵويسته‌يل كوردانه‌و شه‌ره‌فمه‌ندانه ، ره‌سيمنه ئه‌وه‌ك ريگه‌ی رزگاربوين له هه‌ردوگ رژيم پاشايه‌تی {ئيران و عراق} له‌و وه‌خته ريگه‌ی ئازادبوين و سه‌ركه‌فتن بوی ، چوينكه كورد خاستر له ملله‌ت و مه‌ردمه‌يل ناوچه‌گه ئه‌و دو رژيمه ناسينه . ئه‌يه بيجگه ئه‌وه‌ك شه‌هيدبوين له كيشمه‌كيش وه‌ل دوشمنه‌يل كوردا گه‌وراتر بوی له شه‌هيدبوين له‌وه‌رده‌س دوشمن ، وه‌ل ئه‌وه‌يشا رزگاربوين ئه‌را خودئاماده‌كردنه‌وه ئه‌را قوناغيگ تر له خه‌بات گه‌وراتر بوی له وه‌پيريچگن مه‌رگ .ئه‌ويش ئه‌را ئه‌و وه‌خته ك كوومه‌ڵگای كوردی زياتر له‌سه‌رده‌مه‌يل تر هه‌وه‌جه وه كه‌سه‌يل وه‌ك قازی و ئه‌و ئه‌فسه‌ره‌يل ئازاديخوازه داشت ، وه‌لی وه‌ل گشت ئه‌وانه‌يشا چاره‌نويسيانيش له‌يوا بوی ك وه‌و جووره له‌دونيا ده‌رچين . هه‌مان وه‌خت نيه‌وگ ئه‌وه‌يش له هوير بكه‌يم ك هه‌ر يه‌ك له‌و چوار ئه‌فسه‌ره راسه‌وخۆ خوه‌يان نه‌يانه ده‌س حكوومه‌ت پاشايه‌تيه‌وه ، به‌ڵكوو هه‌ر يه‌كيگيان وه‌جووريگ كه‌فتنه ده‌س ئه‌و رژيمه . چوينكه چه‌نه‌ها كه‌سايه‌تی كورد لايه‌نگر ودووس رژيم پاشايه‌تی ده‌ورداشتن له وه‌ده‌سه‌وه‌داين ئه‌و ئه‌فسه‌ره‌يله ، تا دوياخر وه‌و چاره‌نويسه ره‌ساننه‌يان . له‌وه‌ر ئه‌وه ئه‌گه‌ر خيانه‌ت ئه‌وان نه‌وياتاگ زه‌حمه‌ت بوی له‌و كويه‌وئه‌شكه‌فته‌يل كوردستانه كه‌سيگ جوور عه‌ره‌ب يا توركمان و ئاشووری ئه‌و ئه‌فسه‌ره‌يله بناسياتاگ ، دياره ئه‌گه‌ر ئه‌و كاره‌ساته روی نه‌ياتاگ ئه‌و ئه‌فسه‌ره‌يل كورده دريژه بياتانه خه‌بات وه‌رده‌وام خوه‌يان ، يا بن ئه‌و كوچگه‌يل كوردستانه له كيشمه‌كيش بوياتان وه‌ل دوشمنه‌يل كورداو گيان خوه‌يان بكردانه قوربان خاك و نيشتمانه‌گه‌يان ، وه ئه‌وه‌يش سه‌ركه‌فتن گه‌وراتريگ ئه‌را خوه‌يان توومار كرديان ، وه‌ل ئه‌وه‌يشا ئه‌و مه‌ردم لايه‌نگر قازی محه‌مه‌ده ك خوه‌ی له‌وه‌ر خاتريان كرده قوربانی نه‌تويه‌نستن ريگه له‌و كار ده‌وڵه‌ت شاهنشاهيه بگرن وه خودنيشانداين يا راپه‌ڕين و شووڕش ، به‌ڵكوو فره وه‌بيده‌سڵاتی ئه‌و سه‌ركرده‌ی كووماره له‌بنده‌س ئه‌و رژيم سته‌مكاره هيشتن و تا دوياخر دادگايی كرياو دويای دادگاييكردنيش وه‌ل دوان له‌ره‌فيقه‌يليا له‌سێداره دريان . وه‌چه‌واشه‌ی {مه‌لا مسته‌فای بارزانی} ك وه‌خوه‌ی و بارزانيه‌يله‌وه تويه‌نست وه‌ناوچه‌يگ سه‌خت كوردستان خوه‌رهه‌ڵاتاو له‌ناو چه‌ن هووزيگ كورد نه‌يار خوه‌ی و كوومار بڕه‌سيگه خاك يه‌كێتی سۆڤێت جاران . ئه‌يه بيجگه ئه‌وه‌ك له‌چه‌ن جه‌نگيگ له‌شكر ئيرانيه‌يل شكانن وه‌ك جه‌نگ { گۆجار و شنۆ و قارنه و هه‌ڤره‌س يا هه‌له‌ج و نيرگی و سوسز} ، ك له‌دويا جه‌نگيان سێ رووژ دريژه كيشاو (٤٨٣) سه‌رباز و ئه‌فسه‌ر كوشتن و (٢٧١) سه‌ربازيش يه‌خسير كردن . ئمجا له‌شوون مه‌ندنه‌وه‌ی (١١) ساڵ له يه‌كێتی سۆڤێت و دوياخر گله‌وخواردنی ئه‌را خاك نيشتمان تويه‌نست ئه‌را ماوه‌ی (١٤) ساڵ رابه‌رايه‌تی شووڕش ئه‌يلوول بكه‌يگ . وه‌يه‌يش تاريخيگ تر ئه‌را خوه‌ی و بنه‌ماڵه‌گه‌ی و نه‌ته‌وه سه‌ربه‌رزه‌گه‌ی و جموجويله ره‌واگه‌ی توومار كرد .
