زرواتیه دادڕه‌س ئه‌خوازێ
كورده‌یل و شیعه‌مه‌زه‌و بوى ، ئه‌وه بوى تویش جووره‌ها زوڵم و زوووردارى بوى وه‌ك وه‌عه‌ره‌بكردن و كووچ وه‌پیكردن مه‌ردمه ڕه‌سه‌نه‌گه‌ى له‌بان ده‌س رژیم به‌عس رمیاگ و ته‌نیا باخه‌یل سزیاگ و چه‌مه‌یل تیه‌نگ و ماڵه‌یل كاولكریاگ زیاتر هویچ تر له‌لى نه‌مه‌نده‌وه‌و گشت زه‌ویه‌یل كشتوكاڵى بویه شوون مین (لوغم)و قه‌وره‌یل وه‌جه‌م خاسترین ڕوڵه‌یل و جایه‌ڵ جوانه‌یلى ك له‌بان ده‌س رژیم دڕنده‌ى به‌عس كوشیان و فه‌وتیان و زاڵم زوورداریش له‌ڕاده‌ى خوه‌ى زیاتر ناهه‌قى كرد ، نه‌ك ته‌نیا هه‌ر ئه‌وه ، به‌ڵكوو حسه‌ینیه‌ى شاره‌گه‌یش رمان و هه‌رچى چشت له‌ناوى بوى گشتى تاڵان كرد و كرده‌ى سه‌نگه‌ر عه‌سكه‌رى ئه‌را سوپاگه‌ى ، دى قه‌ڵه‌میش تواناى نویسانن ئه‌و هه‌مگه به‌دبه‌ختى و ماڵویرانیه نه‌یریگ ك هاته بان شاره‌گه‌و مه‌ردم ره‌سه‌ن ئه‌و شاره ك نموونه‌یگ بوین له ڕاسگوویى و ئیماندارى.
له‌شوون رمیان رژیم به‌عس ، ئه‌وه بوى مه‌ردم شار زرواتیه داواى ده‌سمیه‌تداین له پیاوخاسه‌یل و خه‌یرومه‌نه‌یل كردن له‌وه‌ر خاتر بنیاتنانه‌وه‌ى شاره‌گه‌و قه‌ره‌بووكردن مه‌ردمه‌گه‌ى له‌و زه‌ره‌ده ك هاته بانیان . مه‌ردم زرواتیه نزیكه‌ى 15 هه‌زار كه‌سه‌و زوورمیان كوردن و به‌شیگیش له‌لیان عه‌ره‌بن ، وه‌لى گشت ئه‌و مه‌ردمه ك له‌و شاره ژیه‌ن جویر یه‌ك خیزانن و ژیان هاوبه‌ش له‌ناونیان وجوود داشت و گشتیان هاوكار و دڵسووز یه‌كترن و له‌خوه‌شى و له‌ته‌نگى هه‌ر یه‌كیگن ، وه‌ل ئه‌وه‌یشا گشت مه‌ردم ناوچه‌گه كه‌ره‌مدار و خاوه‌ن دیواخان و ریز و حورمه‌ت فره‌یگیش له میوان نه‌ن و هویچ فه‌رق و جیاوازییگ نه‌یرن ، یا مه‌سه‌له‌ى ره‌گه‌زى و تایفى له‌لایان وجوود نه‌یریگ و هه‌میشه حه‌ز له ژیان ئاشتى كه‌ن وه‌ل گشت كوومه‌ڵگایگا ، وه‌لى حكوومه‌ت سه‌دام ئه‌وه بوى گشت ئه‌و خیزانه‌یله ته‌فروتوینه كرد له‌وه‌خت جه‌نگ ناونى عراق و ئیران و 200 خیزان له‌و مه‌ردمه ته‌سفیر كرد ئه‌را ئیران و گشتیانیش چینه ناو حزبه‌یل دینى و علمانى و له‌وانه‌یش حزب دیموكرات كوردستان ، ئمجا توینیم بویشیم زوورم ئه‌و خیزانه‌یلیشه ك وه ته‌به‌عیه‌ى ئیرانى دریانه قه‌ڵه‌م له‌توومار یا سجل 34 – 47 – 57و عوسمانى ناو دیرن ، وه‌ل ئه‌وه‌یشا 250 له‌جایه‌ڵ جوانه‌یلیان كوشت و تا ئیسه‌یش ته‌رمه‌یلیان نه‌كه‌فته‌سه ده‌س و گشت ئه‌وانه‌یش خاوه‌ن باوه‌ڕنامه یا شه‌هاده بوین جویر دكتۆر و ئه‌ندازیار و پاریزه‌ر و پیشه‌یل تر . بیگومان تائیسه‌یش خه‌ڵك زرواتیه هویچ چشتیگ له حكوومه‌ت تازه‌ى عراق وه‌رنه‌گرتنه‌و ئومیده‌وارن حكوومه‌ت مه‌ركه‌زى به‌غداو حكوومه‌ت هه‌رێم كوردستان ده‌س یارمه‌تى ئه‌ڕایان دریژ بكه‌ن و شاره‌گه‌یان ئاوادانه‌و بكه‌ن تا بتویه‌نن جویر جاران بچنه‌وه ئه‌را شوون باوگ و باپیره‌یل خوه‌یان ك ساڵه‌هاى ساڵه‌ى له‌لى دویره‌و كه‌فتنه ، ئه‌گه‌ریش به‌دره‌و زرواتیه ها له‌بان خه‌ریته‌ى كوردستان ، بایه‌سه جموجویل بكریه‌یگ و ئى شار دڵته‌نگه قورتار بووگ له‌ده‌س داوڕیان و بایگه‌وه ئه‌را بان هه‌رێم كوردستان . دویاى ئه‌وه‌یش پرسیار ئه‌وه كه‌یم و ئویشیم : ئایا چاره‌نویس مه‌ردم شار زرواتیه چوین بووگ و تاكه‌ى له‌شوونه‌یل جیاجیاى عراق گوزه‌ر بكه‌ن ك خاك و مه‌ڵوه‌ن خوه‌یان دیرن . وه‌و ئومیده ك حكوومه‌ت هه‌رێم كوردستان هه‌وڵ و ته‌قلاى بتویه‌نیگ ئى شاره له‌خه‌م ده‌رئه‌كا.
