دين و هه‌ڵوژاردن

دين و هه‌ڵوژاردن
2009-11-26T09:42:02+00:00

هويچ گاميگ له‌ژيانی نه‌نه‌يگ ئه‌گه‌ر نه‌زانيگ په‌روه‌ردگار وه‌پی رازيه‌ يا نه‌ء ، يه‌يش هه‌ق هه‌ر كه‌سيگه‌ ك په‌يوه‌سه‌ وه‌ دين و مه‌زه‌وه‌گه‌ی و هويچ گه‌ردو خوه‌ڵيگ نيه‌گريگه‌ خوه‌ی له‌و كاره‌ ك ئه‌نجامی ده‌يگ . ئمجا له‌وه‌ر ئه‌وه‌ك ئيسه‌ ئيمه‌ هايمنه‌ نزيك ئه‌و هه‌ڵوژاردنه‌يل گرنگ يا موهمه‌ ك هه‌ڵوژانن ئه‌ندامه‌يل په‌رله‌مان عراق تازه‌س و گشت قه‌واره‌يگ سياسی هه‌وڵ ئه‌وه‌ ده‌يگ جوانترين و خاسترين چشتيگ له‌ هه‌گبه‌ی خوه‌ی نيشان به‌يگ تا ده‌نگ ده‌نگده‌ره‌يل باريگه‌ده‌س ، بيگومان يه‌يش هه‌ق خوه‌يه‌ ، وه‌لی فره‌ وه‌داخه‌وه‌ له‌هه‌مان وه‌خت دوينيم ك قه‌يريگ له‌ قه‌واره‌يل سياسی هه‌وڵ ئه‌وه‌ ده‌ن له‌ڕيگه‌ی خوه‌شه‌ويسی مه‌ردمه‌وه‌ ئه‌را دين و مه‌زه‌وه‌گه‌يان ده‌نگه‌يليان بارنه‌ده‌س و له‌و ڕيگه‌وه‌ بگه‌ردنه‌ نوايان يا ئستغلاليان بكه‌ن و خوه‌يان له‌خوه‌يانه‌وه‌ فه‌توای شه‌رعيش ده‌ن و دی نيه‌زانن هاووڵاتی عراقی رووشنهويری له‌ هه‌ڵوژانن ديريگ و تويه‌نيگ قانجاز و زه‌ره‌د خوه‌ی له‌يه‌ك جياوه‌ بكه‌يگ .

ئمجا له‌يرا پرسيارگرنگ يا موهميگ كه‌فيگه‌ هويرمان ، ك ئه‌ويش ئه‌وه‌سه‌ ئايا هاووڵاتی تويه‌نيگ ده‌نگ خوه‌ی به‌يگه‌ ئه‌و ليسته‌ ك له‌لای خوه‌يه‌وه‌ ، وه‌گونجياگ زانيگه‌ی ك هه‌رچه‌نی ئه‌و ليستيشه‌ دروشم يا شعار دينی به‌رزه‌و نه‌كردگه‌ وه‌بی هويچ كيشه‌يگ شه‌رعی ؟ ئمجا ئه‌گه‌ر كه‌ميگ هوير بخه‌يمنه‌ لای پرسياره‌گه‌ له‌ جواوه‌گه‌ی (به‌ڵی) كه‌يمنه‌ دی و تويه‌نيگ ، چوينكه‌ هاووڵاتی هه‌ق خوه‌يه‌ ئه‌گه‌ر ده‌نگ به‌يگه‌ نه‌ته‌وه‌ يا قه‌وميه‌ت خوه‌ی و ئه‌و ليسته‌ ك نوێنه‌رايه‌تی كه‌يگ له‌ ئامانج وريڕه‌وی وه‌ گشت باوه‌ڕيگه‌وه‌و بيجگه‌ ئه‌وه‌يش واز له‌دينه‌گه‌ی خوه‌ی باريگ . راسه‌ دين هه‌ميشه‌ له‌ پله‌ی يه‌كمه‌ ، وه‌لی هويچ كيشه‌يگ نيه‌ ئه‌گه‌ر له‌دينه‌گه‌ ده‌رنه‌چووگ . دی تويه‌نيگ وه‌ هه‌ر شيوه‌يگ خوه‌ی توايگ ده‌نگ بيه‌يگ و له‌هه‌مان وه‌ختيش په‌يڕه‌و نماز و رووژگ خوه‌ی بكه‌يگ و هويچ گوناهيگ له‌بانی نيه‌ له‌وه‌ك نوێنه‌ر خوه‌ی هه‌ڵوژانگه‌ ، چوينكه‌ ئه‌وه‌ سه‌ركه‌فتنيگه‌ ئه‌را ئامانج و ريڕه‌وه‌گه‌ی و مه‌رجيگ بنه‌ڕه‌تی نيه‌ ك ئه‌و هه‌ڵوژاننه‌ فشاردرياگ (محصور) بووگ له‌ناونی كه‌وان دين و مه‌زه‌و .

بيگومان ئه‌قڵ ساق رازی بووگ له‌بان ئامانجه‌يل و گرديانه‌و كه‌يگ وه‌بی ئه‌وه‌ك زه‌ره‌د به‌يگ له‌ پرووزی دين ، چوينكه‌ وه‌ ديد و نوڕستن پڕ له‌ئه‌زموونيگه‌وه‌ ته‌ماشای داواكاری ئه‌و كه‌سه‌يله‌ كه‌يگ ك هان مه‌ردم ئاسايی ده‌ن وه‌ هويروڕای دينی و مه‌زه‌ويه‌وه‌و توان باوه‌ڕيان بكيشن و هه‌وڵ ئه‌وه‌ ده‌ن دين و هه‌ڵوژانن له‌يه‌كتری نزيكه‌و بكه‌ن له‌وه‌ر خاتر وه‌ده‌سهاوردن ده‌نگ له‌بان هساو دين ، ئمجا ئيمه‌ وه‌گشت باوه‌ڕيگه‌وه تويه‌نيم بويشيم ك هاووڵاتی عراقی وه‌تايبه‌ت له‌ی هه‌ڵوژاردن ئاينده‌ هويره‌و له‌خوه‌ی كه‌يگ و بووگه‌ ئه‌زموون ئه‌ڕای ك ده‌نگ خوه‌ی ده‌يگه‌ كی ، چوينكه‌ وه‌و ئه‌زموونه‌وه‌ گوزه‌ر كردگه‌و هه‌وڵ ئه‌وه‌ ده‌يگ ئه‌و غه‌ڵه‌ته‌يله‌ دوباره‌وه‌ نه‌كه‌يگ و نه‌خه‌ڵه‌تيه‌يگ وه‌و دروشم يا شعاره‌يله‌ ك حزبه‌يل و قه‌واره‌يل به‌رزيه‌و كه‌ن ، له‌وه‌ر ئه‌وه‌ له‌گشت حاڵه‌تيگ هه‌ڵوژانن مينيگه‌ لای خاوه‌ن ئه‌قڵه‌يل رووشنا ك ده‌س ئی ملله‌ته‌ گرن ئه‌را ئه‌وه‌ك رووشنايی نيشانيان بيه‌ن و دويريانه‌و بخه‌ن له‌ڕيگه‌ی تيه‌ريكی.

Shafaq Live
Shafaq Live