زه‌نگ مه‌ترسى ده‌نگى تیه‌یگ
حكوومه‌تیگ خاس و خزمه‌تگه‌زار دروس بووگ ك خزمه‌ت وه‌مه‌ردم شه‌كه‌ت عراق بڕه‌سنیگ یا وه‌لاى كه‌مه‌وه هه‌ق ئه‌و حورمه‌تناینه له‌سیاسیه‌یل ئه‌ڕایان وه‌خاسى به‌یگه‌وه‌و گشت كیشه‌و گرفت و ناكووكى ناونى لایه‌نه‌یل بنریه‌یگه چاڵ و ده‌نگ هه‌ق زاڵ بووگ له‌بان گشت ده‌نگیگ . وه‌لى دیاره مه‌سه‌له‌گه له‌چاره‌سه‌ر ده‌رچیه‌و كه‌س نیه‌زانیگ قه‌مچیه‌گه ها وه‌ده‌س كییه‌وه؟.
وه‌زع ئیسه‌ى عراق له‌گشت وه‌ختیگ ترسناكتره ، چوینكه بویه‌سه پاشاگه‌ردانى و حوكم وڵات كه‌فته‌سه ده‌س دز و جه‌رده‌و ڕیگر و گه‌ناته‌كاره‌یل . عراق نه‌بایه‌د هویچ وه‌ختى خه‌ڵوه‌ت بووگ له‌جه‌نگ ، ئه‌گه‌ر له‌ژیر لافیشه‌و بویه هه‌ر بایه‌سه سیاسیه‌یل جه‌نگ خوه‌یان بكه‌ن و پرش ئه‌و جه‌نگیشه بكه‌فیگه وه‌ر ملله‌ت بیتاوان . ئمڕوو له‌ى عراقه ته‌خت(كورسى) سه‌ر له‌كه‌سه‌یل فره‌یگ شیوانگه‌و به‌رژه‌وه‌ندى خوه‌یان وه‌ئاشكرا خستنه‌سه بان به‌رژه‌وه‌ندى گشتى ملله‌ته‌وه ، ئه‌وه‌سه مه‌ردم خه‌ریكه له‌ناو جاده خوینیان ڕشیه‌یگ و كه‌فنه وه‌ر ته‌قینه‌وه‌ى بى ڕه‌حمانه‌و ئه‌وانه‌یش هه‌ر خه‌ریك كیشمه‌كیش و جه‌نگكردنن له‌بان كورسى و ئیسه‌یش ئه‌وه‌سه زه‌نگ مه‌ترسى ده‌نگى تیه‌یگ و ڕووشناییگ نیه‌كریه‌یگه دى.
وه‌گووره‌ى ڕاى و ئه‌ڕاى چوین شاره‌زایه‌یل ، زه‌حمه‌ته ك حوكم وڵات له‌ى عراقه بكه‌فیگه ده‌س لایه‌نیگ و ئه‌و ده‌سڵات وه‌رفراوانه داشتووگ ونه‌یلیگ كاره‌سات روى به‌یگ و كۆنترۆڵ وڵاته‌گه له‌گشت لایگه‌وه وه‌ده‌س خوه‌ى بووگ ، وه‌لى وه‌شیوه‌یگ دیموكراسیانه . ئمڕوو له‌عراق له‌جیاى حكوومه‌تیگ ده‌یه‌ها حكوومه‌ت هه‌س ، ك هه‌ر یه‌كیگ له‌لیان وه‌ئاره‌زوو خوه‌ى دویرنیگ و دڕیگ ، كه‌س خه‌ت كه‌س نیه‌خوه‌نیگ و زه‌ردمه‌ن یه‌كمیش ته‌نیا ملله‌ته‌گه‌س ك خه‌و خوه‌شى له‌لیان حه‌رام كریاس.
ئه‌گه‌ر بایگ و ئى وه‌زعه له‌یوا شیویاگه چاره‌سه‌ر نه‌كریه‌یگ له‌ئاینده‌ى نزیكیگ و حكوومه‌ت یه‌كێتى نیشتمانى له‌ماوه‌ى كه‌میگ دانه‌مه‌زریه‌یگ ، ئه‌وه بیگومان كار له‌كار ترازیه‌یگ ، وه‌تایبه‌ت ئه‌وه‌سه ك هیزه‌یل ئه‌مریكا خه‌ریكه خوه‌یان كیشنه‌وه له‌عراق و شایه‌ت بووگه هه‌ركه‌ڕاخوه‌ى و مه‌سه‌له‌ى كوشتن و بڕین وه‌ئاشكرا له‌ناو جاده‌و كویچه‌یل و مه‌سه‌له‌ى تایفى و سونى و شیعه سه‌رله‌نوو بایگه‌وه‌و ئى جاریشه ئه‌گه‌ر بایگ و ئاگره‌گه تاو بگریگ خودا نه‌خواسته كوشاننه‌وه‌ى زه‌حمه‌ته. مالكى له‌ماوه‌ى چوارساڵ گوزه‌یشت ئه‌و خزمه‌ته وه‌ملله‌ت نه‌كرد ك شوون ده‌سى دیار بووگ و ته‌نیا هه‌ر ئه‌وه نه‌وگ گشت وه‌خته‌گه‌ى وه‌مه‌سه‌له‌ى وه‌زع ئه‌منیه‌وه برده‌سه‌ر ، وه‌زع ئه‌منییش ئه‌گه‌ر بایگ و ته‌ماشاى به‌غداى پایته‌خت بكه‌ین وه‌چه‌و خوه‌دان دوینین ك هویچ خوته‌یگ ئه‌منى له‌تى نیه له‌وه نه‌وه‌گ ك هه‌رچى شوونه وه كۆنكرێت به‌سانه‌و هویچ تر ، هه‌ر وه‌ختیگیش حاڵیان بایگه ته‌نگ وسانن له سه‌یته‌رات زیاى كه‌ن و هه‌ر هه‌مان كوشتار و كاره‌سات و به‌دبه‌ختیه ، چوینكه حكوومه‌ت مالكى هه‌ر له‌بنه‌ڕه‌ته‌وه نه‌یاره‌یل فره‌یگ دیریگ و چه‌وه‌ڕى ڕووژیگ جویر ئمڕوو كردن وه‌ئاره‌زوو خوه‌یان گه‌ز و په‌یمانه‌ى وه‌زعه‌گه بكه‌ن.
خیانه‌تكار و خودفرووش و مرافه‌چیه‌یل فره‌یگیش میخ خوه‌یان كوتان و نیه‌یلن هویچ ئاشتى و دووسییگ به‌رقه‌رار بووگ ، چوینكه هه‌ر له‌سه‌ره‌تاوه ده‌رفه‌ت وه‌پیان دریاو ده‌مكوتیان نه‌كریاو هیشتنه‌یان ده‌ور بارنه‌وه‌و ئیسه‌یش هه‌ر یه‌كیگ له‌لیان وه‌پشت مه‌ردمانیگ خوڕن . ئه‌یه واقع حاڵ حازر عراقه‌و هویچ خلافیگ له‌تى نیه . ئه‌یاد عه‌لاوى خاوه‌ن لیست سه‌ركه‌فتگ یه‌كم له هه‌ڵوژاردنه‌یل گشت هه‌ق و شه‌رعیه‌تیگ ده‌یگه خوه‌ى ئه‌را دامه‌زرانن حكوومه‌ت ئاینده ، وه‌لى ده‌ستوور عراق هه‌ق وه ده‌نگ زیاتر داگه له‌په‌رله‌مان و یه‌یش هیلیگ علاوى مكوڕبوین خوه‌ى نیشان به‌یگ و پادابگریگ له‌بان داواكارى و له‌هه‌ق خوه‌ى دانه‌وه‌زیگ ، چوینكه ده‌ستوور له‌ى وڵاته له‌یوا دیاره ته‌نیا ره‌سمیگه‌و هویچ تر ، وه‌نا ئه‌گه‌ر بانه پاى ڕاسى ، ده‌ستوور بایه‌سه حوكم داشتووگ و په‌یڕه‌و بكریه‌یگ وه‌گشت به‌ند و بڕگه یا فه‌قه‌ره‌یلیه‌وه . وه‌لى دوینید وه‌چه‌واشه‌وه كه‌سه‌یلیگ هه‌ن داواى راسه‌وكردن یا ته‌عدیل ده‌ستوور كه‌ن ، وه‌تایبه‌ت له‌وه‌ختیگ باس مه‌سه‌له‌ى كورد بایگه ناو جویر جى وه‌جیكردن مادده‌ى 140 و بودجه یا میزانیه‌و قانوون نه‌فت و غاز و یشه‌یل تر ك هیمان تائیسه‌یش له‌ناونى هه‌ولێر و به‌غدا نه‌ڕه‌سیه‌سه چاره‌سه‌ر كووتایى . دى وه‌ى جووره عراق ئه‌وه‌سه مل نه‌یگ وه‌ره‌و به‌دبه‌ختى و كاولكارى زیاتر.
