ئایا دیموكرات خوازه‌یل ئه‌مریكا خه‌تایل خوه‌یان له‌ وه‌راوه‌ر ملله‌ت كورد راسه‌وكه‌ن ؟

ئایا دیموكرات خوازه‌یل ئه‌مریكا خه‌تایل خوه‌یان له‌ وه‌راوه‌ر ملله‌ت كورد راسه‌وكه‌ن ؟
2009-09-17T07:53:16+00:00

مه‌حه‌مه‌د ره‌زا شای ئیران و سه‌دام گوڕوه‌گوڕ وهیشته‌یان ده‌س دوسی بیه‌نه‌یه‌كتر ، راگه‌یاندن جه‌هانی ئی ده‌سداینه‌ ك گوڕانكاریه‌یل گه‌ورایگ وه‌شوینیه‌و بوی نه ‌ته‌نیا ئه‌را عراق به‌ڵكم ئه‌را سه‌راسه‌ر ناوچه‌گه‌  ئه‌را بینه‌ره‌یل وگوشگره‌یل و خوه‌نه‌ره‌یل نه‌قڵ كرد. به‌شیگ له‌و راگه‌یاندن جه‌هانیه‌ تاقم تلفزیونه‌یل ئه‌مریكاو رووژنامه‌ نویسه‌یل و په‌یامنیره‌یل رادیوه‌يل ئه‌مریكی بوین ك هیورده‌كاریه‌يل ئه‌و ده‌سداینه‌ له‌ ناونی سه‌دام و شای گوڕوه‌گوڕ ئه‌را كوشك چه‌رمگ و جیمی كارته‌ر دیموكرات خواز نه‌قڵ كرد ك تازه‌ هاتویگه‌ كوشگه‌گه‌وه‌.

شوینه‌وار ئه‌و ده‌سداینه‌ له ‌بان ژیان وگوزه‌ران ملله‌ت كورد فه‌ره‌ سه‌خت و ده‌ردناك بوی . بیجگه‌ ئه‌و نسكو یانه‌كسه‌ ك تویش شۆڕش ئه‌یلول هات و له ‌شوین ئه‌وه‌ كوشتاره‌یل ده‌سه‌جه‌می و له ‌ناوبردن ژیرخان ئابووری و هه‌ڵمه‌ته‌یل وه‌عه‌ره‌ب كردن و كوچ وه‌زور و ده‌س ناینه‌ بان موڵك و زه‌یوهاوڵاتیه‌یل كوردمان ؛ ملله‌ت كورد وه ‌چه‌و دوژمنه‌و نورستیاده‌ سیاسه‌ته‌یل ئه‌مریكا له ‌ناوچه‌گه‌ . وه‌ختیگ جه‌نگ یه‌كم خه‌لیج ده‌س وه‌پیكرد و هێزه‌یل مارینز ئه‌مریكا ره‌سینه‌ كنار ئاوه‌يل كوه‌یت ئه‌را تاڕانن هێزه‌یل عراقی له ‌خاك ئی وڵاته‌و كوشاننه‌وه‌ی بیره‌یل نه‌فت گڕگرتگ ؛ سه‌رۆك بوش باوگ پیشره‌فت سه‌ربازه‌یل ئه‌مریكی ئه‌را ناو قویلایی خاك عراق وسان و له‌ سه‌ركرده‌یل سه‌ربازی ئه‌مریكی تواست له‌ وه‌ زیاتر وه‌ره‌و نوا نه‌چن و قاپی شاره‌یل باشوورعراق له‌وانه‌یش به‌غدای پایته‌خت نه‌كوتن ك زه‌مینه‌ی داگیركردنی و نجات داین ملله‌ت عراق له‌ رژیم زوڵم و سته‌م به‌عس له ‌سال ١٩٩١ ئاماده‌ بوی.

وه‌لی ئه‌وه‌گ رویدا ئه‌وه‌ بوی ك عه‌لی حه‌سه‌ن مه‌جید ناسریاگ وه‌عه‌لی كیمیاوی له‌ وه‌رده‌م زوم كامیرايل تلفزیون پا نیاده‌ بان سه‌ر مه‌ردم بی ده‌سه‌ڵات وه ‌ده‌س به‌سیاگ شاره‌یل وئاوایه‌یل باشوور وڵات و وه ‌ده‌وانچه‌ نوقره‌ییه‌گه‌ی وه‌ل زه‌رده‌خه‌نه‌ ژاراویه‌گه‌ی گوله‌ نیاده‌ سه‌ریانه‌و. نزیكیو ئه‌و كاره‌ساته‌یله‌ وه‌ل مه‌ردم كوردستانیش دواره‌وه‌ بوود ؛ مه‌ردم شاره‌یل و ئاوایه‌یل خوه‌یان چوڵ كردن و له‌ ژیر توپ واران  و بوردومان هه‌لیكۆپته‌ره‌یل به‌عس قورتار كردن و دانه ‌كیوه‌ و ملیونان نه‌فه‌ر له‌ ژن ومناڵ و پیر و په‌ك كه‌فتگ له‌وه‌ر زوقم و وه‌فر و واران وه ‌بی سه‌رپه‌نایگ خوه‌یان له ‌پای كوچگه‌یل و به‌ڕه‌یل شاردنه‌و وكامیرا‌گان جه‌هانییش ئه‌و دیمه‌نه‌یل خه‌مناك و ده‌ردناكه‌ ئه‌را ملله‌ته‌یل جه‌هان ره‌سانن ك بیوه‌ بایس ئه‌وه‌گ چه‌ندین خوه‌ی نیشانداین له‌ وڵاته‌یل جه‌هان ئه‌نجام بگری و خوازیار مه‌قه‌یه‌تی كردن گیان مه‌ردم مه‌ده‌نی بوون . راسه‌ به‌رقه‌راری ناوچه‌یل ئه‌من ئه‌را كورد له‌ ئه‌نجام ته‌قالاو كوشش كومه‌ڵگای ناوده‌وڵه‌تی ئه‌نجام گرد ، وه‌لی وه‌رگری مه‌ردانه‌ و دلیرانه‌ی هێز پێشمه‌رگه‌ی كوردستان له‌ وه‌راوه‌ر پیشره‌فت هێزه‌یل به‌عسی وه‌ره‌و ئاوای ( كوری ) هه‌ڵكه‌فتگ له‌ نزیك ناوچه‌ی سه‌ڵاحدین هوكار سه‌ره‌كییگ بیو تا بڕیارئه‌نجومه‌ن ئاسایش ناوده‌وڵه‌تی له‌باوه‌ت دیاری كردن ناوچه‌یل ئه‌من ئه‌را ملله‌ت كورد ده‌ر بچوود ك ئی بڕیاره‌ وه‌ گوشاره‌یل مه‌ردمی وجه‌ماوه‌ری رژیم به‌عس گوڕوه‌گوڕ ناچار كرد دایره‌و ده‌زگايل خوه‌ی له‌ پارێزگایه‌یل كوردنشین بكیشیگه‌و ك له‌ ساڵ ١٩٩١ تا ئیسه‌ ئه‌و پارێزگایه‌یله‌ له‌ لایه‌ن روڵه‌یلی وه‌ڕیه‌وچوود . وه‌ختیگیش بوش كوڕ له‌ ساڵ ٢٠٠٣ بڕیاردا هێزه‌یل ئه‌مریكی ئه‌را ئازاد كردن ملله‌ت عراق بانه‌ ناو خاك عراق ؛ هه‌رێم كوردستان یه‌كم ناوچه‌ی عراقی بیو ك باوشی ئه‌را ئه‌و سه‌ربازه‌یله‌ كرده‌و ك هه‌زاران كیلومه‌تر بڕین وخوه‌یان ره‌ساننه‌ ناو خاك عراق .

به‌ش گه‌ورای ئه‌و زه‌ره‌ده‌یله‌ ك له‌ عراق وه‌گشتی و كوردستان وه‌تایبه‌ت كه‌فت ، وه‌رپرسیاریه‌تیه‌گه‌ی كه‌فیگه‌ بان پۆڵ برێمه‌ر ك پاشا گه‌ردانی راسه‌قینه‌ له‌ عراق خسته‌ڕی و ده‌یان ملیار دولار له‌ پیوله‌یل عراق وه ‌بیهوده‌ و له‌ پروژه‌یل دروكین گوم بیو و برێمه‌ر ری دا سه‌ران رژیم به‌عس ك وه ‌ناوه‌یلتر بانه‌ مه‌یدان سیاسی عراق و دیواخر ره‌ساننیان ئه‌را په‌رله‌مان و شیونه‌یل گرنگ ده‌وڵه‌تی . له‌ باوه‌ت هه‌رێم كوردستانیش برێمه‌ر هوكار سه‌ره‌كی یه‌كلاوه‌ نه‌بیون كێشه‌یل ناونی هه‌رێم و حكوومه‌ت به‌غدا بیو وه ‌تایبه‌ت كێشه‌ی ناوچه‌یل جی ناكوكی له‌وانه‌یش كه‌ركوك ؛ به‌عزی سه‌رچاوه‌یل ئویشن برێمه‌ر فه‌ره‌ خوسه‌ی له ‌كورد هاتگه‌و كینه‌ی گه‌ورایگ له‌ی باوه‌ته‌ له‌دڵی بیوه‌ ؛ به‌ڵێ برێمه‌ر جور هنری كیسنجه‌ر وه‌زیر كاروبار خارجیه‌ی ئه‌مریكا له‌ ساڵ ١٩٧٥ ئاماده‌ بیوه‌ ملله‌ت كورد بكه‌یگه‌ قوربانی ئه‌را رازی كردن وڵاته‌یل هاوسای عراق ك وه‌ل ئه‌مریكا ناكوك بیون . وه‌هه‌رحاڵ خه‌وه‌ره‌یلیگ ك له‌ واشنتونه‌و ره‌سن ئیوشن سه‌رۆك ئه‌نجومه‌ن پیره‌یل ئه‌مریكا و ئه‌ندام ولایه‌ت كالیفۆرنیا نگه‌رانی خوه‌یان له‌ باوه‌ت ره‌فتار ئی چه‌ن مانگه‌یل دیواخره‌ی حكوومه‌ت به‌غدا وه‌ل كورد نیشاندانه‌ له‌وانه‌یش كل كردن فرقه‌یگ له‌ جه‌یش عراقی ئه‌را كه‌ركوك و پێشنیار كردنه‌ ك نویسینگه‌ی نوێنه‌رایه‌تی ئه‌مریكا له‌ هه‌ولێربكریه‌یگه‌ قونسولیه‌ تا نوای ده‌سدریژیه‌یل به‌غدا بگرێ . له‌یوا تیه‌یگه‌ وه‌رچه‌و دیموكراتخوازه‌یل له‌ی دویاخره‌ ئاگاوه‌ بیونه‌ له ‌یه‌گ ك هه‌رێم كوردستان بازیواز راسه‌قینه‌یگه‌ له‌ مه‌یدان سیاسه‌ت عراق و بایه‌د ئی هه‌رێمه‌ وه‌شیوه‌ی سه‌قامگیر و ئارام بمینیگه‌ی و ئی هه‌ڵویسته‌ ‌ نیشانه‌ی گویڕیان له‌ هه‌ڵویست دیموكرات خوازه‌یله‌ له وه‌راوه‌ر كێشه‌ی كورد .

له‌ كوتایی مه‌نگه‌ بویشیم ئایا دیموكرات خوازه‌یل ئه‌مریكا هانه‌ ته‌ما غه‌ڵه‌ته‌یل ساڵ ١٩٧٥ خوه‌یان له‌ وه‌راوه‌ر ملله‌ت كورد راسه‌و بكه‌ن . ئایا دیموكرات خوازه‌یل تویه‌نن سه‌رله‌نوو متمانه‌ی‌ ئه‌وانه‌ وه‌ده‌س بارن ك وه‌رجله‌ یه‌ له‌ پشته‌وخنجه‌ر دانه‌سه‌لیان له‌وانه‌یش ملله‌ت كورد ؟  بی گومان ملله‌ت كورد چه‌وه‌ڕی گامیگ عه‌مه‌لی له‌ دیموكرات خوازه‌یل ده‌سه‌ڵاتدارئه‌مریكا كه‌یگ تا نگه‌رانی جارانیان له‌ باوه‌ت ئی حزبه‌ بڕه‌ویگه‌و.

Shafaq Live
Shafaq Live