ئه‌را چه مالكی داوای وه‌خشين له خه‌ڵك هه‌ڵه‌بجه نه‌كرد؟
، هه‌ر ده‌سڵاتيگ خوينمژ ئه‌گه‌ر تاوان گه‌ورايگ كردويگ وه‌رانوه‌ر ملله‌ته‌يل و دوياخر ئه‌و ده‌سڵاته له‌ناو چووگ و ده‌سڵاتيگ تر په‌يا بووگ و جياواز له‌و رژيمه‌گه‌ی ترو توايگ خوه‌ی له‌يوا نيشان به‌يگ ك خاستره له‌واكه‌ی تر وه‌هه‌ر حاڵ له‌عراق و له‌شوون پرووسه‌ی ئازادی ملله‌ته‌يل عراق و له‌ناوچگن ده‌سڵات دكتاتۆری حزب به‌عس و ، وه‌په‌يابوين عراقيگ تازه چه‌وه‌ڕی ئه‌وه كريا فره‌يگ له كيشه‌ی كورد وه‌ل حكوومه‌ت مه‌ركه‌زی به‌غدايا بايگه چاره‌سه‌ركردن وه‌تايبه‌ت كيشه‌ی زه‌خم قويل ئه‌نفال و هه‌ڵه‌بجه ك دو تاوان گه‌ورای دژ وه‌ئنسانيه‌ته له‌عراق و جه‌هان . وه‌لی وه‌داخه‌وه ئه‌وه‌ك هس وه‌پی كريه‌يگ ئه‌وه‌سه ك ده‌سڵاته ئيسه‌ی عراق فره وه‌جددی وئاشكرا كار له‌بان ئی دو كاره‌ساته نيه‌كه‌ن وه‌تايبه‌ت له‌ئاست ئاشناكردن دونيای ده‌يشت ك ئه‌را كورد فره گرنگ يا موهمه گشت جه‌هان بزانيگ و له‌ڕيگه‌ی زوان ده‌سڵاتدارێتی ئيسه‌ی عراقه‌وه جينۆسايد كورد بناسريه‌يگ جوير ئه‌وه‌ك په‌رله‌مان عراق ئاشنای كرد .
بيگومان له شوون گرفته‌يل ناونی هه‌ريم كوردستان و حكوومه‌ت مه‌ركه‌زی به‌غداوه زياتر ئی كيشه‌يله خريانه كنار و تا ئيسه‌يش تاوانباره‌يل ئه‌نفال و كيمياواران هه‌ڵه‌بجه هيمان وه سزای خوه‌يان نه‌ڕه‌سينه . ئمجا له‌شوون نزيكه‌وبوين هه‌ڵوژاردن په‌رله‌مان عراق دوباره وه‌رپرسه‌يل باڵای عراق روی كه‌نه هه‌ريم كوردستان ئه‌را خودنزيكه‌وكردن له كوردو جاده‌ی كوردی تا له‌يوا نيشان بيه‌ن ك ئه‌يانه جياوازن له ده‌سڵات وه‌رين و ئه‌را ئی مه‌به‌سيشه مالكی چيه هه‌ڵه‌بجه ، وه‌لی ئه‌وه‌ك مايه‌ی پرسياره ئه‌وه‌سه تا ئيسه حكوومه‌ت عراق ئاماده نه‌ويه له‌وه‌رده‌م هه‌ريم كوردستان و عراق و جه‌هان وه ڕه‌سمی ئاشكرای بكه‌يگ و داوای وه‌خشين له ملله‌ت كوردستان بكه‌يگ ك رووژيگ له رووژان عراق وه‌رين ئی ملله‌ته جينۆسايد كردگه هه‌ر له‌وه‌ر ئه‌وه ك كورد بوينه . شايه‌ت به‌عزه كه‌سيگ له‌يوا بفاميگ گ داوای وه‌خشين چه‌يگه ئه‌گه‌ر بووگ يا نه‌وگ ، وه‌لی له‌ڕوی سياسی و قانوونيه‌وه ئه‌را كورد فره گرنگ يا موهمه‌و دگان وه‌پيناين باوه‌ڕ وه‌پيكرياگيگه له‌گشا روييگه‌وه . وه‌ل ئه‌وه‌يشا به‌رهه‌م تريش هه‌س ئه‌گه‌ر هات و دگان وه‌پيا نريا بايه‌سه راسه‌وخۆ يا موباشريش قه‌ره‌بوو يا ته‌عويزيش له‌شوونی بووگ ، ئمجا ئه‌گه‌ر هات و ئی كاريشه چه‌سپيا بيگومان بووگه پشتگيرييگ تر ئه‌را ملله‌ت كورد و پايه‌ی كورد بته‌وه‌و بووگ له‌ئاست ناوخوه‌يی و جه‌هانی ، وه‌لی دی نيه‌زانيم هووكار چه‌س و ئه‌راچه وه‌ڕه‌سمی داوای وه‌خشين له كورد نيه‌كريه‌يگ ؟
