زەنگیگ مەترسیدار...سۆشیال میدیا جەنگ ناوەین وڵاتەیل کەێدە رخ گەپیگ وەبان دەروین مناڵەیل
ئیرنگە ئەوەگ وە دید کریەێد کاریگەری جەنگ ناوەین فەلەستین و ئیسرائیلە، بیجگە لەوەگ هەزان مناڵ لەو دوو وڵاتە قوربانیدانە چ وە بەخشین گیانیان بوود یا وە ئەندامەیل لەشیان یا دەروینیان بوود، کاریگەریەگەی لەو دوو وڵاتە قەتیس نەویە، بەڵکم دزە کردیەس وەناو وڵاتەیلتریش و کاریگەری بەدیگ وەبان تەندروسی دەروینی مناڵەیل وڵاتەیلتر دروسکردیە.
سۆشیال میدیا بویەسە مێردزمەی جەنگەگە و مەرافەیگ دەروینی وەگەرد مناڵەیلمان کەێد لەڕی ئەوەگ بڵاوەکریەێد لەریگەیاننەو.
وەپای توێژینەوەیل نزیکەی 5 ملیۆن مناڵ رویوەڕوی کاریگەریە دەروینەیل هاتنە وە مدوو جەنگ ناو وڵاتەیلە، لە زینگترین نموونەی، هەنای مناڵەیلم ئەرا هۆڵیگ بازیکردن بردم ئەوەگ ئیسفاکردم تویش شۆکم کرد!.
مناڵەیلە جویر گشت جاریگ نەوین، هەر کەسەو و هەڵسیا و دانشیت ئەرا ئەو مناڵیتر دەس ئەوشان چ دویەت چ کوڕ وە بی جیاوازی لە جیای وە بازیەیل ناو هۆڵەیل بازی بکەن هویرمانیان لای جەنگ و مەرافە بوی وەگەرد یەک، نەک یەک مناڵ و دوو مناڵ، ئەوەگ تویش شۆکم ئەوە بوی گشت مناڵەیل وەیجویرە بوین تەنیا یەک دوو مناڵ خوەیان لەی کارەساتە دویر گردوین، لە ماوەی ئەو یەک ساعەتە لەناو هۆلەگە دانیشتویم بڕیار دام وە هویردی بنووڕمە رەفتار مناڵەیلە ئەرا جویر گشت جارێ نیین.
رەسمە ئەو ئەنجامە ئەوەگ هیشتیە ئی مناڵەیلە گشتی جویریەک لەناکاو رەفتاریان ئاڵشت بوود و واز لە هەڵسوبنیش مناڵانە و پەپوولە ئاسا بارن جویر دڕندەی دەێشت و دەر رەفتار بکەن سۆشیال میدیاس.
لەی ماوەی کۆتاییە سۆشیال میدیا بویەسە ری ئاسانیگ ئەرا بڵاوکردن دویا خەوەرەیل جەنگ ناوەین ئەو دوو وڵاتە، بەدبەختانەیش بی ئاگا بویمن لەوەگ ئی جەنگە تەنیا کاریگەری وەبان ئەو دوو وڵاتە نەیرێد بەڵکم سۆشیال میدیا مناڵەیل ئیمەیش کەێدە قوربانی لەوەر چەویان نووڕیمن خەوەریل سیاسی ناو تیڤی و مۆبایلەیمان ها دەسیان نووڕنە گرتگە ڤیدیۆیل کوشتنکاری و جەنگ و خوین رشیان.
هەر یە هیشتیە، مناڵ واز لە مناڵی خوەی بارێد و دەروینیان بشیویەێد گشتی جویر یەک جەنگیان تێد لەجیای بازی، ئەو مناڵەگ رووژانیگ بازیە دڵخوازەگەی میکانۆ و ماشین بوی ئمڕوو بویە تفەنگ و پەنج شەش تفەنگ بازی رزکردیە.
جەنگ کاریگەری بەدیگ لەبان منالەیل دروسکەێد رەنگدانەوە دەێد لەبان دەروینیان جویر ئەوەگ هەس وە رخ و دڵەڕاوکی و دڵتەنگی بکەن، تویش دویاکەفتن ئەوزەڵکردن دەماخ و لەش و سووزیان کەێد، هیلێد وە سەختی وەگەرد کۆمەڵگە تێکڵا بوون و دویرە پەرێزەو بوون لە پەیوەنی دروسکردن وەگەرد کەسەیلیگتر لە گشتی گرنگتر کاردانەوەی لەناو رەفتار و هەڵسوبنیشیان.
ئەوەگ گرنگە داڵگ و باوگ لەی مەترسی گەپە هووشیار و بوود و وە چشتیگ سادە و ساکار و زودگوزەر وەری نەگرێد، تەندروسی دەروینی هویچی کەمتر نییە لە تەندروسی جەستەیی بەڵکم فرەتریشە، پێوستە پاڵپشتی دەروینی مناڵەیل بکرێد و دویریانەو بخرێد لە سۆشیال میدیا وە گشتی، تا تەندروسی دەروین مناڵەیلە پارێزراو بوود و هەس وە ناجیگیر دەروینی و ترس و خەمۆکی نەکەن کە وەیجویرە کاردانەوەگەی لە رەفتاریان دەرکەفێد.
کەشیگ مناڵانە ئەرایان دابین بکریەێد تا هەس وە ئارامی بکەن، دویریانەو بخریەێد لەو بازیەیل ئەو گرتگە ڤیدیۆیەیلە خەێدەوە هویریان لەباوەت جەنگەیلە نووڕستنەس وەپی کاریگەری لەبانیان دروسکردیە، هاتی فرە کەس هەس وەی کاردانەوەی بەدە نەکردوێد باوجی ئەگەر کەمیگ هویردەو بوی لەبان رەفتار و هەڵسودانیش و بازی مناڵەیلە ئەو مەوقە دیار دەێد مناڵەیل کۆمەڵگە وەرەو چ ئاقار بەدیگ گام هەڵگردنە هاتێ لە ئایندەیش کاریگەریەگەی بمینێد.
