(رووشنهویرى و سیاسه‌ت) نیه‌وگ له‌یه‌كترى بچه‌كنیمنه‌یان
گشت كه‌سیگ ئى چشته زانیگ ، وه‌لى له‌هه‌مان وه‌خت زوان وه‌رفراوانیگه‌و پیكهاته‌ى وشك و سه‌ختیگه، چوینكه قه‌یریگ هس پاك وجوان گریگه خوه‌ى له‌وه‌ر خاتر ئنسانیه‌ت و زه‌وى یا خاكیگ نه‌ختایى خه‌یگه وه‌رده‌س تا تویه‌م خه‌یردار و دڵسووزى و یه‌كسانى و دادپه‌روه‌رى له‌لى بكاڵیه‌یگ.
مه‌عناى ئه‌وه‌سه رووشنهویرى هه‌میشه گه‌ردیگه شوون گویڕانكارى و تازه‌كردنه‌وه‌ى واقع و باوه‌ڕ وه گوزه‌یشت دیریگ و هه‌ر وه‌گووره‌ى ئه‌وه‌یش ده‌سنیشان ئاینده‌و ئاست سایكۆلۆژى كوومه‌ڵگا ئه‌كا له‌ڕوى خراوى و خاسیه‌وه، وه‌ل ئه‌وه‌یشا نه‌خشه‌ى ده‌مچه‌و خه‌ریته‌ى ئاینده‌و ڕاده‌ى هویرو فكر و داناین یا ئبداع دانه‌یگ له‌هه‌ر كوومه‌ڵگایگ.
رووشنهویرى هه‌ناس دریژیگ توایگ له‌گویڕیان، چوینكه په‌یوه‌سه وه‌عومر كوومه‌ڵگایه‌یل و له‌هه‌مان وه‌خت وه‌ل رووشنهویریه‌یل ترا ئاڵشت بووگ و گویڕانكارى تیه‌یگه بانى، یه‌یش وه‌گووره‌ى ڕووژگار و تیكڵایى ملله‌ته‌یل و كوومه‌ڵگایه‌یل وه‌ل یه‌كا، ك له‌ى حاڵه‌ته رووشنهویریه‌گه‌یش په‌یوه‌ندى په‌یا ئه‌كاله‌ناونى مه‌ردم و له‌ئه‌نجامیش ڕووشنهویرى تازه‌یگ تیه‌یگه وجوود ك وه‌پى ئویشن رووشنهویرى هاوریاگ یا مسته‌ورد. وه‌لى سیاسه‌ت جویر ئه‌وه‌ك ئاشكراس(هونه‌ر خه‌ریككردن)ه‌و ئامانجه‌یل خوه‌ى جى وه‌جى ئه‌كا له‌بان هساو رووشنهویرى ئاماده‌كریاگ، ك ئه‌ویش رووشنهویرى كوومه‌ڵگاس. مه‌عناى ئه‌وه‌سه سیاسه‌ت، راسیه‌گه ئه‌ڵه‌وگه‌ردنیگ و شیه‌وكردنیگ ئه‌ڕاى ئه‌كا وه‌گووره‌ى فامستن و به‌رژه‌وه‌ندى و مه‌یل خوه‌ى.
سیاسه‌ت له‌بان شوون ئاماده‌كریاگیگ دامه‌زریه‌یگ له‌وه‌ر خاتر هه‌قه‌یل بریاگ و خوریاگ و ده‌خاڵه‌تكردن له‌كیشمه‌كیش و ڕوى وه‌ڕوى بوینه ئه‌را وه‌رگیریكردن یا دیفاع له‌ى رووشنهویریه. یه‌یش وه‌و مه‌عنا ك سیاسه‌ت ده‌ور سه‌ربازیگ دوینیگ له‌جه‌نگ و ئاماده‌س ئه‌را هه‌ر فه‌رمانیگ له‌هه‌ر وه‌ختیگ، ئمجا به‌راورد یامقارنه له‌ناونى سیاسه‌ت و رووشنهویرى ئه‌وه‌سه ك سیاسه‌ت داواى گویڕانكارى گورج ئه‌كا هه‌رچوینیگ بووگ، وه‌لى رووشنهویرى داواكار ئه‌وه‌سه گویڕانكارى یه‌واش و ئارام بكریه‌یگ ، چوینكه په‌یوه‌سه وه‌بنه‌ڕه‌ت و ڕیشگ كوومه‌ڵگاو ڕاده‌ى توانایى كوومه‌ڵگاوه له‌وه‌رگرتن گویڕانكارى.
