ئایا كوومه‌ڵگاى عراقى خه‌مسه‌رده له‌بان تازه‌گه‌رى؟
یه‌ك له‌شوون یه‌ك بوون، بیگومان یه‌یش چه‌سپیه‌یگ له‌بان گشت كوومه‌ڵگایه‌یل وه‌گشت تایبه‌تمه‌ندى و شیوازه‌یلیانه‌وه، وه‌ل ئه‌وه‌یشا هووكاره‌یلیگ سه‌ره‌كى هه‌س كاریگه‌رن له‌ڕیڕه‌و پرووسه‌یل كوومه‌ڵایه‌تى و سیاسى و ڕووشنهویرى وه‌رده‌وام له‌گشت قوناغیگ ، ك تویه‌نیم وه جوانى شیه‌وكردن ئه‌ڕاى بكه‌یم یا ئاشكراى ماوه‌ى كاریگه‌ریه‌گه‌ى بكه‌یم، وه‌جووریگ ك له‌بنه‌ڕه‌ته‌وه ئاڵشت بووگ و له‌هه‌مان وه‌خت كوومه‌ڵگایش وه‌پى ئاڵشت بووگ.
بیگومان نوڕستنه‌یل فره‌یگ هه‌س ك تایبه‌تن وه چوینیه‌تى گویڕانكارى و هه‌ر یه‌كیگ له‌لیان وه‌گووره‌ى وجوود فكرى و ئایدۆلۆجیه، وه‌لى ئه‌گه‌ر بایگ و شیه‌وكردن زیاتر ئه‌ڕاى بكه‌یم، دوینیم زوورمیان وه‌گووره‌ى جه‌ختكردنه له‌بان پشتگیرى كاره‌گه‌و فره‌یگ له‌و نوڕستنه‌یله تایبه‌تن وه‌ئه‌وه‌ك تواناى كوومه‌ڵگایه‌یل تا چه‌نیگه ئه‌را وه‌رگرتن و ڕازیبوین وه‌و تازه‌گه‌رى و گویڕانكاریه؟
تاریخ و سروشت كوومه‌ڵگاو مه‌سه‌له‌ى ڕووشنهویرى و په‌یوه‌ندیه‌یل كوومه‌ڵایه‌تى و ئه‌و چشته‌یله ك پشتگیرى له‌لى كه‌ن وه‌ل ئه‌و هاوكیشه‌یلا ك ژیرخان ئابوورى و دارایى به‌سنه یه‌كه‌وه گشت ئه‌یانه له‌و په‌یوه‌ندى و كاریگه‌ریه‌یل ئاڵشت وئوڵوشته‌سه وه‌ل یه‌كتریا، ك یه‌كیگن له‌و شیواز و هووكاره‌یله ك بایه‌سه وه‌چه‌و متمانه‌وه ته‌ماشا بكریه‌ن له‌گشت پرووسه‌یگ.
ئمجا كیشمه‌كیش وه‌رده‌وام ك فكره‌یل چه‌سپننه‌ى و ئه‌وه‌ك شوونى گریگ له تازه‌وه دویاى تازه‌گه‌رى و گویڕانكارى، گشت ئه‌یانه‌یش له‌و خاڵه‌یله‌نه ك بایه‌سه له‌یه‌كه‌و بدریه‌یگ و ئاشكرا بكریه‌یگ . بیگومان ئه‌گه‌ر بایگ ته‌ماشایگ كوومه‌ڵگاى عراقى و شیواز و تایبه‌تمه‌ندى و تاریخ و ڕویداگ و دیارده‌یل گه‌وراى بكه‌یم ك وه دریژایى تاریخ ڕویدا، ئه‌وه تویه‌نیم مه‌زه‌نه‌ى بكه‌یم وه شیوه‌یگ زانستى و بزانیم تا چه‌نیگ تواناى وه‌رگرتن ئه‌و چشته دیریگ ك رویده‌یگ له‌لى له‌شوون گشت قوناغیگ و تا چه‌نیگ ئاماده‌ى ئه‌و گویڕانكاریه بویه. وه‌ل ئه‌وه‌یشا تویه‌نیم ده‌سنیشان گرفته‌یل بكه‌یم و گشت كیشه‌یگ دیارى بكه‌یم و بزانیم ئه‌و سه‌رچه‌وه‌یله چه‌س ك له‌وه‌رده‌م مه‌سه‌له‌ى پیشكه‌فتن و جیوازبوین وسیه‌ن وه‌ره‌و تازه‌گه‌رى و گویڕانكارى.
ئاشكراس ك كوومه‌ڵگاى عراقى فره جووره له پیكهاته‌یلى و بنه‌ڕه‌ت كوومه‌ڵایه‌تیه‌گه‌ى پیكهاتگه له چین و لایه‌نه‌یل فره‌یگ و پیكهاتگه له‌ره‌گه‌ز جوورا و جوور و دین و مه‌زه‌وه‌یل جیاواز، ك زه‌حمه‌ته گشتى جویر یه‌ك دابنه‌یم له‌ڕوى وه‌رگتن تازه‌گه‌ریه‌وه، چوینكه هه‌وه‌جه وه ئه‌وه دیریم گشت ئه‌و پیكاهته‌یله یه‌كه‌و بگرن له‌ى باوه‌ته‌وه تا بتویه‌نیم شیه‌وكردن ئه‌نجام به‌یم و بزانیم تواناى گشت كوومه‌ڵگا چه‌نیگه له‌بان تازه‌گه‌رى و گویڕانكارى.
ئیمه بایه‌سه ئه‌وه بزانیم ك مه‌سه‌له‌ى گویڕانكارى ئه‌گه‌ر بایگ و قوناغ وه قوناغ وه شیوه‌یگ ئاسایى ئه‌نجام بدریه‌یگ ، ئه‌وه بیگومان له‌گشت مه‌یدانیگه‌وه پیشكه‌فتن په‌یا بووگ ك هه‌رچه‌نى كیشه‌و گرفت له‌نواى بووگ، وه‌لى ئه‌و وه‌خت و ماوه ئه‌را پرووسه‌گه ئه‌وه مینیگه بان وه‌رگرتن كوومه‌ڵگا ئه‌را ئه‌و چشته، وه‌لى بیگومان كوومه‌ڵگاى عراقى هویچ وه‌ختیگ نیه‌ونه كیشه‌و گرفت له‌وه‌رده‌م مه‌سه‌له‌ى پیشكه‌فتن و گویڕانكارى و تازه‌گه‌رى، چوینكه تازه‌گه‌رى له هه‌ر مه‌یدانیگه‌وه خزمه‌ت وه خوه‌یان ره‌سنیگ.
