گروپ میوزک چل چرا
شه‌فه‌ق نیوز/ چەن گەنجیگ هونەرمەند لە شار خانەقین خوازین هەست هونەری لە ناوچەگە دووارە زنیەو بکەن، و لەڕی میوزک و گورانی پەیام هیوا و ئاشتی ئەرا مەردم پیشكه‌ش بکەن.
لە چایخانەی عەبدولمەجید لوتفی کەلتوری نیشتیان، ودەس کردیانە ژەنین مۆسیقا، وگورانی چڕیان، تا بڕیار دان بوونە تیمەگ میوزک، کەلتور کورد وەگشتی، وکەلتور شار خانەقین لەڕی کارو چالاکییان بڵاوبکەن، و هوکارەی ئەوانە ک خوه‌شیان تیەێد لە هونەر مۆسیقا بکەن، تا بینە گروپیگ لەژیر ناونیشان ( چلچرا) لە مانگ ئایار ٢٠١٩ .
لە تاوسان وەرین، شوینیگ ئەرا خوەیان پەیا کردن، ونیشتنە دامەزرانن گروپەگە، و لەوخت کەمیک تویەنستن هوکارەی بەشیگ لە دڵخوازەیل میوزک بکەن،چ لە ئامێرەیل مۆسیقی جوور کەمان و کەمانجەو گیتارو سازو تارو ئامێرەیلیگ تر، و چ لە خوەنستن نۆتەی میوزک، ولە وەهێزکردن دەنگ، ئەرا ئەوانە ک خوازن بوونە گورانی چڕ، چ لە گەنجو چ لەمناڵ.
ولە چەن چالاکییگ هونەری بەشداری کردن، لە خانەقین وکلار، وبڕیگ مکیسکاری ئەرایان هات ئەرا چالاکیەیل لە بەغداد و سلێمانی، وەلی ئەو چالاکیەیلە وەبونەی پەتای کۆڕونا دویاخریان.
ئیسەیش خریک تۆمارکردن کارەیل هونەری خوەیانن، شایەت وەی نزیکە کارەیلیان بکەفێدە بازاڕ و میدیاگان.
