ئاگریگه‌و دویكه‌ڵه‌گه‌ى چووگه چه‌و گشتمان!!!
كوردستان و ئیكه‌ش دامه‌زرانن حكوومه‌ت و په‌رله‌مان كوردستان؛ ڕووڵه‌یل وه‌فادار و چه‌ونه‌ترس ملله‌ته‌گه‌مان و هێز پێشمه‌رگه‌ى كوردستان تویه‌نست وه شه‌و نه‌خه‌فى و زه‌حمه‌ت فراوانیگ ئارامى و سه‌قام له‌ى هه‌رێم تازه پاگرتگه به‌رقه‌رار بكا؛ یه‌یش سه‌ره‌راى ئه‌و هه‌مگه دوژمن ناوه‌كى و ده‌ره‌كیه ك هه‌ر ئان هان له كه‌مین تا كولاوه‌نچه‌یگ بویننه‌و و ده‌س له ده‌سه‌كه‌فته‌یل ملله‌ته‌گه‌مان بووه‌شنن جا چ وه پیلان سیاسى و چ وه كاره‌یل تیرۆریستى و چ وه شیوازه‌یلتر تا بتویه‌نن ئه‌و ئاسایش و سه‌قامه ك له‌ى هه‌رێمه وه خوین دامه‌زریاگه بشیونن و ده‌سكه‌فته‌یل ده‌یان ساڵ خه‌بات و ڕه‌نج ملله‌ته‌گه‌مان وه ئاسانى له‌لى بسیننه‌و دواره كورد ئاواره و ئه‌را هه‌میشه نائومیدى بكه‌ن له ڕه‌سین وه ئامانجه ڕه‌واگانى جوور هه‌ر ملله‌تیگ ك ماف ئازادى و ژیان دیرى. ئه‌گه‌ر لاپه‌ڕه‌یل تاریخ ئى دو ده‌یه‌ى دویاخره‌ى هه‌رێم كوردستان عیراق له‌یه‌كه‌و بیه‌یم وه خاسى ڕه‌سیمنه ئى ڕاسیه ك ئه‌گه‌ر كیشه و گرفتیگ ئاسایشى له‌ى ناوچه هاتگه‌سه دى؛ هووكاره سه‌ره‌كیه‌گه‌ى ئه‌را ڕه‌فتار هه‌ڵه و ناشایس حزب و لایه‌نه‌یل سیاسى چووگه‌و ك ئه‌را به‌رژه‌وه‌ندیه‌یل خوه‌یان جارجاریگ جه‌نگ براكوژى نانه‌سه‌و و دویاخریش هه‌م جووربرا نیشتنه‌سه‌و یه‌ك و ناكووكیه‌گان له ڕى گفتوگوو و دیالۆگ چاره‌سه‌ركردنه و تا ئیسه‌یش له‌ى باوه‌ته گامه‌یل عاقڵانه و حه‌كیمانه‌یگ ئه‌ڵگردنه وه تایبه‌ت هه‌ردو حزبه سه‌ره‌كیه‌گه و یه‌یش ئه‌وه ئه‌رامان سابت ئه‌كا ك ئه‌گه‌ر لایه‌نه‌یل سیاسى وه‌ل یه‌كا ته‌باو هه‌ماهه‌نگ بوون ئه‌وه مه‌ردم هویچ كیشه‌و گرفتیگ وه‌ل یه‌كا نه‌یرن. وه‌لى له‌ى ساڵه‌یل دویاخره دوینیم به‌عزى لایه‌نه‌یل وه ناو سیاسى و به‌عزى له ئامرازه‌یل ڕاگه‌یاندن و میدیاى كوردى ك هه‌ر كامیان وه شیوه‌یگ له شیوه‌یل بودجه‌ى وه‌ریه‌وبردن ئامرازه‌گه‌یان له حكوومه‌ت هه‌رێم و له نان هه‌ژار و فه‌قیره‌یل گیریه‌یگه‌و كریه‌یگه ده‌م ئه‌وان له ڕى نویساننه‌یل نامه‌سئوولانه و خه‌وه‌ره‌یل چه‌واشه‌كارى كیشه و گرفت دروس ئه‌كه‌ن و یه‌یش دوژمنه‌یل ده‌ره‌كى و ده‌زگا سیخوڕیه‌گان دوژمن هان ده‌یگ تا له ئاو لیخن ماسى بگرن و وه هه‌ر شیوه‌یگ بویه ئاسایش و سه‌قام هه‌رێم و ئاسایش نه‌ته‌وه‌یى ملله‌ت كورد ك به‌سیاسه‌و وه ئاسایش ئى هه‌رێمه بشیونن؛ هه‌ر حزب ولایه‌نیگ كوردستانى ك خه‌مخوه‌ر ئاینده و به‌رژه‌وه‌ندیه تایبه‌ته‌گان خوه‌ى و به‌رژه‌وه‌ندیه باڵاگان ملله‌ته‌گه‌ى بوود و هه‌ر كوردیگ چ نیشته‌جاى هه‌رێم كوردستان و چ له ده‌یشت هه‌رێم و له هه‌ر كوره‌ى جه‌هان بژیه‌ى بایه‌د ئى ڕاسیه بزانن ك ئاسایش و سه‌قام هه‌رێم كوردستان و پاریزگارى كردن له ده‌سكه‌فته‌یل ملله‌ته‌گه‌مان له‌ى به‌شه له كوردستان گه‌ورا و ته‌قالا ئه‌را ڕه‌سین وه ئامانجه به‌رز و باڵاگان ملله‌ته‌گه‌مان نیاز وه‌هه‌س كردن وه مه‌سئوولیه‌ت یه‌كه یه‌كه‌ى ئیمه دیرى و خوداى نه‌كرده ئه‌گه‌ر ئاگریگ كه‌فته ئى هه‌رێمه بلویزه‌گه‌ى وه‌بى جیاوازى ماڵه‌یلمان سزنیگ و دویكه‌ڵه‌گه‌ى چووگه چه‌و گشتمان و ته‌ڕ و هشك وه یه‌كه‌و سزیه‌ن؛ به‌س بیلا هوشیار بویمن و له‌یه زیاتر ئاینده‌ى خوه‌مان و نه‌وه‌یل ئاینده نه‌خه‌یمه خه‌ته‌ر.
